Pasem xa ta Paraiso li balumile
Li Jeovae tslajesbe skʼoplal skotol li vokolil ti jaʼ yakʼoj li Satanase. Li Jeovae jaʼ svaʼanoj ta Ajvalil li Jesuse. Mi och ta Ajvalil li Jesuse, tspas ta Paraiso spʼejel li Balumile (Daniel 7:13, 14; Lukas 23:43).
Jkʼeltik jaytosuk li bendisionetik yaloj chakʼ Jeovae.
CH˗AYAN EP VEʼLIL: «Ep kʼusi chakʼ li balumile; chakʼbutik bendision li Diose, li Jdiostike». «Ch˗ayan ep kʼusitik stakʼ lajesel li ta balumile, li ta joljolvitse solel busul ti kʼusi stakʼ lajesele» (Salmo 67:6; 72:16).
CHʼABAL XA PASKʼOPETIK: «Laʼik xchiʼuk kʼelavilik li kʼusitik spasoj Jeovae, toj labalik sba li kʼusitik spasoj ta balumile. Tslajesbe skʼoplal li paskʼopetik ta spʼejel balumile» (Salmo 46:8, 9).
CHʼABAL XA CHOPOL KRIXCHANOETIK: «Yuʼun chichʼik lajesel li buchʼutik toj chopolike [...]. Mu xa jaluk skʼan, vaʼun chchʼay skʼoplal li buchʼutik toj chopolike; chakʼel to ti bu toʼox oyike, pe chʼabal xa te oyik» (Salmo 37:9, 10).
CHʼABAL XA LAJELAL XCHIʼUK CHAMELETIK: «Li vaʼ kʼakʼale, chjam satik li maʼsatetike xchiʼuk chjam xchikinik li pakʼchikinetike. Li vaʼ kʼakʼale, ta xpʼitomajik kʼuchaʼal teʼtikalchij li koxoetike xchiʼuk ch˗avanik ta muyubajel li umaʼetike» (Isaias 35:5, 6).
«Te chchiʼinatik ta naklej yuʼun li Diose. Tskusbat skotol yaʼlel satik yuʼun li Diose, muʼyuk xa lajelal, muʼyuk xa at˗oʼonton, muʼyuk xa okʼel ta skoj vokolil xchiʼuk mi jaʼuk xa kʼusi kʼux chkaʼitik. Jelav xa skʼoplal skotol li kʼusitik oy toʼoxe» (Apokalipsis 21:3, 4).
Li Jeovae mu snaʼ sjut kʼop kʼuchaʼal li Satanas xchiʼuk spukujtake, yuʼun skotol li kʼusitik yaloje persa onoʼox chkʼot ta pasel yuʼun (Lukas 1:36, 37). Skʼanojot tajek li Jeovae xchiʼuk oy ta yoʼonton ti xakuxi li ta Paraisoe. Jaʼ yuʼun, chiʼino ta loʼil li stestigotak Jeova sventa xavaʼibe smelolal ta Vivlia li kʼusi yaloj chakʼ Diose. Mi laj avakʼ ta akuxlejal li kʼusi chale, chakol lokʼel ta skʼob li jecheʼ chanubtasele, li ta kʼusitik jecheʼ xchʼunoj li krixchanoetike, vaʼun chjam asat. Maʼuk noʼox, yuʼun ta mas tsʼakale chakol lokʼel ta stojolal li mulil xchiʼuk lajelale. Yuʼun xi onoʼox yaloj li Jesuse: «Chavojtikinik li kʼusi melele xchiʼuk jaʼ chakʼ akolebalik li kʼusi melele» (Juan 8:32).
Xuʼ van chakʼupin skʼelel xtok liʼe
LI KʼUSI BAʼYEL SKʼAN JCHANTIK TA VIVLIAE
¿Kʼusi jaʼ li Ajvalilal yuʼun Diose?
Kʼalal la xchol mantal li Jesuse, jaʼ mas laj yalbe skʼoplal li Ajvalilal yuʼun Diose. Li krixchanoetike voʼne xa lik skʼanik ti xtal li ajvalilal taje.
