Li Vivliae chal ti Satanase «yakal tsloʼla skotol li jnaklejetik ta spʼejel balumile» (Apokalipsis 12:9). Li Satanas xchiʼuk spukujtake mu skʼanik ti jchʼuntik li kʼusi chal Skʼop Dios ti jaʼ li Vivliae. Chakʼbeik xchʼun krixchanoetik ti oy to la kʼusi kuxul chkom kʼalal oy buchʼu chchame. Jkʼeltik batel kʼusitik tstunes.

Ep relijionetik chakʼik ta chanel ti oy la kʼusi kuxul chkom kʼalal chcham li jun krixchanoe, chalik ti jaʼ noʼox la chcham li jbekʼtaltike.

Pe li Skʼop Diose mu jechuk chakʼ ta chanel, yuʼun xi chal kʼalal laj yichʼ pasel li Adane: «Li Jeova Diose lik spas ta lum li vinike. La xvuchʼtabe ta sniʼ, vaʼun jech lik kuxiuk yuʼun li vinike» (Jenesis 2:7). Li Diose muʼyuk kʼusi la stikʼbe ta sbekʼtal li Adan ti xuʼ kuxul chkom kʼalal mi chame.

Li chonbolometik eke chʼabal kʼusi kuxul chkom yuʼunik mi chamike (Jenesis 1:20, 21, 24, 30).

Li Vivliae jamal chal ti muʼyuk kʼusi kuxul chkom kʼalal oy buchʼu chchame jech kʼuchaʼal chal li tekstoetik liʼe:

• «Li buchʼu tsaʼ smule jaʼ chcham stuk» (Esekiel 18:4).

• «Xi tsots avan li Sansone: ‹¡Akʼo chamkun xchiʼuk li jfilisteaetike!›» (Jueses 16:30).

• «¿Kʼusi stakʼ pasel li ta savadoe, mi jaʼ li kʼusi leke o mi jaʼ li kʼusi chopole; mi jaʼ ti oy buchʼu ta jpojtike o mi jaʼ ti oy buchʼu ta jmiltike?» (Markos 3:4).

Yan tekstoetik ti chakʼ ta ilel ti muʼyuk kʼusi kuxul chkom kʼalal oy buchʼu chichʼ milele (Jenesis 17:14), kʼalal oy buchʼu chlaj skʼoplal ta espadae (Josue 10:37), kʼalal oy buchʼu chjikʼave (Job 7:15) xchiʼuk kʼalal oy buchʼu chakʼ ta vokol xkuxlejale (Jonas 2:5). Jech kʼuchaʼal chkiltike, te chlaj˗o skʼoplalik.

Kʼelo avil sliklej li Vivliae, vaʼun te chavakʼ venta ti muʼyuk chakʼ ta chanel ti oy kʼusi kuxul chkom mi lijchame, yuʼun jaʼ Satanas xchiʼuk spukujtak chakʼik ta chanel ti oy kʼusi kuxul chkom kuʼuntike. Li Jeovae spʼajoj li kʼusitik jecheʼ tsjutik li jecheʼ relijionetike (Proverbios 6:16-19; 1 Timoteo 4:1, 2).

Jech xtok, li Satanase tstunes espiritismo sventa sloʼla li krixchanoetike. Li jun j˗espiritistae jaʼ li buchʼu chchiʼin ta loʼil li animaetike. Ep buchʼutik chlajik ta loʼlael ti jaʼ xa xchʼulel animaetik yalojike xchiʼuk lajem ta loʼlael li j˗espiritista eke. Pe jech kʼuchaʼal jchanojtik xa ta Vivliae, taje maʼuk melel (Eklesiastes 9:5, 6, 10).

Vaʼun chaʼa, ¿buchʼu ti chkʼopoje? ¡Jaʼ li pukujetike! Yuʼun te satik ta stojolal li krixchanoetik kʼalal kuxulik toe. Snaʼojik kʼu yelan chkʼopojik, kʼu yelan spat xokonik, kʼusi la spasik xchiʼuk kʼusi snaʼojik, jaʼ yuʼun xlokʼtaj yuʼunik kʼu yelan li jun krixchanoe (1 Samuel 28:3-19).

Li Satanase tstunes jecheʼ loʼiletik sventa chakʼ ta aʼiel ti oy la kʼusi kuxul chkom yuʼun li animaetike. Li jecheʼ loʼiletik taje jaʼ xa mu xchʼunik˗o krixchanoetik li kʼusi melel chal Vivliae (2 Timoteo 4:4).

Li ta Áfricae nopem xaʼi chalik ti laj to laj yil kuxul li yanimaike. Ti bu la chilike maʼuk xa la te ta slumal, nom xa la bu oy. Pe xi xajakʼbe abae: «¿Kʼu yuʼun muʼyuk chtal skʼel yutsʼ yalal o yamigotak ti yuʼun kuxuluk ta melele?».

Jech xtok, ¿mi mu van yanuk˗o buchʼu laj yilik ti xkoʼolaj tajek xchiʼuk li buchʼu chameme? Jech kʼuchaʼal liʼe, oy chaʼvoʼ viniketik kʼalal jaʼo yakal chcholik mantale, laj yakʼik venta ti oy xa ta jayibuk ora te xtijet batel ta spatik jun vinik ti oy xa sjabilale. Kʼalal la sjakʼbeik kʼu chaʼal te xtijet tale, laj yal ti oy la chamem jun sbankile, vaʼun ti xkoʼolaj la laj yil xchiʼuk li jun jcholmantale. Maʼuk onoʼox melel un, pe li vinike xchʼunoj tajek ti jaʼ la sbankile. ¡Nopo noʼox avaʼi kʼusi laj yalbe ta tsʼakal yamigotak xchiʼuk slakʼnatak li vinik taje!

Voʼote oy van avaʼioj ti oy buchʼutik oy kʼusi laj yilik, chaʼiik o chvaychintaike. Li buchʼutik jech tsnuptanik taje solel chiʼik˗o yuʼun. Li Marein ti te nakal ta África occidentale chaʼi chkʼoponat yuʼun anima syaya li ta akʼobaltike. Chiʼ tajek, x˗avet xa likel tstij yutsʼ yalal. Ta mas tsʼakale pas ta chuvaj.

Ti yuʼun kuxulikuk ta melel li animaetike, ¿mi sta˗o ti chtal sibtas li yutsʼ yalalike? Mu sta˗o, yuʼun li buchʼu ch˗ilbajinvanik ta melele jaʼ li pukujetike.

Pe ¿kʼusi xuʼ xkaltik kʼalal lek yiluk li kʼusi chale o ti tspat oʼontonal yileluke? Kalbetik avaʼi sloʼil li Gbassay ti te nakal ta Sierra Leonae. Kʼalal ipaje, kʼoponat ta xvayich yuʼun anima stot, albat bu jtekʼukal teʼ ti xbat skʼokbe tal yanale, ti skap ta voʼe xchiʼuk ti xuchʼbe li yaʼlele. Albat xtok ti muʼyuk buchʼu xalbee. La spas li kʼusi albate, vaʼun poxtaj.

Jun ants xtoke laj yal ti laj la yil tal ta akʼobaltik li anima smalale, laj yal ti lek la xvinaje xchiʼuk ti lek la slapoj skʼuʼe.

Li kʼusitik chaʼiik xchiʼuk li kʼusitik chilike lek yilel, pe ¿mi likem tal ta stojolal Dios? Mu teuk likem tal. Li Jeovae jaʼ li Dios ti melel snaʼ xkʼopoje (Salmo 31:5). Mu snaʼ sloʼlautik, jaʼ noʼox pukujetik ti lek xaʼi xloʼlavanike.

¿Mi oy van lek li pukujetike? Chʼabal. Manchuk mi oy junantik ti chkoltavanik yileluke, pe chopol skotolik. Kʼalal la xchiʼin ta loʼil Eva li Diabloe, lek xa yoʼonton yileluk (Jenesis 3:1). Pe ¿kʼusi kʼot ta stojolal li Eva kʼalal laj xa ox xchʼunbe li kʼusi laj yal li Diabloe? Cham.

Jnaʼojtik lek ti kʼalal oy buchʼu tskʼan chloʼlavane, stalel onoʼox ti lek xa yoʼonton tspas sbae. Xi chal jun pʼijil loʼil ta Turkmen kʼope: «Li ta spat xokone xkoʼolaj ta chij, pe li yoʼontone xkoʼolaj ta lobo». Xi onoʼox chal li skʼop Diose: «Li Satanas eke jech-o tspʼis sba ta jun anjel ti xojobaj noʼoxe» (2 Korintios 11:14).

Li avie, li Diose muʼyuk xa kʼusi chakʼ jvaychintatik, muʼyuk xa kʼusi chakʼ kiltik xchiʼuk muʼyuk xa tskʼoponutik. Yuʼun jaʼ xa tstunes Vivlia sventa sbeiltasutik yoʼ lek chapalutik ta «spasel skotol li lekil abtelale» (2 Timoteo 3:17).

Jaʼ yuʼun, kʼalal tspʼijubtasutik Jeova ta spetsʼtak li Diabloe, yuʼun skʼanojutik. Snaʼoj ti toj xibal sba li pukujetik ti jaʼ kajkontratike.