¿Kʼu yuʼun yakʼojik tajek persa Satanas xchiʼuk spukujtak sventa tsloʼlaik li krixchanoetike? Yuʼun tskʼanik ti xkichʼtik ta mukʼe xchiʼuk ti xlik jtoy jbatik eke. Tskʼanik ti jchʼunbetik li kʼusi chalike xchiʼuk ti xlik jpastik li kʼusitik spʼajoj Jeovae. Li kʼusitik spʼajoje jaʼ li kʼusitik nopem xaʼi tspas krixchanoetik ti te tsakal skʼoplal xchiʼuk li animaetike.

Stalel onoʼox ti toj kʼux xchiʼuk ti chij˗okʼutik yuʼun kʼalal oy buchʼu chcham kuʼuntike. Kʼalal cham yamigo li Jesus ti jaʼ li Lasaroe, lik okʼuk (Juan 11:35).

Ta spʼejel li balumile, oy ep kʼusitik nopem xaʼiik tspasik kʼalal oy buchʼu chcham yuʼunike. Junantik ti kʼu yelan tspasike muʼyuk chopol chil li Diose. Pe li junantik kʼusitik tspasike jaʼ ta skoj ti xchʼunojik ti oy to kʼusi kuxul chkom yuʼun li animaetike xchiʼuk ti x˗ilvanik lae. Kʼalal toj echʼ xa noʼox chchabi li yanimaike, ti muʼyuk xa noʼox smelolal ti kʼu yelan chokʼitaike xchiʼuk ti toj echʼem kʼusitik tspasike, jaʼ ta skoj ti mi xkap sjol yuʼunik li yanimaike. Li buchʼutik jech tspasik taje lajemik ta loʼlael yuʼun li Satanase, yuʼun li Vivliae chal «li buchʼutik chamemike mu xa kʼusi snaʼik jsetʼuk» (Eklesiastes 9:5).

Junantik xtok ti kʼu yelan tspasbeik skʼinal li yanimaike jaʼ ta skoj ti yuʼun la tskʼanik koltael li animaetike, yuʼun mi muʼyuk jechuk la spasike, xuʼ la oy kʼusi chopol spasbatik. Ta junantik lume, kʼalal oy xa ox ta 40 kʼakʼal o jun jabil xa ox xchamel li jun krixchanoe, tspasik jun mukʼta kʼin xchiʼuk chakʼik matanaletik. Ti vaʼ yelan tspasike jaʼ la sventa xjelav batel yanimaik ti bu kuxul li yan animaetike. Yantik xtoke chakʼbeik sveʼel xchiʼuk kʼusi xuchʼik li yanimaike.

Li kʼusitik tspasik taje muʼyuk lek, yuʼun jaʼ noʼox chpuk batel skʼoplal yuʼunik li kʼusi chal Satanas ta sventa animaetik ti mu meleluke. ¿Mi lek van chil Jeova ti jtikʼ jbatik ta spasel li kʼinetik taje ti jaʼ chakʼik ta chanel li pukujetike? ¡Chʼabal lek chil! (2 Korintios 6:14-18).

Li melel yajtunelutik Diose muʼyuk ta jtikʼ jbatik ta spasel li kʼusitik taje, yuʼun mi jech ta jpastike, yakal ta jpuktik batel li kʼusi jecheʼ chakʼ ta chanel Satanase. Li kʼusi noʼox ta jpastike jaʼ ti xkakʼ kipaltik ta skoltael, ta spatbel yoʼonton li buchʼutik kuxajtike. Jnaʼojtik ti jaʼ xa noʼox Jeova xuʼ skolta li buchʼutik chamemike (Job 14:14, 15).

Oy krixchanoetike tskʼopon stukik li pukujetike o ta stojolal jun j˗espiritista. Li espiritismoe te smakoj kʼalal oy buchʼutik chtusvanik sventa xpoxtavanike, li akʼchamele, li majiae, li buchʼutik chalik li kʼusitik chkʼot ta pasel ta jelavele xchiʼuk ti tskʼoponik li animaetike.

Li Vivliae spʼajoj li kʼusitik liʼe: «Mu me buchʼu [...] xchan tʼunol, spasel majia, j˗akʼchamel mi jaʼuk buchʼu chalbe skʼoplal kʼusi chkʼot ta pasel ta tsʼakal, mi jaʼuk buchʼu chchan tuchʼ ora, buchʼu chbat skʼopon j˗espiritista o jtʼunol mi jaʼuk buchʼu oy kʼusi tsjakʼbe li animaetike. Li buchʼutik jech tspasike toj chopol chil li Jeovae» (Deuteronomio 18:10-12).

¿Kʼu yuʼun tsots tspʼijubtasutik Jeova sventa jkʼel jbatik ta skoj taje?

Yuʼun jaʼ sventa jlekilaltik ti jech tspʼijubtasutik ta sventa li espiritismoe. Yuʼun skʼanojutik xchiʼuk oyutik ta yoʼonton. Jech xtok, snaʼoj ti chkil˗o jvokoltik mi la jtikʼ jbatik xchiʼuk li pukujetike.

Li buchʼu jech la snuptane jaʼ li Nilda ti te nakal ta Brasile, jaʼ toʼox jun j˗espiritista. Ilbajinat tajek yuʼun li pukujetike, xi chal li Nildae: «Laj yuʼuninikun li pukujetike, jaʼ xa tspasikun ta mantal. Bakʼintike chkakʼ to venta li kʼusi ta jpase, pe bakʼintike muʼyuk xa. Vaʼun, te likom kʼuk sjalil ta ospital ta skoj ti li˗ipaj xa ta jnopbene. Li pukujetike mi jsetʼuk xiktaikun, jaʼ yuʼun tsots li-ipaj ta jnervio. Epal jabil la jbikʼ calmante, lik yakubkun xchiʼuk lik sikʼolajkun».

Ta mas tsʼakale, koltaat yuʼun Jeova xchiʼuk li stestigotake. Li Nildae iktaat yuʼun li pukujetike, avie jun xa yoʼonton xchiʼuk lek xa oy. Xi chalbutik li Nildae: «Chkalboxuk akotolik ti mu me xatikʼ abaik jsetʼuk xchiʼuk li pukujetike».