Xi chal Dauda: «Te lichʼi ta Sierra Leona. Kʼalal kʼoxun toʼoxe, li kutsʼ kalale lik skʼopik xchiʼuk yan utsʼ alalil ta skoj li yosilike. Sventa xchapaj li skʼopike, la staik ta ikʼel jun jtʼunol. Vaʼun, li jtʼunole laj yakʼbe stsak jun nen li jun vinike, laje la xpix ta sakil pokʼ li vinike. Li vinik ti pixil ta pokʼe lik tʼeluk xchiʼuk lik chikʼinajuk, la skʼel li nene xchiʼuk xi avane: ‹¡Te chkil jun vinik ti oy xa sjabilale! Slapoj sakil kʼuʼil, natil vinik, mol xa xchiʼuk sak xa sjol. Jech xtok, xvujvun xa chanav›.

»Ti kʼu yelan chal talele jaʼ tajek yaʼel li jmukʼtote. Vaʼun, xi xtʼelelet lik avanuke: ‹¡Mi mu xachʼunike, laʼ kʼel avil atukik li ta nene!›. ¡Pe mi jsetʼ buchʼu skʼan xbat skʼel! Vaʼun, li jtʼunole lik stsʼaj ta jay yanal teʼ sventa stus li vinike.

»Li jmukʼtot ti vinaj ta nen ta alele laj yal ti jaʼ yuʼun kutsʼ kalalkutik li osile, laj yalbe jyaya ti akʼo xabtelanik li osile. Muʼyuk xa kʼusi laj yalik li yan utsʼ alalile. Jech chapaj li jkʼopkutike».

Taje naka jech chalik li krixchanoetik ta África occidentale. Ta spʼejel balumile, ta smiyonal xa noʼox krixchanoetik chalik ti oy la kʼusi kuxul chkom mi chamike, ti x˗ilvanik la talele xchiʼuk ti xuʼ la oy kʼusi spasbeik li krixchanoetike. ¿Mi melel van li kʼusi xchʼunojike? ¿Mi melel van ti oy to kʼusi kuxul chkom mi lijchame? Ti mi muʼyuke, ¿buchʼutik ti tskuy sbaik ta animaetike? Toj tsots skʼoplal ti jnabetik li stakʼobiltak taje, yuʼun xuʼ xijkuxi˗o yuʼun o xuʼ xijcham˗o.