Jkotoltik xuʼ jtʼujtik mi ta jkʼan chijtunutik ta stojolal Jeova o jaʼ ta stojolal li Satanas xchiʼuk spukujtake. Yuʼun mu stakʼ ti xijtun ta xchaʼjotale. ¡Jaʼ toj jun yutsil ti xijtun ta stojolal Jeovae!

Jech kʼuchaʼal laj xa jchantike, li pukujetike lek xaʼiik xilbajinik xchiʼuk sloʼlaik li krixchanoetike. Pe li Jeovae mu jechuk stalelal, yuʼun skʼanoj li krixchanoetik jech kʼuchaʼal jun totil ti skʼanoj xnichʼnabe. Jaʼ yakʼoj «skotol li lekil matanal xchiʼuk li tukʼil matanale» (Santiago 1:17). Li Diose ta onoʼox xakʼbe krixchanoetik li kʼusitik mas oy lek yuʼune, manchuk mi toyol stojol (Efesios 2:4-7).

Nopo avaʼi kʼusitik la spas ta balumil li Xnichʼon Dios ti jaʼ li Jesuse. Jam ye yuʼun li animaetike, jam sat li maʼsatetike, la xpoxta li buchʼutik ipik ta leprae xchiʼuk li koxoetike. La snuts lokʼel li pukujetike xchiʼuk la xpoxtabe kʼusiuk chamelal ti ip chaʼiik li krixchanoetike. Maʼuk noʼox, yuʼun la xchaʼkuxes animaetik ta sjuʼel Dios (Mateo 9:32-35; 15:30, 31; Lukas 7:11-15).

Li Diose mu snaʼ sjut kʼop sventa sloʼlautik, yuʼun melel snaʼ xkʼopoj. Muʼyuk onoʼox buchʼu tsloʼla (Numeros 23:19).

Jech kʼuchaʼal jkot vov ti te matsʼal ta sna ome, ta smiyonal noʼox krixchanoetik te tikʼilik ta spasel li kʼusitik sventa metsʼtaele xchiʼuk yan kʼusitik ti maʼuk melele. Chiʼtaik li animaetike, chiʼtaik li pukujetike, tsvul yoʼontonik mi oy kʼusitik chopol xichʼik pasbel, tsvul yoʼontonik ta stojolal li buchʼu chal kʼusi chkʼot ta pasel ta tsʼakale xchiʼuk ta stojolal li j˗akʼchameletike. Jaʼ batem ta yoʼontonik li kʼusitik xchʼunojike xchiʼuk li kʼusitik tspasik ti jaʼ noʼox lajemik˗o ta loʼlael yuʼun li Satanase. Pe li yajtuneltak Diose muʼyuk chlajik ta loʼlael ta skoj li kʼusitik taje.

Li Jeovae mas to tsots sjuʼel kʼuchaʼal li Satanase. Jaʼ yuʼun, mi chatun ta stojolale, jaʼ chchabiot ta stojolal li pukujetike (Santiago 4:7). Muʼyuk kʼusi xuʼ spasboxuk li j˗akʼchameletike. Jun skʼelobile jaʼ li kʼusi kʼot ta pasel ta Nigeriae. Oy oxvoʼ j˗akʼchameletik ti lek xuʼ yuʼunike tskʼan ox tsmilik jun stestigo Jeova ta skoj ti mu skʼan xlokʼ batel ta slumale. Kʼalal laj yilik ti mu xuʼ yuʼunike, li jun j˗akʼchamele xiʼ, bat skʼel li stestigo Jeovae la skʼanbe vokol ti muuk kʼusi spasbate.

Mi tskʼan chilbajinoxuk li pukujetike, xuʼ xatabe ta albel sbi li Jeovae. Vaʼun, jaʼ chchabiot (Proverbios 18:10). Sventa xchabiot li Diose, skʼan xajip xaten lokʼel skotol li kʼusitik te tsakal skʼoplal ta espiritismoe xchiʼuk ti xavikta li yichʼel ta mukʼ pukujetike. Jaʼ jech la spasik li yajtuneltak Dios ta Efesoe, la stsob skotol li slivroik sventa majiae xchiʼuk la xchikʼik (Echos 19:19, 20). Li yajtuneltak Dios avie skʼan jech spasik ek. Chikʼo o jipo lokʼel skotol li kʼusitik sventa metsʼule, li kʼusitik chachuk ta akʼob sventa xchabiote, li livroetik sventa majiae xchiʼuk kʼusiuk noʼox ti te tsakal skʼoplal ta espiritismoe.

Mi chakʼan ti lek xilot li Diose, maʼuk noʼox chavikta komel li kʼusitik jecheʼ chavichʼ ta mukʼe xchiʼuk li kʼusitik chopol chapase, yuʼun skʼan xavichʼ ta mukʼ li melel Diose. Li Vivliae jaʼ chakʼ avil kʼuxi xuʼ xavichʼ ta mukʼ li Diose.

Li Satanas xchiʼuk spukujtake oy svinikik liʼ ta balumil ti chakʼik ta chanel li kʼusitik chopole. Li Jeovae oy steklumal ek jaʼik li stestigotak Jeovae (Isaias 43:10). Li ta spʼejel balumile, oy mas ta 8 miyon stestigotak Jeova. Yakʼojik persa skotolik sventa xcholbeik lekil aʼyej li krixchanoetike. Sventa xavojtikinane, batan li ta Salon sventa Tsobobbaile, vaʼun ta slekil yoʼonton chchʼamoxuk.

Li kʼusi oy ta yoʼontonike jaʼ ti skoltaik yantik yoʼ xlik tunikuk ta stojolal Diose. Chchanubtasoxuk ta Vivlia ta ana, jech xtok chakʼ avilik kʼu yelan ta ichʼel ta mukʼ ta melel li Jeovae. Muʼyuk tskʼan stojolik. Li stestigotak Jeovae xmuyubaj noʼox chchanubtasoxuk, yuʼun skʼanojik li krixchanoetike xchiʼuk skʼanojik li Jeova Diose.