Bakʼintike tslabanutik o ch-ilinik li krixchanoetik kʼalal chkalbetik skʼoplal li Jeovae. Chopol chkaʼi jbatik, ¿mi mu jechuk? Xuʼ van xi jnoptike: ‹Mu xa jkʼan xkalbe skʼoplal li Diose›. ¿Mi oy bu jech xavaʼi aba?... Li Vivliae chalbe skʼoplal jun kerem ti skʼanoj tajek li Jeovae, pe jutuk xaʼox mu laj yikta sba ta yalbel skʼoplal. Li sbie jaʼ Jeremias. Kalbetik mas skʼoplal li kerem taje.

Kʼalal kerem toʼox li Jeremiase albat yuʼun Jeova ti akʼo xalbe krixchanoetik ti mu xa spasik li kʼusitik chopole. Toj tsots laj yaʼi xchiʼuk xiʼo. Xi laj yalbe li Jeovae: ‹Ay, Kajval Jeova, mu jnaʼ kʼusi chkal, yuʼun keremun to›. Pe xi laj yal li Jeovae: ‹Mu xaxiʼ, voʼon ta jkoltaot›.

 Jaʼ yuʼun xi lik yalbe krixchanoetik li Jeremiase: ‹Chavichʼik kastigo mi mu xajel atalelalike›. ¿Mi laj van xchʼunik li krixchanoetike?... Muʼyuk. Kʼajomal lik slabanik xchiʼuk ilinik ta stojolal. ¡Tsmil ox yaʼiik! ¿Kʼu van yelan laj yaʼi sba xanaʼ li Jeremiase?... Ta xiʼ xchiʼuk xi laj yale: ‹Muʼyuk xa chkalbe skʼoplal li Jeovae›. Pe ¿mi laj van yikta sba xanaʼ?... Muʼyuk, muʼyuk laj yikta sba, yuʼun skʼanoj tajek Jeova li Jeremiase. Ta skoj ti muʼyuk laj yikta sba ta yalbel skʼoplal Jeova li Jeremiase, chabiat.

Jech kʼuchaʼal liʼe, jun veltae la sjipik ochel Jeremias ta natil poso ti noj ta achʼele. Maʼuk noʼox taje, yuʼun muʼyuk kʼusi slajes xchiʼuk muʼyuk voʼ xuchʼ. ¡Tskʼanik ti te xcham li Jeremiase! Pe muʼyuk bu te xcham, yuʼun koltaat yuʼun Jeova.

¿Kʼusi chakʼ achan li stalelal Jeremiase?... Bakʼintike ta xiʼ, pe muʼyuk laj yikta sba ta yalbel skʼoplal li Jeovae. Kʼalal chavalbe skʼoplal li Jeova eke, xuʼ van slabanikot o x-ilinik ta atojolal li krixchanoetike. Vaʼun xuʼ van xakʼexav o xaxiʼ. Pe mu me xavikta aba ta yalbel skʼoplal li Jeovae. Yuʼun ta onoʼox skoltaot jech kʼuchaʼal la skolta li Jeremiase.