XCHANOBIL 1
Jun loʼil ti ta jkʼan ta jnaʼtike
¿Mi oy buchʼu yalojbot junuk loʼil ti muʼyuk toʼox buchʼu snaʼoje?... * Li Vivliae oy kʼusi chalbe skʼoplal ti muʼyuk toʼox buchʼu la snaʼe, jaʼ sbi: ‹Li kʼusi chʼul ti mukul skʼoplale›. ¿Kʼu yuʼun ti chʼule? Yuʼun likem tal ta stojolal Dios. Muʼyuk toʼox buchʼu albil maʼ taje. Yuʼun kʼalal ta anjeletik tskʼan ox tsnaʼik ek. ¿Mi chakʼan chanaʼ ek?...
¿Kʼusi ti tskʼan tsnaʼik xanaʼ li anjeletik eke?
Mi xanaʼe la spas baʼyel vinik xchiʼuk baʼyel ants li Diose, taje voʼne xa tajek. ¿Mi xanaʼ kʼusi sbi?... Adan xchiʼuk Eva. Toj kʼupil sba ti bu akʼatik yuʼun li Diose, jaʼ sbi nichimaltik Edén. Ti lajuk xchʼunbeik smantal Dios li Adan xchiʼuk Evae, la spasik ta nichimaltik jechuk spʼejel li Balumile. Jmoj abtejik xchiʼuk yalab xnichʼnabik xchiʼuk jun yoʼonton kuxiik sbatel osil ti jechuke. Pe ¿mi xvul ta ajol li kʼusi la spas li Adan xchiʼuk Evae?...
Muʼyuk la xchʼunbeik smantal Dios li Adan xchiʼuk Evae, jaʼ yuʼun li avie maʼuk nichimaltik li balumile. Pe li Diose laj yal ti tspas ta nichimaltik spʼejel li Balumile. Vaʼun xijmuyubaj noʼox chijkuxi sbatel osil te. ¿Kʼuxi chkʼot ta pasel yuʼun taje? Ep jabil muʼyuk toʼox buchʼu la snaʼ. ¡Yuʼun lek nakʼal skʼoplal!
Kʼalal ay ta Balumil li Jesuse, laj yakʼbe xchan mas krixchanoetik ta sventa li kʼusi muʼyuk buchʼu snabe skʼoplale. Jaʼ skʼoplal li Ajvalilal yuʼun Diose. Xi chkaltik kʼalal ta jpastik orasione: ‹Akʼo taluk li Ajvalilal avuʼune›. ¿Kʼu yuʼun? Yuʼun jaʼ tspas ta kʼupil sba nichimaltik li Balumile.
¿Mi chakʼan te chanaki ta paraiso?... Teuk me ta ajol liʼe: jaʼ noʼox me chkuxi ta Paraiso li buchʼutik chchʼunbeik smantal Jeovae. Ep viniketik xchiʼuk antsetik chalbe skʼoplal Vivlia ti la xchʼunbeik smantal li Jeovae. ¿Mi chakʼan chanaʼ buchʼutik taje?... Jkʼeltik buchʼutik xchiʼuk jkʼeltik kʼuxi xuʼ jchanbetik stalelalik.
KʼELO TA AVIVLIA:
^ par. 3 Te chavil ta sliklej foyeto ti oy oxib punto (...) kʼalal oy kʼusi tsjakʼ li loʼiletike, jaʼ skʼan xal ti skʼan xapaj jlikeluk sventa stakʼ li avuni kerem o li avuni tsebe.
