XCHANOBIL 3
Spatoj yoʼonton ta stojolal Jeova li Raabe
Jnoptik ti te oyutik ta jteklum Jerikoe. Te oy ta yosilal Kanaan li jteklum taje, muʼyuk xchʼunel yoʼontonik ta stojolal Jeova li krixchanoetik tee. Te nakal jun ants ti jaʼ sbi Raabe.
Ta sbikʼtal onoʼox laj yaʼibe skʼoplal Jeova li Raabe. Laj yaʼi kʼu yelan koltaatik yuʼun Jeova ta stsalel yajkontratakik li j-israeletike. Jech kʼuchaʼal liʼe, la stunes Moisés sventa tslokʼes ta Ejipto li j-israeletike xchiʼuk ti kʼu yelan la xtuchʼik li Tsajal Nabe. ¡Li avi une laj xa yaʼi ti te xa nopol oyik ta Jeriko li j-israeletike!
La skolta jpaʼivanejetik li Raabe, yuʼun spatoj yoʼonton ta stojolal Jeova
Kʼalal ch-ikʼub xaʼoxe te kʼotik ta Jeriko chaʼvoʼ j-israeletik sventa tspaʼiik li jteklume. Te kʼotik ta sna Raab. Laj yotes ta sna xchiʼuk laj yalbe ti xuʼ te xvayike. Kʼalal ikʼ xaʼox osile laj yaʼi ajvalil ta Jeriko ti oy buchʼutik talemik ta jpaʼivaneje, ti te la batik ta sna Raabe. Jaʼ yuʼun la stak batel viniketik sventa xbat xchukik talel. ¿Kʼusi la spas li Raabe? Te la snakʼ ta sjol sna li chaʼvoʼ viniketike. Kʼalal kʼot li sviniktak ajvalile, xi laj yale: ‹Ay chaʼvoʼ viniketik liʼe, pe lokʼik xa batel ta jteklum. ¡Mi chbat anutsik ta anile, xuʼ to van xataik ta be!›. ¿Mi xanaʼ kʼu yuʼun la snakʼ jpaʼivanejetik li Raabe?... Yuʼun oy xchʼunel yoʼonton ta stojolal Jeova xchiʼuk snaʼoj ti chakʼbe j-israeletik li yosilal Kanaane.
Kʼalal skʼan toʼox xlokʼik batel li chaʼvoʼ jpaʼivanejetike, laj yalbeik ta melel Raab ti muʼyuk chcham xchiʼuk yutsʼ yalal mi laj yichʼ lajesel li Jerikoe. Pe oy kʼusi skʼan spas li Raabe. ¿Mi xanaʼ kʼusi?... Xi albate: ‹Jokʼano ta aventana li tsajal chʼojon liʼe. Vaʼun mi junuk buchʼu chcham li buchʼutik liʼ oy ta yut anae›. Jaʼ jech la spas Raab kʼuchaʼal albat komel yuʼun li jpaʼivanejetike. ¿Mi chakʼan chkalbot ti kʼusi kʼot ta pasele?...
Pojatik yuʼun Jeova li Raab xchiʼuk li yutsʼ yalale
Kʼalal echʼ jayibuk kʼakʼale, te lik xchan yokik ta sjoylej jteklum Jeriko li j-israeletike, tsʼijil noʼox chanavik batel. Vakib kʼakʼal jech la spasik, jun velta ta kʼakʼal la xchan yokik. Pe li ta svukubal kʼakʼale vukub to velta la xchan yokik xchiʼuk tsots avanik. Vaʼun oy kʼusi toj labal sba kʼot ta pasel: ¡La slomesbe smuroal jteklum li Jeovae! Pe ¿mi lom sna li Raab eke? ¡Muʼyuk bu xlom ta skoj ti te jokʼanbil jpʼej tsajal chʼojone! ¿Mi xavil li ta lokʼole?... ¡Muʼyuk xchamik li Raab xchiʼuk yutsʼ yalale!
¿Kʼu yuʼun muʼyuk xcham li Raabe?... Yuʼun spatoj yoʼonton ta stojolal Jeova, yuʼun yabinoj ti ep kʼusitik labalik sba spasoje. Oy kʼusitik labalik sba yakal chachan ta stojolal li Jeova eke. ¿Mi chachʼunbe smantal Jeova ek kʼuchaʼal la xchʼun li Raabe?... ¡Jnaʼojkutik ti chachʼune!
