¿KʼUSITIK chata ta kʼelel li ta periodikoe, ta television o kʼalal chavaʼi li radioe? ¡Jaʼ noʼox chata ta kʼelel majbail, paskʼop xchiʼuk terrorismo! Pe nopo ta sventa li avokoltak eke. Yikʼal van chavat avoʼonton ta skoj jtosuk chamel o ti cham junuk avutsʼ avalal o junuk avamigoe. Xuʼ van jech xavaʼi aba kʼuchaʼal li Jobe, jun lekil vinik ti xi laj yale: «Solel muʼyuc xa jtu licom o» (Job 10:15).

Xi xajakʼbe abae:

• ¿Mi jech tskʼan Dios li kʼusitik ta jnuptane xchiʼuk li kʼusi tsnuptan yantike?

• ¿Bu xuʼ ta jta koltael sventa stsal kuʼun li jvokoltake?

• ¿Mi ta van xkʼot skʼakʼalil ti chkiltik lekilal liʼ ta Balumile?

Jaʼ tstakʼ Vivlia li kʼusitik taje.

«Tskusbat skotol yaʼlel satik yuʼun li Diose, muʼyuk xa lajelal, muʼyuk xa at-oʼonton, muʼyuk xa okʼel ta skoj vokolil xchiʼuk mi jaʼuk xa kʼusi kʼux ta aʼiel.» (Apokalipsis 21:4)

«Li coxoetique xbitubajic noʼox liquel jech chac cʼu chaʼal teʼtical chij.» (Isaías 35:6)

«Ta xlic jamuc satic li maʼsatetique.» (Isaías 35:5)

 «Skotol li buchʼutik oy ta smukinalike [...] chlokʼik tal.» (Juan 5:28, 29)

«Mu jbejuc ta na jech chal: ‹Toj ipun›.» (Isaías 33:24)

«Acʼo oyuc ep trigo [o veʼlil] liʼ ta banamil.» (Salmo 72:16)

Mu xanop ta anil ti jaʼ noʼox jun vaychil li kʼusitik chvinaj ta pajina 4 xchiʼuk 5. Jaʼ laj yal ta melel li Diose xchiʼuk chal Vivlia ti kʼu yelan chkʼot ta pasel yuʼune.

Pe maʼuk skotol maʼ taje. Yuʼun li Vivlia xtoke chchanubtasutik kʼu yelan xuʼ jkʼupin lek jkuxlejaltik li avie. Nopo jlikeluk avaʼi ta sventa li avokoltak xchiʼuk li kʼusi chavul-o avoʼontone. Yikʼal van muʼyuk lek atakʼin, oy avokol ta avutsʼ avalal, ipot o oy buchʼu cham avuʼun. Li Vivliae tskoltautik sventa xkuch kuʼuntik li vokolile, jech xtok tspat koʼontontik kʼalal tstakʼbutik li kʼusitik ta jakʼtike. Jech kʼuchaʼal liʼe:

• ¿Kʼu yuʼun chkil jvokoltik?

• ¿Kʼuxi xuʼ xkuch kuʼuntik li at-oʼontone?

• ¿Kʼusi xuʼ jpastik sventa xijmuyubaj xchiʼuk li kutsʼ kalaltike?

• ¿Bu oy li animaetike?

• ¿Mi chkiltik to yan velta li buchʼutik chamem kuʼuntike?

• ¿Kʼu yuʼun xuʼ jchʼuntik ta melel ti tspas li kʼusitik yaloj Diose?

 Kʼalal chakʼel li livro liʼe, chavakʼ ta ilel ti oy ta avoʼonton chachan avaʼi li kʼusi chchanubtasvan Vivliae. Jaʼ tskoltaot li livro liʼe. Li ta yok jujun pajinae oy sjakʼobil jujun parafo, jaʼ yuʼun ta smiyonal noʼox krixchanoetik lek chaʼiik ti kʼu yelan chchanubtasvan li stestigotak Jeovae. Oy ta koʼontonkutik ti jech lekuk xavaʼi eke. Akʼo yakʼbot sbendision Dios kʼalal chachan batel li kʼusi chchanubtasvan ta melel li Vivlia ti toj yan sba yutsile.