¿KʼU YUʼUN tsots skʼoplal ti ta jakʼbe jbatik buchʼu jaʼ li jDiostike?... Yuʼun ep diosetik ta smuyubtaik li krixchanoetike (1 Corintios 8:5). Kʼalal akʼbat sjuʼel yuʼun Jeova li jtakbol Pablo sventa chpoxta jun vinik ti muʼyuk-o xanaveme, xi avanik li epal krixchanoetike: «Yalem tal diosetic ta jtojoltic, xcoʼolaj xchiʼuc cristianoetic yilel», xiik. Vaʼun la skʼan la smuyubtaik li Pablo xchiʼuk li Bernabe ti jaʼ yamigo sbaike. Lik yakʼbeik sbiin kʼuchaʼal jecheʼ diosetik: Li Pabloe Mercurio laj yacʼbeic sbi, li Bernabee Júpiter laj yakʼbeik sbi.

Pe li Pablo xchiʼuk Bernabee muʼyuk bu laj yakʼ akʼo xmuyubtaatik. La skap sbaik xchiʼuk li krixchanoetike xchiʼuk xi laj yalike: Komtsanik li kʼusi muʼyuk stue, talanik ta stojol li kuxul Diose, xiik (Hechos 14:8-15). ¿Buchʼu jaʼ li «kuxul Dios» ti la spas skotol li kʼusitike?... Jaʼ li Jeovae, li buchʼu «ven toyol oy[...] yuʼun scotol li banamile». Li Jesuse xi la sbiiltas li Jeovae: «atuc noʼox Diosot ta melele», xi. Jech oxal chaʼa, ¿buchʼu noʼox ti xuʼ ta xichʼ muyubtaele?... Jaʼ li Jeovae, muʼyuk buchʼu yan (Salmo 97:9; Juan 17:3, Ch; Apocalipsis 4:11).

Jutuk mu skotoluk li krixchanoetike ta smuyubtaik diosetik ti maʼuk li «melel Diose». Li stukike ta smuyubtaik kʼusitik ti pasbilik ta teʼ, ta ton o ta takʼine (Éxodo 32:4-7; Levítico 26:1; Isaías 44:14-17). Jaʼ no jech xtok, junantik viniketik xchiʼuk antsetik ti lek ojtikinbilike kuybilik ta diosetik. Pe ¿mi xuʼ xichʼik muyubtael?...

Ta tsʼakal kʼalal ipas ta jtakbol Pablo li Sauloe, xi la stsʼibae: «Macbil snopbenal, macbil satic yuʼun ti sdiosic liʼ ta banomile», xi (2 Corintios 4:4, Ch). ¿Buchʼu jaʼ li dios taje?... Jaʼ li Diablo Satanase. Jaʼ spasoj ti akʼo xichʼ muyubtael epal krixchanoetik xchiʼuk kʼusitike.

 Kʼalal laj yakʼbe yipal li Satanás sventa akʼo snijan sba xchiʼuk akʼo xmuyubtaat yuʼun li Jesuse, ¿kʼusi la stakʼbe li Jesuse?... «Jaʼ noʼox xavichʼic ta mucʼ stuc li Cajvaltique, jaʼ li Dios avuʼune, jaʼ noʼox xaquejan aba ta stojol», xi (Mateo 4:10). Kʼalal jech laj yal li Jesuse, jamal laj yakʼ ta ilel ti jaʼ noʼox skʼan ta xichʼ muyubtael li Jeovae. Ta jkʼeltik kʼusi kʼot ta stojolalik jayvoʼ keremetik ti snaʼojik taje. Jaʼ sbiik Sadrac, Mesac xchiʼuk Abed-nego.

Li keremetik taje jaʼ j-hebreoetik ti ayanik ta Israele, li steklumal Diose, pe laj yichʼik chukel batel ta slumal Babilonia. Tee, jun ajvalil ti jaʼ sbi Nabucodonosore la spas jun mukʼta lokʼol ta kʼanal takʼin. Jun kʼakʼale, laj yal mantal ti kʼalal ta xaʼiik chbakʼ li sone, skʼan la ta snijan sbaik skotolik ta stojolal li lokʼole. Xi laj yal tsots mantale: Li buchʼu muʼyuk ta snijan sba xchiʼuk muʼyuk ta smuyubtae, ta xichʼ jipel ochel ta yut orno ti xpulpun skʼakʼale, xi. ¿Kʼusi van la apas jechuk ti voʼotuke?...

 Jechtik onoʼox, li Sadrac, li Mesac xchiʼuk li Abed-negoe ta xchʼunbeik skotol smantal li ajvalile. Pe li avie muʼyuk bu la spasik, muʼyuk bu la snijan sbaik ta stojolal li lokʼole. ¿Mi xa naʼ kʼu yuʼun?... Yuʼun li smantal Diose xi ta xale: Mu me xavichʼik ta mukʼ yan diosetik. Mu me xa pas yan adiosik mi jaʼuk me xa nijan abaik ta stojolal, xi (Éxodo 20:3-5). Jaʼ yuʼun, li Sadrac, li Mesac xchiʼuk li Abed-negoe jaʼ la xchʼunbeik smantal li Jeovae, maʼuk la xchʼunik li smantal ajvalile.

Li ajvalile ilin tajmek, jech un chaʼa laj yal mantal ti akʼo yikʼik tal ta stojolal li oxvoʼ j-hebreoal keremetike. Vaʼun xi laj yalanbee: ¿Mi melel ti muʼyuk bu cha tunik ta stojolal li jdiostake? Cha kalboxuk junuk xa velta ti akʼo xa pasike. Kʼalal mi laj avaʼiik li sone, nijan abaik xchiʼuk muyubtaik li lokʼol ti jpasoje. Mi mu xa chʼunike, chavichʼik jipel ochel ta yut orno ti xpulpun skʼakʼale. ¿Buchʼu diosal ti xuʼ cha spojoxuk li ta jkʼobe?, xi.

¿Kʼusi van ta spasik li keremetik taje? ¿Kʼusi van la apas jechuk ti voʼotuke?... Li stukike xi la stakʼbeik li ajvalile: Li jDioskutik ti chi tunkutik ta stojolale xuʼ ta spojunkutik. Pe manchuk mi muʼyuk bu ta spojunkutik, muʼyuk bu chi tunkutik ta stojolal li adiostake. Muʼyuk bu ta jnijan jbakutik ta stojolal li lokʼol ti pasbil ta kʼanal takʼin ti la apase, xiik.

 Li ajvalile isok tajmek sjol xchiʼuk xi laj yale: ¡Kʼakʼubtasik vukub velta mas li orno jech kʼuchaʼal onoʼox cha kʼakʼubtasike!, xi. Vaʼun la stak jayvoʼ soltarotak ti bu mas tsotsik sventa akʼo xchukik li Sadrac, li Mesac xchiʼuk li Abed-negoe, te une la sjipik ochel li ta ornoe. ¡Li ornoe toj echʼ noʼox kʼokʼ yuʼun ta sleb noʼox kʼokʼ ichamik li soltaroetike! Pe ¿kʼusi kʼot ta stojolalik li oxvoʼ j-hebreoetike?

Li Sadrac, li Mesac xchiʼuk li Abed-negoe ta oʼlol kʼokʼ itsʼujik, pe vaʼun ta anil noʼox ivaʼiik. Muʼyuk kʼusi ipasbatik yuʼun li kʼokʼe xchiʼuk muʼyuk xa bu chukulik. ¿Kʼuxi xa noʼox jech un taje?... Li ajvalile la skʼel ochel li ornoe xchiʼuk ixiʼ yuʼun li kʼusi laj yile. ¿Mi mu oxvoʼikuk li viniketik ti laj jiptik ochel ta kʼokʼe?, xi la sjakʼe. Li yajtuneltake xi la stakʼike: «oxibic noʼox», xiik.

Vaʼun xi laj yale: ¡Kʼelavilik! Chanvoʼ viniketik te xvaʼetik ta oʼlol kʼokʼ chkil xchiʼuk muʼyuk kʼusi chpasbatik, xi. ¿Mi xa naʼ buchʼu jaʼ li xchanibal vinike?... Jaʼ li yaj-anjel Jeovae, jaʼ li anjel ti la xchabi li oxvoʼ j-hebreoetik sventa mu kʼusi spasbatik li kʼokʼe.

Kʼalal jech laj yil li ajvalile, inopaj batel ta stiʼil li ornoe xchiʼuk xi avane: «Sadrac, Mesac, Abed-nego, voʼoxuc li  yajtuneloxuc Dios ta toyole, locʼanic tal, laʼic liʼi», xi. Kʼalal ilokʼike, skotolik laj yilik ti muʼyuk bu ikʼakʼike. Mi jaʼuk xkuchojbeik yikʼ chʼail. Vaʼun li ajvalile xi laj yale: Ichʼbiluk ta mukʼ li Dios yuʼun Sadrac, Mesac, xchiʼuk Abed-negoe, yuʼun la stak tal yaj-anjel sventa tskolta li yajtuneltak ta skoj ti yuʼun muʼyuk la skʼan la smuyubtaik yan dios ti maʼuk sDiosike, xi (Daniel, kapitulo 3).

Li kʼusi kʼot ta pasel un taje xuʼ ta jchanbetik jun xchanobil. Ta jkʼakʼaliltike, li krixchanoetik eke tspasik lokʼoletik, o santoetik sventa tsmuyubtaik. Tspasik ta teʼ, ta ton, ta takʼin o ta pokʼ. Jun livroe xi ta xale: «Li bandera xchiʼuk li kruse koʼol chʼulik» (The Encyclopedia Americana). Li baʼyel yajtsʼaklomtak Jesuse muʼyuk bu la smuyubtaik li ajvalil ta Romae. Li j-al loʼil Daniel P. Mannix laj yal ti kʼusi la spasike xkoʼolaj la xchiʼuk ti «kʼalal muʼyuk bu ta xichʼ pasel saludar li banderae xchiʼuk muʼyuk bu ta xichʼ takʼel li juramento tspasbeik li banderae».

Jech oxal chaʼa, ¿mi oy van kʼusi jelel chil li Dios mi pasbil ta teʼ, ta ton o ta takʼin li jun lokʼol sventa relijione?... ¿Mi lek van ti jun yajtunel Jeova tsmuyubta junuk velta li jun lokʼol jech kʼuchaʼal taje?... Li Sadrac, li Mesac xchiʼuk li Abed-negoe muʼyuk bu la spasik, vaʼun lek laj yil li Jeovae. ¿Kʼuxi xuʼ xa chanbe li stalelalike?...