¿MI CHA kʼopon li Jeova Diose?... Li stuke tskʼan ti akʼo xa kʼopone. Kʼalal cha kʼopon li Diose, yakal xa pas orasion. Li Jesuse nopolik noʼox tskʼopon li sTot ta vinajele, bakʼintike jaʼ tskʼan ti stukuk te oy ti kʼalal tskʼopon li Diose. Li Vivliae ta xal ti jun veltae «imuy batel ta vits, bat scʼopan Dios. Cʼalal iʼicʼub osile, stuc te oy o ta vits li Jesuse» (Mateo 14:23).

¿Bu xuʼ xa kʼopon atuk li Jeovae?... Oyikʼal van ta akuarto kʼalaluk yuʼun xa cha vaye. Li Jesuse xi laj yale: «Cʼalal chacʼopanic Dios li voʼoxuque, ochan ta yut anaic, maquic li tiʼnae, cʼopanic li Jtotic Diose», xi (Mateo 6:6). ¿Mi cha kʼopon Dios ti jujun akʼobal kʼalal yuʼun xa cha vaye?... Skʼan cha kʼopon.

Jaʼ noʼox jech xtok li Jesuse la spas orasion ti kʼalal te oy  xchiʼuk li yan krixchanoetike. Kʼalaluk cham li Lazaroe, li Jesuse la spas orasion xchiʼuk li yan krixchanoetik ti bu smukojike (Juan 11:41, 42). Jaʼ no jech xtok, li Jesuse la skʼopon sTot ti kʼalal tstsob sbaik xchiʼuk li yajchankʼoptake. ¿Mi cha bat ta tsobajel ti bu chichʼ pasel orasione?... Jutuk mu skotoluk li buchʼutik tspasik orasione jaʼ jun mukʼta krixchano. Skʼan cha chikintabe lek li kʼusitik chale, yuʼun jaʼ sventa alekilal ti yakal tskʼopon li Diose. Vaʼun xuʼ chaval «jechuk» kʼalal mi tsuts li orasione. ¿Mi xa naʼ kʼu yuʼun chkaltik «jechuk»?... Jaʼ sventa chkakʼtik ta ilel ti lek laj kaʼitik li orasione, ti jmoj snopbenal kuʼuntike xchiʼuk ti ta jkʼantik ti jaʼuk j-orasiontik eke.

Jech xtok, li Jesuse la spas orasion ti kʼalal muʼyuk toʼox ch-och ta veʼele, chalbe koliyal Jeova ta sventa li veʼlile. Li voʼote, ¿mi cha pas orasion ti kʼalal mu to xa och ta veʼele?... Lek ti chkalbetik koliyal Jeova kʼalal skʼan to chi j-och ta veʼele. Bakʼintike yan buchʼu tspas li orasione. Pe mi atuk cha veʼ o mi te oyot xchiʼuk buchʼu muʼyuk ta xalbe koliyal li Jeovae, ¿kʼusi skʼan cha pas?... Skʼan cha pas aorasion atuk.

¿Mi persa van skʼan tsots chi jkʼopojutik ti kʼalal ta jpastik orasione? ¿O mi ta van xaʼi li j-orasiontik ti ta jpastik ta koʼontontik li  Jeovae?... Jkʼeltik li kʼusi kʼot ta stojolal li Nehemiase. Liʼe jaʼ jun yajtunel Jeova ti te toʼox ch-abtej ta snail spasobmantal li ajvalil Artajerjese. Jun kʼakʼale, li Nehemiase laj yat tajmek yoʼonton ti kʼalal laj yaʼi ti jinesbil li smuroaltak Jerusalene, ti jaʼ kapital yuʼun slumale.

Kʼalal jakʼbat yuʼun ajvalil kʼu yuʼun ta xat yoʼonton li Nehemiase, li kʼusi baʼyel la spas li Nehemiase jaʼ ti la skʼopon ta yoʼonton li Diose. Tsʼakal ne laj yalbe smelolal li ajvalil kʼu yuʼun ti jech ta xaʼi sbae xchiʼuk la skʼanbe permiso sventa chbat ta Jerusalén sventa chchaʼmeltsan li muroetike. ¿Kʼusi kʼot ta pasel?...

Li Diose la stakʼbe li s-orasion Nehemiase. Li ajvalile laj yakʼ xbat xtok, laj yakʼbe epal teʼetik sventa tsmeltsanik li muroetike. Kʼuchaʼal laj kiltike, li Diose xuʼ  tstakʼbutik li j-orasiontike, manchuk mi ta koʼontontik ta jpastik (Nehemías 1:2, 3; 2:4-8).

¿Mi persa ta jnijan jbatik ti kʼalal ta jpastik orasione? ¿O mi persa chi jkeji? ¿Kʼusi cha nop?... Bakʼintike, li Jesuse ikeji ti kʼalal la spas orasione, bakʼintik xtoke vaʼal noʼox la spas. Bakʼintike la stoy muyel sat ta vinajel, jech kʼuchaʼal liʼe, kʼalaluk la spas orasion sventa Lazaroe.

¿Kʼusi chakʼ ta ilel taje?... Chakʼ ta ilel ti mu toj tsotsuk skʼoplal ti kʼuyelan oyutik ti kʼalal ta jpastik orasione. Bakʼintike xuʼ van jaʼ lek mi ta jnijan jbatik xchiʼuk ta jmutsʼ jsatike. Bakʼintik xtoke xuʼ van cha keji, jech kʼuchaʼal la spas li Jesuse. Pe vuleso ta ajol: Xuʼ jkʼopontik Dios kʼusuk ora ta kʼakʼaltik o ta akʼobaltik, li stuke ta xaʼibutik li j-orasiontike. Li kʼusi mas tsots skʼoplale jaʼ ti akʼo jchʼuntik ti chaʼi j-orasiontik li Jeovae. ¿Mi cha chʼun li voʼote?...

¿Kʼusi xuʼ xkaltik li ta j-orasiontike?... Alo kaʼtik: kʼalaluk cha pas orasione, ¿kʼusi chavalbe li Diose?... Toj echʼ noʼox ep kʼusitik lek chi yakʼbutik li Jeovae. ¿Mi mu meleluk ti skʼan ta xkalbetik koliyal ta skoj kʼusitik taje?... Manchuk mi lek ti chkalbetik koliyal ta skoj li jveʼeltike, ¿mi avalojbe koliyal ta sventa li yaxal vinajele, li tsʼiʼleletike, li teʼetike xchiʼuk li kʼupil sba nichimetike?... Yuʼun jaʼ la spasanan noxtok.

 Jun velta li yajchankʼoptak Jesuse laj yalbeik ti akʼo xchanubtasatik ta spasel orasione. Li Mukʼta Jchanubtasvaneje la xchanubtasanan li kʼusitik mas tsots skʼoplal ta kʼanel ta orasione. ¿Mi xavojtikinan kʼusitik jaʼ?... Mi cha jam aVivlia ta Mateo, kapitulo 6, versikulo 9 kʼalal to ta 13, te cha ta li orasion ti jaʼ sbi padrenuestroe. Koʼol jkʼeltik.

Kʼuchaʼal la jkʼeltike, li Jesuse laj yal ti akʼo jkʼantik ta orasion ti akʼo xichʼ chʼultajesbel sbi li Diose. ¿Kʼusi sbi li Diose?... Jaʼ, Jeova, xchiʼuk skʼan ta jkʼanbetik li sbie.

Xchibal, li Jesuse la xchanubtasutik ta skʼanel ta orasion ti akʼo taluk li Ajvalilal yuʼun Diose. Li Ajvalilal taje toj tsots skʼoplal yuʼun jaʼ ta xichʼ talel lekilal liʼ ta Balumile xchiʼuk ta skʼatajes ta jun paraiso.

Yoxibal, li Mukʼta Jchanubtasvaneje laj yal ti akʼo jkʼantik ta orasion sventa akʼo kʼotuk ta pasel li kʼusi tskʼan Dios liʼ ta Balumil jech kʼuchaʼal ta vinajele. Mi ta jkʼantik taje, jaʼ skʼan ta jpastik ek li kʼusi tskʼan Dios akʼo jpastike, jaʼ xkaltik, li kʼusi tskʼan yoʼontone.

Vaʼun, li Jesuse la xchanubtasutik ta skʼanel li jveʼeltik ti chtun kuʼuntik jujun kʼakʼale. Jech xtok, laj yal ti skʼan ta jsutes koʼontontike xchiʼuk ti skʼan ta jkʼanbetik perton li Dios ta skoj li muliletik ta jpastike. Pe, mi ta jkʼantik akʼo xi spasbutik perton li Diose, skʼan ta jpasbetik perton ek li buchʼu oy kʼusi chopol spasojbutike. ¿Mi kʼun ta pasel chavaʼi?...

Ta slajeb ne, li Jesuse la xchanubtasutik ta skʼanbel Jeova Dios ti akʼo xi spojutik ta skʼob li Diablo Satanase. Skotol li kʼusitik lek taje, xuʼ ta xkalbetik ta orasion li Diose.

Skʼan ta jchʼuntik ti ta xaʼibutik j-orasiontik li Jeovae. Pe maʼuk noʼox skʼan ta jkʼanbetik koltael, yuʼun skʼan ta xkalbetik koliyal noxtok. Li stuke chmuyubaj ti kʼalal ta xkalbetik li kʼusi oy ta koʼontontik ta melele xchiʼuk ti kʼalal ta jkʼanbetik li kʼusitik leke. Ta melel, ta me xakʼbutik li kʼusitik ta jkʼanbetike. ¿Mi cha chʼun taje?...