LI JESUSE okʼ ti kʼalal cham li Lázaro ti jaʼ yamigoe. Kʼalal laj yil svokol xchiʼuk icham li xNichʼone, ¿mi laj van yat yoʼonton xa naʼ li Jeovae?... Li Vivliae ta xal ti junantik kʼusitik chkʼot ta pasele tsyayijesbe yoʼonton xchiʼuk kʼux chaʼi li Diose (Salmo 78:40, 41; Juan 11:35).

¿Mi xnop avuʼun kʼu yelan toj kʼux laj yaʼi li Jeova ti kʼalal laj yil icham li xNichʼon ti skʼanoje?... Li Jesuse xchʼunoj ta melel ti muʼyuk bu chchʼayat ta sjol yuʼun li Diose. Jaʼ yuʼun, xi laj yal ti kʼalal yuʼun xa chchame: Tot, chkakʼ ta akʼob li jkuxlejale, xi (Lucas 23:46).

Li Jesuse xchʼunoj ta melel ti chchaʼkuxesat yuʼun li Diose, ti muʼyuk bu te ch-iktaat li ta mukinale. Kʼalal chaʼkuxiem xaʼox li Jesuse, li jtakbol Pabloe laj yal li kʼusi tsʼibabil ta Vivlia ta sventa li Mukʼta Jchanubtasvanej ti xi chale: «Muʼyuc ta xcom o ta muquinale, ti muʼyuc chotquin cʼu xʼelan cʼaʼele» (Hechos 2:31, Salmo 16:10). Li sbekʼtal Jesuse muʼyuk bu jal ikom li ta mukinale, jaʼ yuʼun, muʼyuk bu ikʼaʼ, jaʼ xkaltik, muʼyuk bu tsʼiʼlej mi jaʼuk sok yikʼ.

 Kʼalal kuxul toʼox ta Balumil li Jesuse, laj yalbe onoʼox ta melel li yajtsʼaklomtak ti muʼyuk bu jal chamem chkome. Laj yalanbe smelolal ti ta toʼox xlaj ta milel xchiʼuk ti ta yoxibal kʼakʼal ta xichʼ likesele (Lucas 9:22). Jech un chaʼa, muʼyuk me srasonal sventa labal chaʼiik ti chchaʼkuxi li Jesuse. Pe, ¿mi labal laj yaʼiik?... Jkʼeltikik.

Li Mukʼta Jchanubtasvaneje cham li ta jtel teʼ te van ta oxib ora ta bat kʼakʼal ta viernese. Li José ti jaʼ jun jkʼulej vinik ti oy yabtel ta Sanedrine, xchʼunoj ta stojolal li Jesuse, jaʼ noʼox ti ta mukule. Kʼalal laj yaʼi ti chamem xa li Jesuse, bat skʼel li Pilato ti jaʼ ajvalil ta Romae, la sjakʼbe mi xuʼ tsyalesbe sbekʼtal li Jesús ti jokʼol ta teʼe, yuʼun chbat smuk. Vaʼun laj yichʼ batel ta jun tsʼunubaltik ti bu oy jun mukinale.

Kʼalal la stikʼbe ta yut mukinal sbekʼtal li Jesuse, la xbalchʼun batel jun mukʼta ton sventa tsmakbe stiʼ li chʼene. Sta xa yoxibal kʼakʼal, domingo xa. Muʼyuk to bu lokʼem li Kʼakʼale, jech un chaʼa, ikʼ to osil. Junantik soltaroetik ti takbilik yuʼun li bankilal paleetike yakal xchabiik li mukinale. ¿Mi xa naʼ kʼu yuʼun?...

Li paleetike yaʼiojik ti laj yal Jesús ti ta xchaʼkuxie. Jaʼ yuʼun yakʼojik jchabivanejetik sventa mu xtal yelkʼanbeik sbekʼtal Jesús li yajtsʼaklomtake xchiʼuk chalik ti chaʼkuxiem xa li Jesuse. Pe jaʼ to laj yilike, lik nikuk li balumile, vinaj tal jun xojobal lus li ta ikʼal osile. ¡Jaʼ jun yaj-anjel Jeova! Li soltaroetike toj xiʼel ikʼotik tajmek yuʼun mi jaʼuk xuʼ xbakʼik. Li anjele bat li ta mukinale xchiʼuk la slokʼes li ton ti makal-o li stiʼile. ¡Xokol xa li mukinale!

Kʼot ta pasel li kʼusi laj yal ta mas tsʼakal li jtakbol Pedroe: Chaʼkuxesat yuʼun Dios li Jesuse, xi (Hechos 2:32). Li Diose la sutesbe xkuxlejal li Jesuse xchiʼuk laj yakʼbe jun sbekʼtal jech kʼuchaʼal toʼox kʼalal muʼyuk toʼox bu talem ta Balumile. La xchaʼkuxes xchiʼuk laj yakʼbe jun sbekʼtal jech kʼuchaʼal yuʼun li anjeletike (1 Pedro 3:18). Pe sventa xuʼ ta x-ilat yuʼun li krixchanoetike, skʼan tspas jun sbekʼtal jech kʼuchaʼal krixchano. ¿Mi la spas?... Jkʼeltikik.

 Yakal xa chlokʼ li Kʼakʼale. Batemik xa li soltaroetike, li María likem ta Magdala xchiʼuk li yan antsetik ti jaʼ yajtsʼaklomtak Jesuse, stamoj batel sbeik yoʼ bu oy li mukinale. Xi chalbe sbaike: ¿Buchʼu van ta xbalchʼunbutik lokʼel li ton ti toj ole?, xiik (Marcos 16:3). Pe kʼalal kʼotik li ta mukinale, laj yilik ti lokʼesbil xa li tone. ¡Xokol xa li mukinale! Muʼyuk xa bu te oy li sbekʼtal Jesuse. Li María likem ta Magdalae lokʼ batel ta anil sventa chbat yalbe li yajtsʼaklomtak Jesuse.

Li yan antsetike te komik li ta mukinale. Xi chloʼilaj yoʼontonike: ¿Bu van oy li sbekʼtal Jesuse?, xiik. Jaʼ to laj yilike, te vinaj chaʼvoʼ viniketik, xvikʼlajet xojobal skʼuʼ spokʼik. ¡Jaʼ anjeletik! Xi laj yalbeik li antsetike: ¿Kʼu yuʼun liʼ cha saʼik li Jesuse? Chaʼkuxiem xa. Batanik ta anil, bat albeik li yajtsʼaklomtake, xiik. ¡Nopo avaʼi kʼu to stsatsal anilajik! Te la snupik ta be jun vinik. ¿Mi xa naʼ buchʼu jaʼ?...

Jaʼ li Jesuse, yichʼoj sbekʼtal kʼuchaʼal krixchano. Xi albatike: Bat albeik li kajtsʼaklomtake, x-utatik. Li antsetike xmuyubajik tajmek. Kʼalal kʼotik yoʼ bu oy li jtsʼaklometike, xi laj yalike: ¡Kuxul li Jesuse! ¡Laj xa kilkutik!, xiik. Li María likem ta Magdalae yalojbe xa onoʼox li Pedro xchiʼuk Juan ti xokol xa li mukinale. Tana un, batem skʼelik li mukinale, jech kʼuchaʼal chavil li ta lokʼole. Li Pedro xchiʼuk li Juane lokʼel tskʼelik li pokʼ pasbil ta lino ti bu pixil toʼox-o li Jesuse, mu snaʼik kʼusi tsnopik. Tskʼan chchʼunik ti yuʼun kuxiem xa yan velta li Jesuse, pe toj echʼ noʼox lek chaʼiik yaʼeluk, jaʼ yuʼun mu xchʼunik.

Ta domingo noʼoxe, ta tsʼakal jutuke, li Jesuse laj yakʼ sba ta ilel ta stojolal chaʼvoʼ yajtsʼaklomtak ti stamoj batel sbeik ta sbelel bikʼit lum Emause. Manchuk mi chchiʼinan batel ta xanbal xchiʼuk chchiʼinan ta loʼil li Jesuse, mu x-ojtikinat, yuʼun mu jaʼuk li sbekʼtal ti yichʼoj onoʼox ta baʼyele. Pe te une iveʼik, kʼalal la spas orasion li Jesuse, jaʼ to ojtikinat un. Li jtsʼaklometike imuyubajik tajmek, jech un chaʼa ta anil noʼox isutik li ta Jerusalén ti ep kilometro snamal yiloje. Oyikʼal van ta mas xa bat kʼakʼal jutuk ti kʼalal laj yakʼ sba ta ilel ta stojolal li Pedroe.

 Ta akʼobale, te stsoboj sbaik ep yajtsʼaklomtak ta jun kuarto ti makal stiʼile, jaʼ to laj yilike, te ivinaj ta oʼlol li Jesuse. Tana un jaʼ to la xchʼunik ta melel ti kuxul xa yan velta li Mukʼta Jchanubtasvaneje. ¡Nopo avaʼi kʼu to yelan chmuyubajik tajmek! (Mateo 28:1-15; Lucas 24:1-49; Juan 19:38-20:21.)

Li Jesuse 40 kʼakʼal laj yakʼ sba ta ilel ta stojolal li yajtsʼaklomtake, jelajtik sbekʼtal laj yakʼ sba ta ilel sventa chakʼ ta ilel ti kuxule. Tsʼakal ne, laj yikta li Balumile, sut batel ta vinajel te yoʼ bu oy li sTote (Hechos 1:9-11). Li yajtsʼaklomtake ta anil noʼox lik yalbeik skotol krixchanoetik ti chaʼkuxesat yuʼun Dios li Jesuse. Manchuk mi chtakatik ta majel xchiʼuk junantik chtakatik ta milel yuʼun li paleetike, li  stukike muʼyuk bu laj yikta sbaik ta xcholel li mantale. Snaʼojik ti mi chamike, chvulesatik ta sjol yuʼun li Diose, jech kʼuchaʼal vul ta sjol li xNichʼone.

¡Toj echʼ noʼox jelelik li baʼyel yajtsʼaklomtak Jesús ta stojolal li krixchanoetik avie! Ta junantik mukʼtik lumetike, jutuk mu skotoluk li krixchanoetike jaʼ noʼox tsnopik ta sventa tʼuletik xchiʼuk bonbil ton alakʼ sventa li Kʼin Kuxel kʼalal chkʼot yorail ta jabil ti chaʼkuxi li Jesuse. Pe li Vivliae muʼyuk bu chalbe smelolal tʼuletik mi jaʼuk ton alakʼ sventa Kʼin kuxel. Li kʼusi chalbutike jaʼ ti tunukutik ta stojolal li Diose.

Li voʼotike xuʼ jechutik kʼuchaʼal li yajtsʼaklomtak Jesús mi chkalbetik li krixchanoetik ti toj alakʼ sba ti la xchaʼkuxes xNichʼon li Diose. Skʼan mu xi jxiʼutik, manchuk mi chalbutik ti chi smilutik li krixchanoetike. Mi li jchamutike, ta svulesutik ta sjol li Diose, maʼuk noʼox taje yuʼun xuʼ ta xchaʼkuxesutik, jech kʼuchaʼal la xchaʼkuxes li Jesuse.

¿Mi mu meleluk ti chi jmuyubajutik ti ta jnaʼtik ti tsvules ta sjol xchiʼuk ti chchaʼkuxes li yajtuneltak li Diose?... Kʼalal ta jchantik li kʼusitik taje, jaʼ chi stijbutik koʼontontik sventa ta jkʼan ta jnaʼtik kʼu yelan xuʼ ta xmuyubaj kuʼuntik li Diose. ¿Mi anaʼoj xaʼox ti xuʼ chmuyubaj kuʼuntik li Diose?... Taje jaʼ li kʼusi ta jchantik li ta yan kapituloe.