¿MI KʼUN chavaʼi ti cha tun ta stojolal Jeovae?... Li Mukʼta Jchanubtasvaneje muʼyuk bu laj yal mi kʼun. Kʼalal jun xaʼox akʼobal skʼan xchame, xi laj yalbe li yajtakboltake: «Me chopol chayiloxuc li cristianoetique, naʼic me ti baʼyuc jech chopol laj yilicune», xi (Juan 15:18).

Li Pedroe tsots yoʼonton laj yal ti muʼyuk ta xikta li Jesuse. Pe, li Jesuse laj yal ti ta akʼobal taje li Pedroe oxib velta ta xal ti mu xojtikin li Jesuse. Taje jaʼ jech tajmek ikʼot ta pasel (Mateo 26:31-35, 69-75). ¿Kʼuxi xa noʼox ikʼot ta pasel taje?... Jaʼ jech ikʼot ta pasel yuʼun ixiʼik li Pedro xchiʼuk li yan jtakboletike.

¿Mi xa naʼ kʼu yuʼun ixiʼik?... Yuʼun oy kʼusi muʼyuk la spasik ti toj tsots skʼoplale. Mi ta jsabetik smelolal kʼusi jaʼe, xuʼ chi jtunutik ta stojolal li Jeovae, manchuk mi kʼusuk chalik o tspasik li yantike. Baʼyel jkʼeltik li kʼusi kʼot ta pasel ta slajeb akʼobal ti te oy xchiʼuk yajtakboltak li Jesuse.

Ta baʼyele, koʼol la spasik li kʼin Koltaele, ti jaʼ toʼox jun veʼel ta bat kʼakʼal ti toj tsots skʼoplal chichʼ pasel jun velta ta jabile. Taje jaʼ sventa chvulesbatik ta sjolik yuʼun Dios ti koltaatik ta mosoil li ta Egipto li judioetike. Te une, li Jesuse la slikes xchiʼuk yajtakboltak yan veʼel ta bat kʼakʼal ti tsots skʼoplale. Ta yan kapituloetike ta jkʼeltik kʼuyelan ta skoltautik ta svulesel ta joltik Jesús li veʼel taje. Kʼalal laj yoʼontonik ta veʼele, li Jesuse laj yal jaypʼeluk kʼop sventa tstsatsubtasbe yoʼonton li yajtakboltake, vaʼun laj yikʼan batel ta nichimaltik Getsemaní, ti jaʼ onoʼox ti bu toj lek chaʼiik sventa tstsob sbaike.

Kʼalal ikʼotik li ta nichimaltike, li Jesuse la xchʼak sba batel stuk  sventa tspas orasion. Laj yalbe ek li Pedro, li Santiago xchiʼuk li Juan ti akʼo spasik orasione, pe li stukike och svayelik. Oxib velta la xchʼak sba batel sventa tspas orasion li Jesuse, kʼalal jujun velta tsut tale, vayal chkʼot sta li Pedro xchiʼuk li yantike (Mateo 26:36-47). ¿Mi xa naʼ kʼu yuʼun skʼan julavemikuk sventa spasik orasion ti jechuke?... Ta jkʼelbetik srasonal.

Li Judas Iscariotee la xchiʼin ta spasel kʼin Koltael li Jesús xchiʼuk li yajtakboltak li ta akʼobal taje. Oyikʼal van xvul ta ajol ti ipas ta j-elekʼ li Judase, pe maʼuk noʼox taje, yuʼun ikʼataj ta jvalopatinvanej xtok. Li stuke snaʼoj lek bu jotukal tstsob sbaik li Jesús xchiʼuk li yajtakboltak ta nichimaltik Getsemanie. Jech un chaʼa, te laj yikʼ batel li soltaroetik sventa tstsakik li Mukʼta Jchanubtasvaneje. Kʼalal laj yil li Jesuse, xi la sjakʼe: «¿Bochʼo chasaʼic?», xi.

Li soltaroetike xi la stakʼike: «Jaʼ ta jsaʼcutic li Jesus[e]», xiik. Li stuke muʼyuk bu ixiʼ, jech un chaʼa, xi la stakʼe: «Jaʼ vuʼun», xi. Li soltaroetike toj labal laj yaʼiik li stsatsal yoʼonton Jesuse, ta valapat ibatik xchiʼuk iyalik ta lum. Te une, li Jesuse xi laj yale: Mi voʼon noʼox ti cha saʼikune, akʼik batuk li kajtakboltake, xi (Juan 18:1-9).

Kʼalal la stsakik xchiʼuk la xchukbeik skʼob Jesús li soltaroetike, li jtakboletike ixiʼik xchiʼuk ijatavik batel. Pe li Pedro xchiʼuk li Juane tskʼan tsnaʼik kʼusi chkʼot ta stojolal li Jesuse, jech oxal chaʼa ta nom noʼox tijilik batel. Ta slajeb ne, li Jesuse laj yichʼ ikʼel batel ta sna Caifás, ti jaʼ li mero bankilal palee. Li Juane xojtikin li mero bankilal palee, jech un chaʼa, li ants ti chchabi tiʼnae laj yakʼ ochuk li Juan xchiʼuk li Pedroe.

Li paleetike stsoboj xaʼox sbaik ta sna li Caifás sventa chchapanbeik skʼoplal li Jesuse. Tskʼan tsmilik li Jesuse, vaʼun chaʼa laj yikʼik tal rextikoetik sventa chalik kʼusitik mu meleluk ta stojolal li Jesuse. Jech xtok, li krixchanoetike xmichʼoj skʼobik lik yakʼbeik majel xchiʼuk la xtʼaxbeik ta majel xokon sat. Kʼalal yakal chkʼot ta pasel taje, li Pedroe te noʼox nopol oy.

 Jun tsebal kiara ti jaʼ buchʼu laj yakʼ ochikuk li Pedro xchiʼuk li Juane, la skʼel lek li Pedroe xchiʼuk xi laj yale: Li voʼote te toʼox oyot ek xchiʼuk li Jesuse, xi. Pe li stuke la stakʼ ti mu xojtikine. Mu jaluk ne, ojtikinat yuʼun yan tseb li Pedroe, xi laj yalbe li buchʼutik te oyike: «Leʼe jaʼ xchiʼil li Jesus[e]», xi. Pe li Pedroe la xchaʼal ti mu meleluke. Ta mas tsʼakal jutuke, ilat yuʼun jayvoʼ krixchanoetik xchiʼuk xi albate: «Ta melel, jaʼ onoʼox achiʼil li Jesuse», x-utat. Li Pedroe la xchaʼal ta yoxibal xa velta ti mu xojtikin ti kʼalal xi laj yale: «Mu xcotquin li vinic chavalique», kʼalal xie. Laj yal ti melel la tajmek li kʼusi laj yale. Kʼalal jaʼo laj yale, ijoypʼij li Jesuse, la skʼel li Pedroe (Mateo 26:57-75; Lucas 22:54-62; Juan 18:15-27).

¿Mi xa naʼ kʼu yuʼun la sjut kʼop li Pedroe?... Yuʼun ixiʼ. Pe ¿kʼu yuʼun ixiʼ? ¿Mi yuʼun van oy kʼusi muʼyuk la spas ti xuʼ toʼox ta x-akʼbat stsatsal yoʼontone? Nopo avaʼi liʼe: ¿kʼusi la spas sventa mu xiʼ li Jesuse?... La skʼopon Dios, vaʼun koltaat sventa oyuk stsatsal yoʼonton. Vuleso ta ajol xtok ti Jesuse oxib velta laj yalbe li Pedro ti akʼo julavemuk xchiʼuk ti vikʼiluk sate. Pe ¿kʼusi kʼot ta pasel?...

Li Pedroe vayal ikom yoxibal velta. Muʼyuk bu la skʼopon Dios mi jaʼuk vikʼil sat ikom. Jaʼ yuʼun, kʼalal la xchukik li Jesuse chʼayem  yoʼonton kʼot taatuk. Kʼalal yakal xchapbeik skʼoplal li Jesuse, li Pedroe ixiʼ ti kʼalal laj yil la smajik xchiʼuk la xchapbeik skʼoplal sventa tsmilik li Jesuse. Pe kʼalal te to van jayibuk ora skʼan xkʼot ta pasel taje, ¿kʼusi albatik yuʼun Jesús ta sventa ti kʼuyelan ta x-ilatik yuʼun li balumile?... Laj yal onoʼox ti ta xpʼajatik yuʼun li balumil, jech kʼuchaʼal ipʼajat li stuke.

Jnoptik kʼusi xuʼ xkʼot ta jtojolaltik jech kʼuchaʼal ikʼot ta stojolal li Pedroe. Nopo ti oyot ta chanune, vaʼun li yantike chlik slabanik li buchʼutik muʼyuk bu tspasik saludar li bandera xchiʼuk muʼyuk bu tspasbeik skʼinal sVokʼel Ninyoe. Te une oy buchʼu chjoypʼij cha skʼelot xchiʼuk xi cha sjakʼbote: «¿Mi melel ti muʼyuk bu cha pas saludar bandera li voʼote?». O xuʼ van xi cha yalboxuke: «Yalojbunkutik  ti mi jaʼuk cha pasbe li skʼinal sVokʼel Ninyoe». ¿Mi cha xiʼ van ta yalel li kʼusi melele?... ¿Mi xtal van ta ajol cha jutkʼop jech kʼuchaʼal la spas li Pedroe?...

Ta tsʼakale li Pedroe laj yat tajmek yoʼonton ti laj yal mu xojtikin li Jesuse. Kʼalal laj yakʼ venta li kʼusi la spase, ilokʼ batel ta pana xchiʼuk laj yokʼita sba. Jaʼ jech ta melel, li stuke la sutes yoʼonton xchiʼuk ichaʼlik kʼuchaʼal yajtsʼaklom Jesús (Lucas 22:32). Vaʼun chaʼa, ¿kʼusi van tskoltautik xa naʼ sventa mu xi jxiʼutik tajmek xchiʼuk chkaltik kʼusitik jech kʼuchaʼal la spas li Pedroe?... Vuleso ta ajol ti stuke muʼyuk bu la spas orasion mi jaʼuk la svikʼ sat. Jech un chaʼa, ¿kʼusi van chaval skʼan ta jpastik sventa jaʼutik yajtsʼaklom li Mukʼta Jchanubtasvaneje?...

Ta melel, skʼan ta jkʼopontik ta orasion li Jeova sventa ta jkʼanbetik koltael. Kʼalal la spas orasion li Jesuse, ¿mi xa naʼ kʼusi la spas li Dios ta stojolale?... La stak tal jun anjel sventa chakʼbe stsatsal yoʼonton (Lucas 22:43). ¿Mi xuʼ tskoltautik li yaj-anjeltak Dios li voʼotike?... Li Vivliae xi ta xale: «Li jʼalmantal yuʼun Mucʼul Diose te setel ta spat xocon li bochʼotic jaʼ yichʼojic o ta mucʼ Mucʼul Diose, yuʼun ta scoltaic», xi (Salmo 34:7). Pe sventa ta jtatik li koltael yuʼun Diose, mu baluk noʼox ti ta jkʼantik ta orasione. ¿Mi xa naʼ kʼusi mas skʼan pasel?... Li Jesuse laj yalbe li yajtsʼaklomtak ti akʼo julavemikuk xchiʼuk ti vikʼiluk satike. ¿Kʼuxi van xuʼ jpastik xa naʼ?...

Skʼan ta jchikintatik lek li kʼusitik chichʼ alel ta tsobajeletik xchiʼuk li kʼusitik ta jkʼeltik ta Vivliae. Jech xtok, skʼan nopolik ta jkʼopontik li Jeovae xchiʼuk ta jkʼanbetik ti akʼo skoltautik sventa jaʼ yajtunelukutike. Mi jech ta jpastike, ta xakʼbutik koltael ti kʼu yepal chtun kuʼuntik sventa ta jtsaltik li xiʼele. Vaʼun ta me xi jmuyubajutik ti kʼalal chi jkʼopojutik ta sventa li Mukʼta Jchanubtasvanej xchiʼuk sTot kʼalal oy buchʼu ta jkʼopontike.