MAS xa ta chaʼmil jabil, ivokʼ jun olol ti mu buchʼu xkoʼolaj-o xchiʼuke, kʼalaluk ichʼie pas ta jun vinik ti jaʼ mas ojtikinbil ta skotol kʼakʼaletike. Ta skʼakʼalil taje muʼyuk buchʼu oy s-avion mi jaʼuk skaro, chʼabal komputadora, television mi jaʼuk Internet.

Li olole, Jesús laj yakʼbeik sbi, xchiʼuk pas ta jun vinik ti jaʼ mas pʼij ta skotol krixchanoetik ti kuxiemik ta Balumile. Jech noxtok jaʼ li mas lek jchanubtasvanej echʼe, yuʼun kʼun ta aʼibel smelolal laj yal li kʼusitik tsots ta aʼyele.

Li Jesuse buyuk noʼox la xchanubtas li krixchanoetike: ta tiʼ nab, ta kanoa, ta naetik xchiʼuk kʼalaluk xanav ta bebetike. Li Jesuse muʼyuk skaro, muʼyuk ixanav ta tren mi jaʼuk ta autovus. Li Jesuse ta yok ixanav ta buyuk noʼox sventa chchanubtas li krixchanoetike.

Toj ep kʼusitik ta jchanbetik li yan krixchanoetike, pe li kʼusitik mas tsots skʼoplale jaʼ ta jchantik ta stojolal li Mukʼta Jchanubtasvanej Jesuse. Kʼalal ta jkʼelbetik li skʼop ta Vivliae, xkoʼolaj kʼuchaʼal yakal chi skʼoponutik yaʼeluk.

¿Kʼu yuʼun jaʼ toʼox jun lekil jchanubtasvanej li Jesuse? Jtos srasonale jaʼ ti oy buchʼu chanubtasat eke. Jech xtok, li Jesuse snaʼoj ti toj tsots skʼoplal ti chkaʼitike. Pe ¿buchʼu toʼox chaʼibe? ¿Buchʼu chanubtasat?... Jaʼ li sTote, li sTot Jesuse jaʼ li Diose.

Kʼalal muʼyuk toʼox talem ta Balumil li Jesuse, te toʼox kuxul xchiʼuk Dios ta vinajel. Jaʼ yuʼun mu xkoʼolaj xchiʼuk li yan viniketike, yuʼun jaʼ noʼox stuk kuxiem ta vinajel kʼalal muʼyuk toʼox ayanem ta  Balumile. Te ta vinajele, jaʼ jun lekil nichʼonil ti ta xaʼibe li sTote. Jech oxal chaʼa, ijuʼ yuʼun xchanubtasel li krixchanoetik li kʼusitik la xchan ta stojolal li Diose. Mi chavaʼibe li atot ameʼe, yakal me xa chanbe stalelal li Jesuse.

Yan srasonal ti jaʼ toʼox jun mukʼta jchanubtasvanej li Jesuse jaʼ: yuʼun skʼanoj li krixchanoetike xchiʼuk tskʼan tskolta ta xchanel ta sventa li Diose. Li Jesuse maʼuk noʼox skʼanoj li mukʼtik krixchanoetike, yuʼun skʼanoj ek li ololetike. Li ololetike lek chaʼiik ti te oyik xchiʼukik li Jesuse, yuʼun ta xchiʼinatik ta loʼil xchiʼuk ch-aʼibat li skʼopike.

Jun kʼakʼale, junantik totil-meʼiletike laj yikʼik batel yalab xnichʼnabik ta stojolal li Jesuse. Pe li yamigotak Mukʼta Jchanubtasvaneje la snopik ti muʼyuk xokol sventa chloʼilaj xchiʼuk li ololetike, vaʼun laj yalbeik ti akʼo batikuke. ¿Kʼusi la spas li Jesuse?... Xi laj yalbe li yamigotake: «Acʼo talicuc ta jtojol li ololetique; mu me xa pajesic», xi. Jech ta melel, li Jesuse tskʼan ti akʼo xnopajik ta stojolal li ololetike. Akʼo mi jaʼ toʼox jun vinik toj pʼij xchiʼuk tsots skʼoplal, la xchʼak  skʼakʼal sventa chchanubtasan (Marcos 10:13, 14).

¿Mi xa naʼ kʼu yuʼun la xchanubtas xchiʼuk laj yaʼibe skʼop ololetik li Jesuse? Jun srasonale, jaʼ ti tskʼan akʼo xmuyubajike, jaʼ yuʼun la xchiʼinan ta loʼil ta sventa Dios, li sTot ta vinajele. ¿Kʼuxi xuʼ xavakʼ muyubajuk yan krixchanoetik li voʼote?... Jaʼo kʼalal chavalbe li kʼusitik achanoj ta sventa li Diose.

Jun veltae, li Jesuse la stunes jun olol sventa chakʼbe xchanik jun xchanobil tsots skʼoplal li Yamigotake. Laj yikʼ tal li olole xchiʼuk laj yakʼ ta oʼlol yajtsʼaklomtak. Vaʼun laj yalanbe ti akʼo mi mukʼtik krixchanoetik xae, skʼan ta sjel stalelalik sventa jechikuk kʼuchaʼal li olol taje.

¿Kʼusi la skʼan laj yal Jesús ta sventa taje? ¿Mi xa naʼ kʼuxi xuʼ jechik kʼuchaʼal jun olol li mukʼta krixchano xchiʼuk li jun kereme?... Veno, jun olole mu toj epuk kʼusitik snaʼ jech kʼuchaʼal jun mukʼta krixchanoe, jech oxal chaʼa skʼan ta xchan. Vaʼun chaʼa, li kʼusi la skʼan laj yal li Jesuse jaʼ ti skʼan akʼo bikʼituk xaʼi sbaik li yajtsʼaklomtake, jech kʼuchaʼal li ololetike. Ta melel ep kʼusitik xuʼ jchanbetik li yan krixchanoetike. Jech xtok skʼan chkaʼibetik smelolal ti jaʼ mas tsots skʼoplal li chanubtaseletik yuʼun Jesuse, maʼuk li jnopben jtuktike (Mateo 18:1-5).

Yan srasonal ti jaʼ toʼox jun lekil jchanubtasvanej li Jesuse jaʼ ti lek chaʼiik li yantik krixchanoetik li kʼusitik chale, yuʼun li kʼusitik chanubtasvane kʼun xchiʼuk lek jamal smelolal laj yal. Iloʼilaj ta sventa mutetik, nichimetik xchiʼuk yan kʼusitik  xojtikinik li krixchanoetik sventa tskolta ta xchanel mas ta sventa li Diose.

Jun veltae, kʼalaluk te oy ta xchʼut vits li Jesuse, tal kʼelatuk yuʼun epal krixchanoetik. Jech kʼuchaʼal cha kʼel li ta lokʼole, li Jesuse ichoti xchiʼuk laj yal jun loʼil mantal. Li loʼil mantal taje ojtikinbil kʼuchaʼal Mantaletik ta Vits. Xi laj yale: Kʼelik li mutetik ta vinajele. Muʼyuk bu ch-ovolajik. Muʼyuk snail sveʼelik. Pe li Dios ta vinajele ta smakʼlin. ¿Mi mu jaʼuk mas ep abalilik li voʼoxuke?, xi.

Jech to laj yal xtok: Chanbeik li nichimetike. Mu vokoluk chchʼi. Pe kʼelavilik toj kʼupil sbaik. Mi jaʼuk jech slekil skʼuʼ la slap li jkʼulej ajvalil Salomón jech kʼuchaʼal li nichimetike. Jech un chaʼa, mi jech ta xchabi li nichimetik li Diose, ¿mi mu jechuk van cha xchabioxuk ek li voʼoxuke?, xi (Mateo 6:25-33).

 ¿Mi xavaʼibe smelolal kʼusi ti yakal xakʼ ta chanel li Jesuse?... Li stuke mu skʼan ti chkat koʼontontik ta sventa ti kʼusi ta jlajestik xchiʼuk kʼusi ta jlaptike. Li Diose snaʼoj ti chtun kuʼuntik skotol li kʼusitik taje. Li Jesuse muʼyuk la skʼan laj yal ti mu xi j-abtejutik sventa ta jta jveʼeltik xchiʼuk jkʼuʼ jpokʼtike. Moʼoj, li kʼusi la skʼan laj yale jaʼ ti akʼo xkakʼtik ta baʼyel ta jkuxlejaltik li Diose. Mi jech ta jpastike, li Diose ta me xakʼbutik li kʼusitik chtun kuʼuntike. ¿Mi xa chʼun ti jech  chkʼot ta pasele?...

Kʼalal laj yoʼonton ta loʼil li Jesuse, ¿kʼusi la snopik li buchʼutik te oyike?... Li Vivliae ta xal ti toj chʼayem ikom yoʼontonik ti kʼux-elan chchanubtasvane. Tskʼan tajek chaʼibeik li sloʼile. Li kʼusitik laj yale la skolta li krixchanoetik ta spasel li kʼusitik leke (Mateo 7:28).

Jech oxal chaʼa, toj tsots skʼoplal ti ta jchanbetik li Jesuse. ¿Mi xa naʼ kʼu yelan ta pasel?... Veno, li kʼusitik laj yale te tsʼibabil ta jlik livro. ¿Kʼusi livroal taje?... Jaʼ li Chʼul Vivliae. Xuʼ ta xkaʼibetik li Jesús mi ta jchikintatik lek li kʼusitik ta jkʼeltik ta Vivliae. Jech onoʼox ta melel, oy jun kʼupil sba loʼil ta Vivlia ti chalbutik kʼuxi la skʼan Dios ti akʼo xkaʼibetik li Jesuse. Jkʼeltik kʼusi kʼot ta pasel.

Jun kʼakʼale, li Jesuse imuy batel ta jun vits xchiʼuk oxib yamigotak. Jaʼ li Pedroe, li Santiagoe xchiʼuk li Juane. Ta yan kapituloetik ta jchantik ta sventa li oxib viniketik liʼe, yuʼun jaʼ yamigotak ti toj echʼ noʼox lek xil sbaik xchiʼuk li Jesuse. Pe jech kʼuchaʼal chavil li ta lokʼole, li tsots skʼoplal skʼakʼalil taje li sat Jesuse lik xojobajuk tajmek, li skʼuʼ spokʼtake ixojobaj ta jyalel kʼuchaʼal lus.

Vaʼun, li Jesús xchiʼuk li yamigotake laj yaʼiik jun yechʼomal eil ta vinajel ti xi chale: «Liʼi jaʼ jnichʼon, lec jcʼanoj. Lec jpatoj coʼnton yuʼun. Aʼibeic scʼop», xi (Mateo 17:1-5). ¿Mi xa naʼ buchʼu yechʼomal ye taje?... Jaʼ yechʼomal ye li Diose. Jech, jaʼ li Dios buchʼu laj yal ti akʼo xaʼibeik skʼop li xNichʼone.

¿Kʼusi ta jpastik li voʼotike? ¿Mi ta jchʼunbetik smantal Dios xchiʼuk ta xkaʼibetik li xNichʼon, ti jaʼ li Mukʼta Jchanubtasvaneje?... Taje jaʼ li kʼusi skʼan ta jpastik jkotoltike. ¿Mi xa naʼ kʼuxi ta pasel?...

Jech, jtos kʼuyelan chkaʼibetik li xNichʼon Diose jaʼ ti kʼalal ta jkʼeltik ta Vivlia li sloʼilal xkuxlejale. Oy ep kʼusitik alakʼ sba skʼan chi yalbutik li Mukʼta Jchanubtasvaneje, xchiʼuk te tsʼibabilik ta Vivlia. Cha kʼupin xchanel li kʼusitik liʼe, jech xtok cha muyubaj mi chavalbe li avamigotake.