NOPO ti yakal cha bat ta jun barko ti yakal xmuk yalel ta voʼe. ¿Mi cha kʼan van ti oy buchʼu cha skoltaote?... ¿Ati tauk xakʼ xkuxlejal sventa cha skoltaot li krixchanoe?... Taje jaʼ ti kʼusi la spas li Jesucristoe. Jech kʼuchaʼal la jchantik ta kapitulo 37, li stuke laj yakʼ xkuxlejal kʼuchaʼal pojelal sventa tskoltautik.

Veno, li Jesuse muʼyuk bu chi spojutik ti yuʼun yakal chi jikʼavutik ta melele. ¿Mi xvul to ta ajol ta kʼusi ti chi spojutik-oe?... Jaʼ li ta mulil xchiʼuk ta lajelal ti jkuchojbetik li Adane. Manchuk mi spasojik kʼusitik toj chopol li junantik krixchanoetike, li Jesuse cham ta skojik ek. ¿Mi ta van xavakʼ ta vokol akuxlejal sventa cha kolta krixchanoetik kʼuchaʼalik taje?...

Li Vivliae xi ta xale: «Li bochʼo jaʼ noʼox tucʼ yoʼntone, muʼyuc van bochʼo chacʼ sba ta milel ta scoj. Jaʼ to me oy jun vinic ti toj lec cʼusitic spasoje, oy van yicʼal oy bochʼo chacʼ sba ta milel ta scoj», xi. Pe li Vivlia xtoke ta xalbe smelolal ti Jesuse icham ta skoj «chopol» krixchanoetik, krixchanoetik ti mi jaʼuk chtunik ta stojolal li Diose. Li Vivliae ta xal to xtok ti «acʼo me solel yuxub jpasmulilutic», jaʼ xkaltik, ti kʼalal ta jpastik toʼox li kʼusitik chopole, «icham ta jcojtic li Cristoe» (Romanos 5:6-8).

¿Mi xvul to ta ajol buchʼu ti la spas kʼusitik toj chopol kʼalal maʼuk toʼox jtakbole?... Jaʼ li buchʼu xi la stsʼibae: «Li Jesucristoe iʼay ta banamil, ay scolta jpasmuliletic. Vuʼune echʼem la jsaʼ li jmule, jaʼ mu sta jech li yantique», xi. Li krixchano taje jaʼ li jtakbol Pabloe. Li stuke laj yal ti jun kʼakʼale, jaʼ toʼox bol vinik xchiʼuk jaʼ toʼox batem yoʼonton ta spasel li kʼusitik chopole (1 Timoteo 1:15; Tito 3:3).

 Nopo avaʼi kʼu to yepal laj yakʼ ta ilel skʼanel Dios ti kʼalal la stak talel xNichʼon sventa akʼo chamuk ta skoj krixchanoetik ti toj chopolike. Avokoluk, tsako li aVivliae xchiʼuk kʼelo li kʼusi chal Juan, kapitulo 3, versikulo 16: «Toj ep la xcʼuxubin scotol cristianoetic ta banamil li Diose, jech laj yacʼ li jun noʼox Xnichʼon oye, yuʼun jech mu chʼayeluc chbat li bochʼotic ta xchʼunic ti jaʼ Jcoltavanej yuʼunique, jaʼ ta xcuxiic o sbatel osil», xi.

Li Jesuse laj yakʼbutik ta ilel ti toj ep skʼanojutik jech kʼuchaʼal li sTote. Oyikʼal van xvul to ta ajol ti ta kapitulo 30 yuʼun li livro liʼe, la jkʼeltik ti kʼusitik vokolil laj yil li ta akʼobal kʼalal la stsakike. Baʼyel laj yikʼik batel ta sna li mero bankilal pale Caifase, te yoʼ bu la xchapanike. Laj yikʼik tal jecheʼ rextikoetik ti la sjutbeik skʼoplale, li krixchanoetike xmichʼoj skʼobik laj yakʼbeik majel. Vaʼun jaʼo laj yal Pedro ti mu xojtikin li Jesuse. Tana un nopo ti te oyutike xchiʼuk ti ta xkiltik li kʼusi chkʼot ta pasel ta tsʼakale.

Sakub xa osil. Li Jesuse julavem sjunul akʼobal. Ta skoj ti yuʼun maʼuk lekil chapanel ti la spasik ta akʼobale, li paleetike ta anil noʼox la stsobik li Sanedrine, li nail chapanobbail yuʼun judioetike, yuʼun chchaʼchapanik yan velta. Li ta chapanel taje ta xchaʼtikʼbeik smul li Jesuse, yuʼun la chchopol kʼopta li Diose.

Te une, li paleetike laj yalik mantal ti akʼo xchukik li Jesuse xchiʼuk akʼo yikʼik batel ta stojolal li Pilatoe, li ajvalil ta Romae. Xi ta xalbeike: Li Jesuse skontrainoj li ajvalile. Akʼo xcham, xiik. Pe li Pilatoe ta xakʼ venta ti tsjutik kʼop li paleetike, jech oxal xi la stakʼe: Li voʼone muʼyuk bu jtaoj mi oy kʼusi chopol spasoj li vinik liʼe. Ta jkolta batel, xi. Vaʼun li paleetik xchiʼuk li yantik krixchanoetike xi ta xalike: ¡Moʼoj, milo!, xiik.

Ta mas tsʼakale, li Pilatoe la xchaʼalbe li krixchanoetik ti tskolta batel li Jesuse. Pe li paleetike laj yakʼik akʼo xi x-avanik li krixchanoetike: Mi cha kolta batele, li voʼote oyot ta skontra ek li ajvalile. ¡Milo! Xi to mas ta x-avanik li krixchanoetike. ¿Mi xa naʼ kʼusi la spas li Pilatoe?...

 Laj yakʼ ti akʼo spasik li kʼusi tskʼan yoʼontonike. Baʼyel laj yal mantal ti akʼo sjisik ta nukul li Jesuse, te une laj yakʼ ta skʼob li soltaroetike yuʼun akʼo smilik. Li soltaroetike laj yakʼbeik slap jun korona ti pasbil ta chʼixe, la snijan sbaik ta stojolal sventa tslabanik. Tsʼakal ne laj yakʼbeik yichʼ batel jtel teʼ sventa chakʼ svokol yichʼel batel kʼalal to ta jun osil ti jaʼ sbi Bakil Jolale, ti te oy ta spat jteklume. Te la sbajbeik ta laux skʼob xchiʼuk yok ta jtel teʼ, vaʼun la svaʼanik li teʼe, yuʼun sventa jokʼol komuk li Jesuse. Chlokʼ tajmek xchʼichʼel li syayijemaltake, toj kʼux chaʼi ta jyalel.

Pe muʼyuk bu cham ta ora li Jesuse. Baʼyel jal laj yil svokol ti te jokʼol ta teʼe. Yoʼ to jech taje, li bankilal paleetike la snaʼleik, li krixchanoetik ti te ch-echʼike xi ch-avanike: «Colta aba atuc me ta melel voʼot  Xnichʼonot li Diose, yalan» li ta teʼe, xiik. Pe li Jesuse snaʼoj ti oy stu ti takbil tal yuʼun sTote: jaʼ ti ta xakʼ stukʼil kuxlejal sventa xuʼ chi jkuxiutik sbatel osile. Ta slajeb ne, te van ta oxib ora ta bat kʼakʼale, tsots la skʼopon sTot li Jesuse, vaʼun icham (Mateo 26:36–27:50; Marcos 15:1; Lucas 22:39–23:46; Juan 18:1–19:30).

¡Mu xkoʼolajik tajmek li Jesús xchiʼuk li Adane! Li Adane muʼyuk bu laj yakʼ ta ilel mi skʼanoj li Diose, yuʼun muʼyuk bu la xchʼunbe smantal. Mi jaʼuk laj yakʼ ta ilel mi skʼanoj li krixchanoetike, yuʼun jaʼ ta skoj smul ti jmulavil krixchanoutik chi j-ayanutike. Pe li Jesuse laj yakʼ ta ilel ti skʼanoj li Diose xchiʼuk li krixchanoetike. Li stuke jaʼ onoʼox la xchʼunbe smantal li Diose xchiʼuk laj yakʼ xkuxlejal sventa tsmeltsan skotol li vokolil ti laj yiktabutik komel li Adane.

¿Mi xavakʼ venta kʼu yelan toj kʼupil sba li kʼusi la spas li Jesuse?... Kʼalal cha kʼopon li Diose, ¿mi cha tojbe ta vokol ta skoj ti la stak talel xNichʼone?... Li jtakbol Pabloe la stoj ta vokol li kʼusi la spas li Cristoe. Li stuke laj yal ti kʼanat xchiʼuk laj yakʼ sba ta stojolal li xNichʼon Diose (Gálatas 2:20). Jech xtok, li Jesuse icham ta jkoj xchiʼuk ta akoj ek. Laj yakʼ stukʼil kuxlejal sventa akʼo xi jkuxiutik sbatel osil. Ta melel, jaʼ jun lekil srasonal sventa ta jkʼantik li Jesuse.

Li jtakbol Pabloe xi la stsʼibabe li yajtsʼaklomtak Cristo ta steklumal Corintoe: «Jaʼ sujbiluncutic yuʼun syail xcʼuxul yoʼnton ti Cristo[e]», xi. ¿Kʼusi van ta sujutik-o xa naʼ?... Kʼelo kʼuxi tstakʼ li Pabloe: «Yuʼun ti Cristoe cham ta scoj jcotoltic yoʼ jech ti buchʼu cuxule, mu xa yuʼunuc  sba stuc, jaʼ xa uninbil cʼot yuʼun ti Buchʼu cham[e]», jaʼ xkaltik, li Cristoe (kuʼunkutik li nitil tsʼibe; 2 Corintios 5:14, 15, Ch).

¿Mi xnop avuʼun kʼutik yelan xuʼ xavakʼ ta ilel ti kuxulot sventa cha lekubtasbe yoʼonton li Cristoe?... Li june jaʼ liʼe, jaʼ ti kʼalal chavalbe yantik krixchanoetik li kʼusitik achanoj ta stojolale. O nopo avaʼi liʼ xtoke: atuk oyot, mi jaʼuk ameʼ mi jaʼuk atot mi buchʼuuk yan krixchanoal yakal tskʼelot. ¿Mi chlik van akʼel kʼusitik ch-echʼ ta television o kʼusitik oy ta Internet ti anaʼoj ti muʼyuk bu lek chil li Jesuse?... Vuleso ta ajol ti kuxul li Jesuse xchiʼuk ti ta xil skotol li kʼusitik ta jpastike.

Yan srasonal ti skʼan ta jkʼantik li Jesuse jaʼ ti yuʼun ta jkʼan ta jchanbetik stalelal li Jeovae. «Lec scʼanojun li Jtote», xi laj yal li Jesuse. ¿Mi xa naʼ kʼu yuʼun kʼanbil yuʼun Jeova li Jesuse xchiʼuk kʼu yuʼun skʼan ta jkʼantik ek li voʼotike?... Yuʼun li Jesuse ta sjunul yoʼonton la skʼan icham sventa akʼo pasuk li kʼusi tskʼan li Diose (Juan 10:17). Jaʼ yuʼun skʼan ta jchʼuntik li mantal ta Vivlia ti xi chale: «Jaʼ chanbeic yoʼnton li Diose, yuʼun xnichʼnaboxuc xa, lec scʼanojoxuc. Cʼano abaic jech chac cʼu chaʼal la scʼanutic li Cristoe, yuʼun laj yacʼ sba ta milel ta jcojtic», xi (Efesios 5:1, 2).