¿MI OY kʼusi chopol spasojboxuk junuk velta?...¿Mi oy buchʼu yilbajinojot o mi oy yalojboxuk li kʼusi chopole?... ¿Mi jaʼ jech skʼan cha pasbe ek li buchʼu jech spasojbote?...

Ep krixchanoetike ta spakbeik li buchʼutik chopol kʼusitik tspasbatike. Pe li Jesuse ichanubtasvan ti skʼan ta jpastik pertone (Mateo 6:12). ¿Kʼusi ta jpastik mi ep ta velta ta xilbajinutik li jun krixchanoe? ¿Jayib velta skʼan ta jpasbetik perton?...

Li jtakbol Pedroe tskʼan tsnabe li stakʼobile, jaʼ yuʼun jun veltae xi la sjakʼbe li Jesuse: ¿Mi vukub velta noʼox skʼan ta jpas perton?, xi. Pe, mu baluk noʼox ti vukub veltae. Li Jesuse xi la stakʼbee: Skʼan cha pas perton kʼalal to 77 ta velta mi jech sta-oe, xi.

¡Taje toj ep ta velta! Mi oy buchʼu ep ta velta chilbajinutike mu xvul ta joltik skotol, ¿mi mu jechuk? Taje jaʼ li kʼusi yakal xchanubtasutik li Jesuse: skʼan mu jchaptik jayib velta tspas smul ta jtojolaltik li jchiʼiltaktike. Mi oy buchʼu tskʼanbutik pertone, skʼan ta jpasbetik perton.

Li Jesuse skʼan chakʼbe ox ta ilel yajtsʼaklomtak ti toj tsots skʼoplal ti akʼo spasvanik ta pertone. Jaʼ yuʼun, kʼalal la stakʼbe li kʼusi jakʼbat yuʼun Pedroe, li  Jesuse lik yalanbe jun loʼil. ¿Mi cha kʼan chavaʼi?...

Oy toʼox jun ajvalil ti toj lek yoʼontone, yuʼun ta xakʼbe ta chʼamunel stakʼin li j-abteletik ti kʼalal chtun yuʼunike. Pe jun kʼakʼale la skʼan ti akʼo sutesbatuk li stakʼine, jaʼ yuʼun la stak ta ikʼel li yaj-abteltake. Li june oy yil lajunmil talento, jaʼ xkaltik, 60 miyon ta sep takʼin. Epal takʼin maʼ taje.

 Pe li j-abtele lajem xa yuʼun skotol xchiʼuk muʼyuk kʼusi oy yuʼun sventa tsutes li takʼine. Jech un chaʼa, li ajvalile laj yal mantal ti akʼo xichʼ chonel li j-abtele, li yajnile, li xnichʼnabtake xchiʼuk skotol li kʼusitik oy yuʼune. Vaʼun, li stojolik ti chichʼik chonele jaʼ chtun sventa tsutesbeik-o stakʼin li ajvalile. ¿Kʼuxi van laj yaʼi sba xa naʼ li j-abtele?...

La skejan sba ta stojolal li ajvalile xchiʼuk xi laj yalbee: Avokoluk malaun to, cha jsutesbot skotol li kile, xi. Ti voʼotukot li ajvalil taje, ¿kʼusi van laj apasbe jechuk li j-abtele?... Li ajvalile kʼux ta yoʼonton laj yaʼi li j-abtele, vaʼun la spasbe perton. Laj yalbe ti mu persauk tsutesbat li stakʼine, mi jsepuk li ta 60 miyon ta sep takʼine. Ta melel, ta xmuyubaj van tajmek li j-abtele.

Pe, ¿kʼusi la spas ta tsʼakal li j-abtele? Kʼalal lokʼ batele, te la snup ta be xchiʼil ta abtel, ti jaʼ 100 ta sep takʼin yil yuʼune. La stsak, la xmichʼbe snukʼ xchiʼuk xi laj yalbee: ¡Tojbun ta ora li 100 ta sep takʼin avile!, xut. ¿Mi xkʼot-o xa naʼ jech tspas ti jaʼ mas ep ta tajmek yil ipasbat perton yuʼun li ajvalile?...

Li j-abtel ti jaʼ noʼox 100 ta sep takʼin yile toj abol sba. Mu toʼox xuʼ tsutes ta ora noʼox li takʼine. Jaʼ yuʼun la spatan sba ta yok li xchiʼil ta abtele xchiʼuk xi laj yalbee: Avokoluk malaun to, cha jsutesbot skotol mi la jtae, xi. ¿Mi mu van xuʼuk la smala to sventa chtojbat li stakʼin li xchiʼil ta abtele?... Ti voʼotuke, ¿kʼusi van laj apas ti jechuke?...

Li vinik taje muʼyuk bu lek yoʼonton jech kʼuchaʼal laj yakʼ ta ilel slekil yoʼonton li ajvalile. La skʼan akʼo sutesbatuk ta ora noʼox li stakʼine. Ta skoj ti yuʼun muʼyuk xtoj yuʼun li takʼin li xchiʼile, la stikʼ ta chukel. Li yan j-abteletike, laj yilik li kʼusi kʼot ta pasele, muʼyuk bu lek laj yilik li kʼusi la spase. Abol sba laj yilik li j-abtel ti bat ta chukele, jaʼ yuʼun bat yalbeik li ajvalil li kʼusi laj yilike.

Li ajvalile muʼyuk bu lek laj yaʼi ek. Ilin tajmek ta stojolal li j-abtel ti muʼyuk bu la spasbe perton li xchiʼil ta abtele, jaʼ yuʼun la stak ta  ikʼel xchiʼuk xi laj yalbee: Chopol j-abtel, ¿mi muʼyuk bu la jpasbot perton li avile? ¿Kʼu yuʼun muʼyuk bu laj akʼuxubin li achiʼile?, x-utat.

Li j-abtel taje la xchanbe jechuk li slekil chanobil laj yakʼ ta ilel li lekil ajvalile. Pe muʼyuk bu la xchan, jaʼ yuʼun li ajvalile laj yal mantal ti akʼo xichʼ tikʼel ta chukel jaʼ to mi la stoj skotol li 60 miyon ta sep takʼine. Veno, ta chukinabe muʼyuk me bu ta spas kanal sventa tstojbe stakʼin li ajvalile. Te chkom-o jaʼ to mi chame.

Kʼalal tsuts ta yalel sloʼil li Jesuse, xi laj yalbe li yajtsʼaklomtake: «Jaʼ noʼox jech chaspasboxuc ec li Jtot te oy ta vinajele me mu scotoluc avoʼntonic jʼechʼel chapasbeic perdón smul li achiʼilique», xi (Mateo 18:21-35).

Ta melel, oy ep kiltik ta stojolal li Diose, yuʼun jaʼ chakʼbutik li jkuxlejaltike. Jech un chaʼa, mi ta jkoʼoltastik li kiltik ta stojolal Dios xchiʼuk li yilik krixchanoetik ta jtojolaltike, jaʼ jutuk li yilik li yantike.  Li ilil taje jaʼ jech kʼuchaʼal li 100 ta sep takʼin ti oy yil ta stojolal xchiʼil ta abtel li j-abtele. Pe li kiltik ta stojolal Dios ta skoj li kʼusitik chopol ta jpastike, jaʼ jech kʼuchaʼal li 60 miyon ta sep takʼin ti oy yil ta stojolal ajvalil li yan j-abtele.

Li Diose toj ep slekil yoʼonton. Akʼo mi ta jpastik li kʼusitik chopole, li stuke ta spasbutik perton. Muʼyuk bu ta spojbutik jkuxlejaltik sbatel osil sventa tsujutik ta stojel li kiltike. Pe skʼan ta jvules ta joltik li xchanobil liʼe: Li Diose ta spasbutik perton jaʼ noʼox mi ta jpasbetik perton ek li buchʼutik chopol kʼusi chi spasbutike. ¿Mi skʼan van ta jnoptik xa naʼ ta sventa taje?...

Vaʼun chaʼa, mi oy buchʼu kʼusi chopol cha spasbote, pe ta skʼanbot perton ta tsʼakale, ¿kʼusi cha pas? ¿Mi ta van xa pasbe perton?... ¿Ati mi ep ta velta chkʼot ta pasel un taje? ¿Mi cha pasilanbe-o van perton?...

Ti voʼotikuk li buchʼu ta skʼan pertone, ta jkʼantik ti chkichʼtik pasbel pertone, ¿mi mu jechuk?... Jaʼ yuʼun jaʼ jech skʼan ta jpastik ek li voʼotike. Maʼuk noʼox skʼan ta xkaltik ti ta jpastik pertone, yuʼun skʼan ta jpastik perton ta sjunul koʼontontik. Mi jaʼ jech ta jpastike, ta xkakʼtik ta ilel ta melel ti yuʼun ta jkʼan ta jchanbetik stalelal li Mukʼta Jchanubtasvaneje.