¿MI XAVOJTIKIN li orasion ti laj yakʼbe xchan yajchankʼoptak li Jesuse?... Mi mu xa vojtikine, komon jkʼeltik ta Vivlia, ta Mateo 6:9-13. Li orasion liʼe, ti ep buchʼutik ta sbiiltasik padrenuestroe, xi ta xal jutuke: Laʼ ventainunkutik, xi. ¿Mi xa naʼ kʼusi jaʼ li ventainel o ajvalilal yuʼun Diose?...

Ta Vivliae, li ajvalilale jaʼ jun ventainel. Li avie oy jaychopuk ti kʼu yelan chventainvanike. Ta junantike, li buchʼu tsbeiltas li lume jaʼ jun presidente. Pe li ta ajvalilal yuʼun Dios ti yaloj ta melele, li buchʼu chventainvane jaʼ li ajvalile.

¿Mi xa naʼ buchʼu la stʼuj sventa ch-och ta Ajvalil li ta ajvalilal yuʼun Jeova Diose?... Jaʼ li xNichʼone, li Jesucristoe. ¿Kʼu yuʼun jaʼ mas lekil ajvalil li Jesuse, ti jaʼ mu sta li buchʼu tstʼujik li krixchanoetike?... Yuʼun jaʼ onoʼox ta spas li kʼusi leke, taje jaʼ ta skoj ti yuʼun skʼanoj ta melel li sTote.

Kʼalal skʼan toʼox tajmek x-ayan ta Belén li Jesuse, li Vivliae laj yal ti chtal ta Balumile xchiʼuk ti chkʼot ta tʼujbil ajvalil yuʼun li Diose.  Jkʼeltik ta sventa taje, te ta Isaías 9:6, 7: «Yuʼun cʼot xa ta pasel ti vocʼ xa jun querem ta jtojoltique. Laj xa yacʼbotic talel jun xnichʼon ti Diose, cʼot ta pasel ti acʼbat yichʼ yabtel ta ventainvaneje. Xi sʼelan scʼoplal ta xʼalbate: [...] Banquilal jlamajesej-cʼop. Ta xchoti ta spasel mantal [...]; buyuk noʼox ta xpuc batel scʼoplal ti yichʼoj tsots yabtel ta ajvalilale, muʼyuc xlaj scʼoplal ti lamajem ti cʼop yuʼune», xi (kuʼuntik li nitil tsʼibe, Ch).

¿Mi xa naʼ kʼu yuʼun «Banquilal» ta xichʼ biiltasel li buchʼu chventainvan ta Ajvalilal yuʼun Diose? Yuʼun li Jesuse jaʼ nichʼonil yuʼun li Mukʼta Ajvalil Jeovae. Pe jech xtok, li Jeovae sbiiltasoj ta Ajvalil li Jesús li ta Ajvalilal yuʼune, yuʼun jmil jabil tsventain tal li Balumile (Apocalipsis 20:6). Kʼalal laj yichʼ voʼ li Jesuse, «jaʼo yorail te lic spuc scʼop Dios li Jesuse, jech laj yalbe li cristianoetique: “Suteso avoʼntonic, yuʼun jutuc xa scʼan xlic ventainvanuc li Diose”», xi (Mateo 4:17).

¿Kʼu yuʼun van laj yalbe li buchʼutik te oyik ta sjoylebal Jesús ti nopaj xa li Ajvalilale?... Yuʼun li Ajvalil ti chventainvan ta tsʼakal ta vinajele, te toʼox oy ta stojolalik. Jaʼ yuʼun xi laj yal li Jesuse: «Li ventainel yuʼun Diose liʼ xa oy ta atojolic», xi (Lucas 17:21). ¿Mi mu van xa kʼan te oyot ta stsʼel xchiʼuk cha pik li buchʼu stʼujoj Jeova sventa ch-och ta Ajvalile?...

Jech un chaʼa, albun kaʼi: ¿kʼusi abtelal tsots skʼoplal tal spas ta Balumil li Jesuse?... Jaʼ onoʼox stuk la stakʼ kʼalal xi laj yale: «Ta persa chibat ta yantic lumetic, yuʼun chbat jcholbe yaʼyic li Lequil Aʼyej ta sventa ventainel yuʼun Diose. Yuʼun jaʼ ta sventa ti tacbilun tale», xi (Lucas 4:43). Pe li Jesuse snaʼoj ti mu xuʼ yuʼun skotol ti stuk noʼox ta xchol li mantale. Jech oxal, ¿kʼusi van la spas xa naʼ?...

Kʼalal la xchol mantal li Jesuse laj yikʼ batel yantik sventa chakʼbe ta ilel kʼu yelan ta pasel li abtelal taje. Li buchʼutik baʼyel la xchanubtase jaʼ li lajchaʼvoʼ yajtakboltake  (Mateo 10:5, 7). Pe ¿mi jaʼ noʼox la xchanubtas ta chol mantal li yajtakboltake? Moʼoj, li Vivliae ta xalbutik ti la xchanubtas ep yajchankʼoptak noxtoke. Kʼalal kʼot skʼakʼalile, la stak batel 70 ta chaʼchaʼvoʼ. ¿Kʼusi chcholbeik li krixchanoetike?... Li Jesuse xi laj yalbe akʼo yalike: «Jech xavalbeic: “Liʼ xa oy ta atojolic li ventainel yuʼun Diose”, utic», xi (Lucas 10:9). Jaʼ jech la xchanik ta sventa li ajvalilal yuʼun Dios li krixchanoetike.

Kʼalal skʼan toʼox tajmek xkʼot skʼakʼalil taje, te ta Israele, nopem xaʼiik ti kajal ta jkot chʼiom buro ch-och ta jteklum li buchʼu jaʼ to chbiiltasatik ta ajvalile, yuʼun jaʼ sventa ch-ilatik yuʼun li jteklume. Taje jaʼ jech la spas li Jesús kʼalal la svulaʼan ta slajeb xa velta li Jerusalene. Jnaʼojtik ti jaʼ toʼox ta x-och ta Ajvalil li ta Ajvalilal yuʼun Dios li Jesuse, pe ¿mi tskʼanik ti jaʼ ch-och ta Ajvalil yuʼunik li krixchanoetike?...

Veno, jutuk mu skotoluk li krixchanoetike lik skʼi spokʼik yoʼ bu chjelav li Jesuse. Yantike la xtuchʼik yanal xan, vaʼun la skʼiik ek li ta bee. Jaʼ jech laj yakʼik ta ilel ti skʼanojik kʼuchaʼal Ajvalil li Jesuse. Xi ta x-avanike: «¡Ichʼbiluc ta mucʼ li Ajvalil tacbil tal yuʼun Cajvaltic Diose!», xiik. Pe mu skotolikuk jun yoʼontonik. Jech onoʼox ta melel, li junantik bankilaletik ta relijione xi laj yalbeik li Jesuse: Albo li avajchankʼoptak ti akʼo xchʼaniike, xutik (Lucas 19:28-40).

Kʼalal echʼ voʼob kʼakʼale, laj yichʼ chukel li Jesuse xchiʼuk laj yikʼik batel ta spasobmantal li ajvalil Poncio Pilatoe. Li yajkontratake la stikʼbeik smul ti yuʼun la jaʼ ajvalil chal sba li Jesuse xchiʼuk ta la skontrain li ajvalil ta Romae. Jech un chaʼa, li Pilatoe la sjakʼbe li Jesús ta sventa li kʼusi chalike, pe li Jesuse laj yal ti muʼyuk bu yakal skʼan ta xichʼ li ajvalilale. Xi laj yale: «Li abtel quichʼoj sventa ajvalilale mu jaʼuc sventa banamil», xi (Juan 18:36).

Vaʼun li Pilatoe ilokʼ xchiʼuk laj yalbe li krixchanoetik ti muʼyuk kʼusi chopol staoj ta stojolal li Jesuse. Pe li stukike mu xa skʼanik ti jaʼuk Ajvalil yuʼunik li Jesuse, mi jaʼuk skʼanik akʼo skoltaik lokʼel (Juan 18:37-40). Kʼalal laj xchaʼkʼopon Jesús li Pilatoe, mas to la  xchʼun ti muʼyuk kʼusi chopol spasoj li Jesuse. Jech un chaʼa, ta slajeb xa velta la slokʼes li Jesuse, xi laj yale: «¡Qʼuelavilic, liʼ oy li ajvalil avuʼunique!», xi. Pe xi avanik li krixchanoetike: «¡Acʼo chamuc, acʼo chamuc[!]», xiik.

Li Pilatoe xi la sjakʼe: ¿Mi chkakʼ ta milel li Ajvalil avuʼunike?, xi. Li bankilal paleetike xi la stakʼike: «Muʼyuc yan ajvalil cuʼuncutic; jaʼ noʼox li Cesare», xiik. ¿Mi xnop avuʼun? Li chopol paleetik taje la spasik ti akʼo skontrainik Jesús li krixchanoetike (Juan 19:1-16).

Li ta jkʼakʼaliltike jaʼ jech xkoʼolaj kʼuchaʼal taje. Jutuk mu skotoluk li krixchanoetike, ta melel  mu skʼanik ti jaʼuk Ajvalil yuʼunik li Jesuse. Oyikʼal van chalik ti xchʼunojik li Diose, pe mu skʼanik albel yuʼun Dios xchiʼuk Cristo li kʼusi skʼan akʼo spasike. Jaʼ mas lek chaʼiik ti tsvaʼan ajvalil yuʼunik stukike.

¿Li voʼotike? Kʼalal ta jchantik ta sventa li Ajvalilal yuʼun Dios xchiʼuk li kʼusitik alakʼ sba tspase, ¿kʼusi chkaʼitik ta stojolal li Diose?... Ta jkʼantik, ¿mi mu jechuk?... Vaʼun chaʼa, ¿kʼuxi xuʼ chkakʼtik ta ilel ti jkʼanojtik xchiʼuk ti ta jkʼantik akʼo sventainutik li Ajvalilal yuʼune?...

Chkakʼtik ta ilel kʼalal ta jchanbetik stalelal li Jesuse. ¿Kʼu yelan laj yakʼ ta ilel ti skʼanoj Jeova li Jesuse?... «Jaʼ ta jpasbe scotol cʼacʼal li cʼusi lec chile», xi laj yal li Jesuse (Juan 8:29). Jech, li Jesuse ital ta Balumil sventa tspasbe li kʼusi tskʼan yoʼonton li Diose xchiʼuk sventa tsvuʼesbe «li yabtele» (Hebreos 10:7; Juan 4:34). Jkʼeltik kʼusi la spas kʼalal muʼyuk toʼox slikesoj li yabtel ta chol mantale.

Li Jesuse ibat yoʼ bu oy li Juan J-akʼvanej ta voʼe, te ta ukʼum Jordane. Kʼalal laj xa stikʼ sbaik ochel xchaʼvoʼalik li ta ukʼume, li Juane la smuk ochel sjunlejal ta voʼ li Jesuse, vaʼun la slokʼes. ¿Mi xa naʼ kʼu yuʼun laj yakʼbe yichʼ voʼ Jesús li Juane?...

Yuʼun jaʼ jech la skʼan li Jesuse. Pe ¿kʼuxi ta jnaʼtik ti yuʼun jech tskʼan Dios ti akʼo xichʼ voʼ li Jesuse?... Yuʼun kʼalal ilokʼ ta voʼ li Jesuse, laj yaʼibe ye  Dios te to ta vinajel ti xi chale: «Voʼot jnichʼonot, lec jcʼanojot, lec jpatoj coʼnton avuʼun», xi. Maʼuk noʼox taje, yuʼun li Diose la stak tal xchʼul espiritu kʼuchaʼal jkot paloma ta yakʼol li Jesuse. Kʼalal laj yichʼ voʼe, li Jesuse laj yakʼ ta ilel ti tskʼan chtun ta stojolal Jeova ta skotol xkuxlejale, ta sbatel osil (Marcos 1:9-11).

Li voʼote bikʼitot to, pe ¿kʼusi cha pas mi la chʼie?... ¿Mi ta van xa chanbe batel stalelal li Jesuse? ¿Mi ta van xavichʼ voʼ ek?... Skʼan cha chanbe, yuʼun li Vivliae ta xal ti jaʼ laj yakʼbutik ta ilel kʼusi skʼan ta jpastik sventa akʼo jtsʼaklintik batele (1 Pedro 2:21). Kʼalal mi laj avichʼ voʼe, yakal me xavakʼ ta ilel ti ta melel cha kʼan akʼo sventainot li Ajvalilal yuʼun Diose. Pe mu me baluk noʼox ti chkichʼtik voʼe.

Skʼan ta jchʼuntik skotol li kʼusitik ichanubtasvan li Jesuse. Li Jesuse laj yal ti skʼan maʼukutik xa «ta sventa banamile». ¿Mi yakal van ta jchʼunbetik smantal ti yuʼunuk ta jtikʼ jbatik ta sventa li kʼusitik ta balumile? Li Jesús xchiʼuk li yajtakboltake la xchʼak sbaik ta sventa li kʼusitik ta balumile (Juan 17:14). Vaʼun chaʼa, ¿kʼusi la spasik?... La skʼoponik yan krixchanoetik ta sventa li Ajvalilal yuʼun Diose. Taje jaʼ li abtelal mas tsots skʼoplal ta xkuxlejalike. ¿Mi xuʼ jaʼ jech ta jpastik ek?... Xuʼ, ta jpastik mi ta sjunul koʼontontik ta jpasbetik orasion Dios kʼalal chkalbetik ti akʼo taluk li Ajvalilal yuʼune.