JUN veltae, li Jesuse ay kʼelatuk yuʼun jun vinik, yuʼun li vinike snaʼoj ti toj pʼije, vaʼun xi laj yalbee: Jchanubtasvanej, albo li jbankil ti akʼo svokʼbun li kʼusi oy yuʼun li anima jtotkutike, xi. Li vinike yaloj ti yuʼun oy sderecho chichʼ ek li kʼusi oy yuʼun li anima stote.

Ti voʼotukot li Mukʼta Jchanubtasvaneje, ¿kʼusi van laj apas ti jechuke?... Li Jesuse laj yakʼ venta ti oy svokol li vinike. Li vinike maʼuk yuʼun chtun yuʼun li kʼusitik laj yikta li stote, moʼoj, yuʼun mu xaʼibe smelolal kʼusi li mas tsots skʼoplal ta xkuxlejale.

Jnoptik ta sventa liʼe: ¿kʼusi ti mas tsots skʼoplal kuʼuntike? ¿Mi jaʼ ti oy kixtoltik ti ta jkʼupintik, ti oy achʼ jkʼuʼ jpokʼtik o kʼusuk yantike?... Moʼoj. Li Jesuse tskʼan chakʼbutik ta ilel jun xchanobil ta sventa ti yuʼun oy kʼusi mas tsots skʼoplale. Jaʼ yuʼun laj yalbe sloʼilal jun vinik ti la xchʼay ta sjol li Diose. ¿Mi cha kʼan chavaʼi?...

Jaʼ ta sventa jun vinik ti toj jkʼuleje. Liʼe ep yosil xchiʼuk ep snail kʼusitik yuʼun. Toj ep laj yakʼ li kʼusitik la stsʼune, vaʼun muʼyuk xa bu stabe yavil bu xuʼ tskʼej. ¿Kʼusi la snop tspas? Xi laj yal ta yoʼontone: Ta jines li snail kʼusitik oy kuʼune, vaʼun ta jpas mas mukʼtik. Mi jech ta jpase xuʼ te ta jkʼej skotol li kʼusitik oy kuʼun xchiʼuk skotol li kʼusitik chlokʼ kuʼune, xi.

Li jkʼulej vinike la snop ti yuʼun jaʼ mas lek ti jaʼ jech ta spase, la snop ti  yuʼun toj pʼij ti ta skʼej ep kʼusitik yuʼune. Xi la snope: Ep kʼusitik lek kʼejbil kuʼun ti chjalij ep jabiletike. Jaʼ yuʼun li avie mu kʼusi xkat-o koʼonton. Chi veʼ, chi uchʼbolaj xchiʼuk ta jkʼupin li kʼusitik oy kuʼune, xi. Pe muʼyuk bu lek li kʼusitik la snope. ¿Mi xa naʼ kʼu yuʼun?... Yuʼun jaʼ noʼox la snop ta sventa stuk xchiʼuk li kʼusitik tskʼan yoʼontone, la xchʼay ta sjol li Diose.

Jech un chaʼa, li Diose la skʼopon xchiʼuk xi laj yalbee: ¡Toj bolot! Li avi akʼobale cha cham, vaʼun ¿buchʼu ta xichʼ komel li kʼusitik laj akʼeje?, x-utat. Li jkʼulej vinike, ¿mi xuʼ to van stunes li kʼusitik oy yuʼun kʼalal mi chame?... Moʼoj, yan krixchanoetik ta xichʼbeik komel li kʼusitik oy yuʼune. Li Jesuse xi laj yalbe smelolale: «Jaʼ jech scʼoplal li bochʼo jaʼ noʼox tstsob ep scʼulejal stuque. Ta stojol Diose meʼon», xi (Lucas 12:13-21).

Li voʼote mu xa kʼan jechukot kʼuchaʼal li jkʼulej vinike, ¿mi mu jechuk?... Li stuke, li kʼusi mas tsots skʼoplal laj yaʼi ta xkuxlejale jaʼ ti  oyuk kʼusitik yuʼune. Taje jaʼ li kʼusi chopol la spase, yuʼun mas to tskʼan kʼusitik oy yuʼun, pe «ta stojol Diose meʼon».

Ep krixchanoetik jechik kʼuchaʼal li jkʼulej vinik taje, mas to tskʼanik kʼusi oy yuʼunik. Pe taje xuʼ ta x-akʼbat ep svokolik. Jech kʼuchaʼal liʼe, voʼote oy avixtoltak, ¿mi mu jechuk?... ¿Mi xuʼ xavalbun kʼusitik jaʼ?... ¿Ati mi oy junuk avamigo ti oy spelota, smunyeka o yan ixtolal ti muʼyuk avuʼune? ¿Mi lek van ti cha kʼanilanbe atot ameʼ sventa tsmanboxuk junuk kʼuchaʼal taje?...

Bakʼintike, toj tsots skʼoplal yileluk li ixtolale. Pe ¿kʼusi tspas mi echʼ kʼu sjaliluke?... Ta stsʼiʼlej. Oyikʼal van ta xjat o ta xvokʼ, vaʼun bi mu xa xa kʼan. Ta melel onoʼox, li avixtole maʼuk li kʼusi oy mas sbalil avuʼune, moʼoj. ¿Mi xa naʼ kʼusi ti oy mas sbalil avuʼune?...

Jaʼ li akuxlejale. Li akuxlejale jaʼ li kʼusi mas tstots skʼoplale yuʼun mi muʼyuk akuxlejale mu kʼusi xuʼ xa pas. Pe li akuxlejale jaʼ te cha taʼo mi cha pas li kʼusi lek chil li Diose, ¿mi mu jechuk?... Jaʼ yuʼun skʼan mu jechukutik kʼuchaʼal li bol jkʼulej vinik ti chʼay ta sjol li  Diose.

Li ololetike maʼukik noʼox li buchʼutik tsbol pasik kʼusitik jech kʼuchaʼal li jkʼulej vinik taje. Ep mukʼtik krixchanoetik tspasik jech ek. Junantike mas to tskʼanik ti oyuk kʼusitik yuʼunike. Oyikʼal van oy sveʼelik jujun kʼakʼal, skʼuʼ spokʼik xchiʼuk bu chnakiik. Pe mu junuk noʼox yoʼontonik, tskʼanik mas skʼuʼ spokʼik xchiʼuk tskʼanik mas mukʼ li snaike. Skotol taje ep takʼin chichʼ. Jech oxal, ep ch-abtejik sventa oyuk mas stakʼinik, kʼalal oy xa mas stakʼinike, mas to tskʼanik.

Junantik krixchanoetike mu xchʼak skʼakʼalik sventa li yutsʼ yalalike mi jaʼuk ta sventa li Diose, yuʼun toj ep ch-abtejik sventa tspasik mas kanal. ¿Mi xuʼ ta x-akʼbat xkuxlejalik li stakʼinike?... Moʼoj. ¿Mi xuʼ ta stunes li stakʼinik kʼalal mi chamemik xae?... Moʼoj, yuʼun li animaetike mu xa kʼusi xuʼ spasik ta jyalel (Eclesiastés 9:5, 10).

¿Mi jaʼ tskʼan chal ti yuʼun chopol ti oy jtakʼintike?... Moʼoj. Mi oy jtakʼintike xuʼ ta jman jveʼeltik xchiʼuk jkʼuʼ jpokʼtik. Li Vivliae ta xal ti lek chtun kuʼuntik li takʼine (Eclesiastés 7:12). Pe mi jaʼ ta jkʼantik li takʼine, vaʼun bi oy me tsots jvokoltik. Jaʼ me jechutik kʼuchaʼal li jkʼulej vinik ti la skʼej kʼusitik yuʼun sventa stuke, pe chʼabal skʼulejal ta stojolal li Diose.

¿Kʼusi tskʼan chal ti oyuk jkʼulejaltik ta stojolal li Diose?... Jaʼ tskʼan chal ti chkakʼtik ta baʼyel ta jkuxlejaltik li Diose. Junantik krixchanoetike chalik ti xchʼunojik li Diose xchiʼuk tsnopik ti xuʼ noʼox la jech taje. Pe ¿mi jkʼulejik van ta melel ta stojolal li Diose?... Moʼoj, jaʼ jechik kʼuchaʼal li jkʼulej vinik ti chʼay ta sjol li Diose.

Li Jesuse muʼyuk bu la xchʼay ta sjol li sTot ta vinajele. Muʼyuk bu laj yakʼbe yipal ta spasel kanal takʼin mi jaʼuk oy ep kʼusitik yuʼun. Li Jesuse snaʼoj ti kʼusi jaʼ mas tsots skʼoplal ta jkuxlejaltike. ¿Mi xa naʼ kʼusi jaʼ?... Jaʼ ti oyuk jkʼulejaltik ta stojolal li Diose.

Albun tal kaʼitik, ¿kʼuxi xuʼ oyuk jkʼulejaltik ta stojolal li Diose?...  Jaʼ ti kʼalal ta jpastik li kʼusitik lek chile. Li Jesuse xi laj yale: «Jaʼ ta jpasbe scotol cʼacʼal li cʼusi lec chile», xi (Juan 8:29). Taje lek chil li Diose. Tana un, albun tal kaʼitik, ¿kʼusi xuʼ cha pas sventa cha lekubtasbe yoʼonton li voʼote?... Jaʼ ti kʼalal cha kʼel li Vivliae, kʼalal cha bat ta tsobajeletik, kʼalal cha kʼopon Dios xchiʼuk ti kʼalal cha kolta li yantik krixchanoetik sventa chchanik ta stojolal li Diose. Skotol li kʼusitik taje jaʼ li kʼusi mas tsots skʼoplal ta jkuxlejaltike.

Li Jesuse jkʼulej ta stojolal li Diose, jaʼ yuʼun chabiat yuʼun li Jeovae. Li smoton akʼbate jaʼ li xkuxlejal sbatel osile. Mi jechutik kʼuchaʼal li Jesuse, li Jeovae ta skʼanutik xchiʼuk ta xchabiutik ek. Jech oxal chaʼa, jchanbetik stalelal li Jesuse, mu jaʼuk jchanbetik stalelal li jkʼulej vinik ti la xchʼay ta sjol li Diose.