JKOTOLTIK ta jkʼan chi jmuyubajutik, ¿mi mu jechuk?... Pe mu epuk li krixchanoetik ti chmuyubajik ta melele. ¿Mi xa naʼ kʼu yuʼun?... Yuʼun muʼyuk xchanojbeik smelolal kʼuxi xuʼ staik li melel muyubajele. Chalik ti sventa la tstaik li muyubajele skʼan la oyuk ep kʼusitik yuʼunik. Pe kʼalal oy xa yuʼunike, muʼyuk bu chjalij li smuyubajelike.

Li Mukʼta Jchanubtasvaneje la sjambutik smelolal ta sventa li melel muyubajele: «Jaʼ toj echʼem xcuxet yoʼnton li bochʼo ta xaqʼue; jaʼ mu sta jech li bochʼo ta xichʼe, xi» (Hechos 20:35). ¿Kʼuxi xuʼ chi jmuyubajutik un chaʼa?... Jaʼo ti kʼalal chkakʼtik xchiʼuk ta jpastik kʼusitik ta stojolal li yantike. ¿Mi anaʼoj xa onoʼox?...

Jnoptik jutuk mas ta sventa li kʼusi tskʼan chal taje. Li Jesuse, ¿mi yuʼun laj yal ti muʼyuk bu ta xmuyubaj li buchʼu ta xchʼam jun matanale?... Moʼoj, maʼuk la skʼan laj yal taje. ¿Mi mu meleluk ti cha kʼupin kʼalal cha chʼam amotone?...  Jkotoltik ta jkʼupintik. Chi jmuyubajutik ti kʼalal ta xkichʼtik akʼbel kʼusitik kʼupilik sbae.

Pe li Jesuse laj yal ti mas to la chi jmuyubajutik ti kʼalal voʼotik chkakʼtike. ¿Buchʼu van jaʼ xa naʼ li buchʼu mas yakʼoj matanaletike?... Jaʼ, jaʼ li Jeova Diose.

Li Vivliae ta xal ti Diose «jaʼ ta xacʼ chijcuxiutic, xchiʼuc jaʼ ta xacʼ quichʼtic icʼ. Jaʼ ta xacʼbutic scotol». Jaʼ ta xakʼbutik tal li voʼe xchiʼuk li xojobal kʼakʼale, taje jaʼ sventa chchʼi li tsʼiʼleletike xchiʼuk sventa oyuk jveʼeltik (Hechos 14:17; 17:25). Muʼyuk bu labal chkaʼitik kʼalal chal Vivlia ti Jeovae jaʼ jun Dios ti chmuyubaje (1 Timoteo 1:11). Jtos li kʼuxi chakʼ muyubajuk li Diose jaʼ ti kʼalal chkakʼbetik kʼusitik li yantike, jech xtok, xuʼ xakʼ xi jmuyubajutik ek.

Veno, ¿kʼusi xuʼ xkakʼbetik li yan krixchanoetike? ¿Kʼusi van chaval li voʼote?... Bakʼintike sventa chkakʼtik jun matanale skʼan oyuk jtakʼintik. Mi jaʼ ti kʼusi chichʼ manel ta tiendae, skʼan tojel. Jech un chaʼa, mi yakal xa nop chavakʼ jun matanal kʼuchaʼal taje, skʼan cha tsob atakʼin sventa cha tsʼakubtasbe stojol li kʼusi cha mane.

Li matanaletik chkakʼtike mu persauk manbil. Jech kʼuchaʼal liʼe, kʼalal toj kʼux kʼakʼale toj lek xa xkʼot-o ti chkuchʼtik junuk boch sikil yoxoʼe. Mi cha kʼelanbe junuk krixchano ti buchʼu chtakij tajek yoʼontone, chavaʼi li muyubajel ti chichʼ tael kʼalal chichʼ akʼele.

Oyikʼal van junuk kʼakʼal xa muyubaj tajmek ti tsman gayeta li ameʼe. Pe ¿kʼusi ti xuʼ mas cha yakʼbot amuyubajele, mi jaʼ van ti atuk noʼox cha veʼe?... Moʼoj, jaʼ me mas cha muyubaj mi cha kʼelanbe jayibuk li avamigotake. ¿Mi cha kʼan cha pas taje?...

 Li Mukʼta Jchanubtasvanej xchiʼuk li yajtakboltake laj yaʼiik li muyubajel ti kʼalal chichʼ akʼele. ¿Mi xa naʼ kʼusi laj yakʼbeik li yan krixchanoetike?... ¡Jaʼ li kʼusi mas lek ta skotol balumile! Li stukike xchanojik li kʼusi melel ta sventa li Diose, xchiʼuk ta sjunul yoʼontonik laj yakʼbeik yojtikin li yan krixchanoetik li lekil aʼyeje. Muʼyuk bu laj yakʼ akʼo x-akʼbatik takʼin ti kʼalal jech la spasik taje.

Jun veltae, li jtakbol Pablo xchiʼuk li jchankʼop Lucas ti jaʼ slekil amigoe, laj yojtikinik jun ants ti tskʼan chaʼi ek li muyubajel ti chichʼ tael kʼalal chichʼ akʼele. Te la staik ta tiʼ ukʼum. Li Pablo xchiʼuk Lucase te ibatik yuʼun laj yaʼiik ti yuʼun te onoʼox tstsob sbaik sventa tskʼoponik Diose. Melel maʼ taje, yuʼun kʼalal kʼotike te la staik jayvoʼ antsetik ti yakal spasik orasione.

Li Pabloe lik yalbe li antsetik li lekil aʼyej ta sventa Jeova Dios xchiʼuk ta sventa li Ajvalilal yuʼune. Jun ants ti jaʼ sbi Lidiae, ta skotol yoʼonton laj yaʼi li kʼusi chal li Pabloe. Ta tsʼakal ne, li Lidiae tskʼan chakʼ ta ilel ti tstoj ta vokol li lekil aʼyej ti naka to laj yaʼie. Jaʼ yuʼun xi la skʼanbe vokol li Pablo xchiʼuk Lucase: «Me cha chʼunic ti ta melel jun coʼnton la jchʼun Cajvaltique, avocolicuc ochanic ta jna, liʼ xanaquiique –xi». Jaʼ jech la spas sventa akʼo komikuk li ta snae (Hechos 16:13-15).

Li Lidiae xmuyubaj tajmek ti te oyik ta sna li yajtuneltak Diose. Skʼananojan tajmek yuʼun koltaat ta xchanel ta sventa li Jeovae xchiʼuk li Jesuse, xchiʼuk kʼuxi xuʼ tsta li kuxlejal sbatel osile. Xmuyubaj tajmek ti yuʼun ta xakʼbe sveʼel xchiʼuk chakʼbe bu xuʼ xkux yoʼontonik li Pablo xchiʼuk Lucase. Li Lidiae xmuyubaj tajmek ti laj yakʼ li kʼusi oy yuʼune, yuʼun ta sjunul yoʼonton laj yakʼ. Taje skʼan ta jvules ta jol jkotoltik. Oyikʼal van oy buchʼu ta xalbutik ti skʼan kʼusi ta jkʼelantike. Pe mi mu ta skotoluk koʼontontik chkakʼtike, muʼyuk bu chi jmuyubaj.

Jech kʼuchaʼal liʼe, ti oyuk adulsetak ti cha kʼan cha loʼe, pe mi cha kalbot ti akʼo xavakʼbe jaypʼejuk yan olole, ¿mi xa muyubaj van  chavakʼbe?... Pe ¿ati jaʼuk sventa junuk avamigo ti akʼanoj tajmeke? Ti voʼotuk noʼox laj anop chavakʼbe adulsetak li avamigoe, ¿mi mu van tauk xa muyubaj?...

Bakʼintike oy jun krixchano ti toj ep jkʼanojtike, jaʼ yuʼun ta jkʼan chkakʼbetik skotol li kʼusi oy kuʼuntike, mu kʼusi ta jnakʼtik komel. Jaʼ noʼox jech ek, kʼalal chchʼi li kʼanel kuʼuntik ta stojolal li Diose, ta jkʼan ta xkakʼbetik skotol ek.

Te ta chʼulna ta Jerusalene li Mukʼta Jchanubtasvaneje laj yil jun ants ti abol sba ti skʼanoj Dios jech kʼuchaʼal taje. Li antse kʼajomal chaʼsep yuni takʼin. Pe li yuni takʼine la stikʼ ta xkaxail matanal takʼin ta chʼulna. Muʼyuk buchʼu sujat sventa tstikʼ, jutuk mu skotolikuk li buchʼutik te oyike mi jaʼuk laj yilik. Jaʼ jech la spas yuʼun jech oy ta yoʼonton xchiʼuk yuʼun skʼanoj tajmek li Jeovae. Xmuyubaj ti jaʼ jech laj yakʼe (Lucas 21:1-4).

Oy ep ta tos kʼuxi xuʼ xkakʼtik. ¿Mi xuʼ xavalbun jaytosuk?... Mi oy ta koʼontontik chkakʼtik li kʼusi chkakʼtike, ta me xi jmuyubajutik. Ta skoj taje, li Mukʼta Jchanubtasvaneje ta xalbutik mantal ti akʼo xkakʼtik matanal ta sjunul koʼontontike (Lucas 6:38). Mi ta jchʼunbetik smantale, ta xkakʼtik muyubajikuk yan krixchanoetik. Li voʼotik eke mas to me chi jmuyubajutik ta jyalel.