¿KʼUXI xuʼ xmuyubaj kuʼuntik li Diose? ¿Mi oy kʼusi xuʼ chkakʼbetik?... Li Jeovae xi chale: Jaʼ kuʼun skotol li chonbolometik oy ta teʼtike, «jaʼ cuʼun li cʼanal taqʼuin xchiʼuc li saquil taqʼuine», xi (Salmo 24:1; 50:10; Ageo 2:8). Pe akʼo mi jech, oy kʼusi xuʼ xkakʼbetik. ¿Kʼusi van jaʼ?...

Li Jeovae ta xakʼ akʼo jnop jtuktik mi ta jkʼan chi jtunutik ta stojolal o mi moʼoj. Muʼyuk bu tsujutik ta spasel li kʼusi tskʼane. Ta jkʼeltik mi xkaʼibetik smelolal kʼu yuʼun jech la spasutik li Jeova ti xuʼ ta jnoptik mi chi jtunutik ta stojolal o mi moʼoje.

Ta melel anaʼoj van kʼusi jaʼ li jun robote. Jaʼ jun makina ti pasbil sventa akʼo spas jaʼ noʼox li kʼusi tskʼan li buchʼu la smeltsane. Li robote muʼyuk bu tsnop stuk li kʼusi tspase. Li Jeovae xuʼ jech la spasutik jechuk kʼuchaʼal li robote, sventa jaʼ noʼox ta jpastik li kʼusitik tskʼan stuke. Pe mu jechuk la spasutik. ¿Mi xa naʼ kʼu yuʼun?... Oy junantik ixtolaletik ti jaʼ jechik kʼuchaʼal li robote. Kʼalal ta xichʼ netʼbel jpʼej sbotonale, jaʼ jech tspas tajmek jech kʼuchaʼal tskʼan li buchʼu la smeltsane. ¿Mi aviloj ixtolaletik jech kʼuchaʼal taje?... Li krixchanoetike ta x-echʼ yoʼontonik yuʼun, yuʼun jaʼ noʼox ta spasik li kʼusitik akʼbilik akʼo spasike. Veno, li Diose mu skʼan akʼo jchʼunbetik smantal  sventa chi jtunutik ta stojolal jech kʼuchaʼal robot ti jaʼ noʼox tspas li kʼusi akʼbil akʼo spase. Tskʼan akʼo xi jtunutik ta stojolal yuʼun jkʼanojtik xchiʼuk yuʼun oy ta koʼontontik ta jchʼunbetik li smantale.

¿Kʼu van yelan chaʼi sba xa naʼ li jTotik ta vinajel kʼalal oy ta koʼontontik ta jchʼunbetik li smantale?... Albun tal kaʼi: ¿mi lek van chil xa naʼ atalelal li atot ameʼe?... Li Vivliae ta xal ti pʼijil ol-nichʼonile ta xakʼbe smuyubajel li stote, yan li bol ol-nichʼonile «chacʼbe svocol» li smeʼe (Proverbios 10:1). ¿Mi avakʼoj venta kʼu to yelan chmuyubajik li atot ameʼ kʼalal cha pas li kʼusi cha yalboxuke?... Pe, ¿kʼu yelan chaʼi sbaik ti kʼalal muʼyuk bu cha chʼunbe smantale?...

Tana un jnoptik ta sventa li jTotik ta vinajele, li Jeovae. Li stuke chi jyalbutik kʼuxi xuʼ xmuyubaj kuʼuntik. ¿Kʼu yuʼun mu xa saʼ tal aVivlia xchiʼuk cha jam ta Proverbios 27:11? Tee xi ta xalbutik li Diose: :«Jnichʼon [o jtseb], bijan me, jech xcuxet noʼox coʼnton avuʼun; jech xuʼ ta jtacʼbe li bochʼo chopol chiyalbun jcʼoplale», xi. ¿Mi xa naʼ kʼusi skʼan chal li jpʼel kʼop chopol chi yalbun jkʼoplal ti xie?... Jech kʼuchaʼal liʼe, mi oy buchʼu tsnaʼleot xchiʼuk chal ti mu spas avuʼun li kʼusi avaloje, yakal ta xchopolkʼoptaot. Li Satanase jaʼ jech ta spasbe li Jeovae. ¿Mi xa naʼ kʼu yelan?... Ta jkʼeltik.

Vuleso ta ajol ti jech kʼuchaʼal la jchantik ta kapitulo 8 yuʼun li livro liʼe, li Satanase tskʼan ti jaʼ jbabe ta skotole, ti jaʼuk mas tsots skʼoplale, ti skotoluk krixchanoetik akʼo xchʼunbeik smantale. Li Satanase  ta xal ti jaʼ noʼox la ta jmuyubtatik li Jeova ta skoj ti yuʼun ta xakʼbutik jkuxlejaltik sbatel osile. Kʼalal tsʼujem xa yuʼun ta mulil li Adán xchiʼuk Eva ti muʼyuk bu la xchʼunbeik smantal li Jeovae, li Diabloe la saʼ ta kʼop Dios ti kʼalal xi laj yale: Li krixchanoetike chtunik ta atojolal yuʼun smalaojik ti oy kʼusi chavakʼbee. Pe, mi chavakʼbune, li voʼone xuʼ ta jchʼak ta atojolal buchʼuuk krixchanoal, xi.

Manchuk mi mu jechuk ta jtatik ta Vivlia jech tajmek kʼuchaʼal taje, kʼalal ta jkʼelbetik sloʼilal li Jobe, xuʼ ta jkʼeltik ti Satanase jaʼ jechtik laj yalbe li Diose. Li Satanás xchiʼuk li Jeovae tskʼan tsnaʼik mi tukʼ yoʼonton o mi muʼyuk tukʼ yoʼonton ta stojolal Dios li Jobe. Jam jVivliatik te ta Job, kapitulo 1 xchiʼuk 2, jkʼeltik kʼusi kʼot ta pasel.

Kʼelo ti jech kʼuchaʼal chal ta kapitulo 1 yuʼun Jobe, kʼalal la bat skʼelik Jeova li anjeletik te ta vinajele, te la oy ek li Satanase. Jech un chaʼa li Jeovae xi la sjakʼbee: «¿Bu laʼay tal?», xut. Li Satanase la stakʼ ti ay la xan spʼejel li Balumile. Vaʼun li Jeovae oy  to kʼusi yan la sjakʼbe: ¿Mi yuʼun avakʼoj asat ta stojolal li Job, ti jaʼ jun vinik ti chtun ta jtojolal xchiʼuk ti muʼyuk kʼusi chopol tspase?, xi (Job 1:6-8).

Li Diabloe muʼyuk bu lek chaʼi ti toj tukʼ yoʼonton li Jobe. Jaʼ yuʼun xi laj yale: Ta skoj ti yuʼun muʼyuk svokol li Jobe jaʼ yuʼun cha smuyubta. Pe mi muʼyuk xa bu cha chabie, cha xchopolkʼoptaot ta asat, xi. Li Jeovae xi la stakʼbee: Lek oy, Satanás, xuʼ xavakʼbe jaʼ ti kʼusi vokoliletik cha kʼane, pe mu me xa yayijes li stuke, xi (Job 1:9-12).

¿Kʼusi la spas li Satanase?... Jaʼ la spas ti akʼo yelkʼanbeik xvakaxtak, sburotak xchiʼuk ti akʼo smilik li jkʼel vakaxetik yuʼun Jobe. Tsʼakal ne yal tal saktsel ti la smil li chijetik xchiʼuk li jchabiej chijetike. Te une laj yelkʼanbeik li skameyotake xchiʼuk la smilik li buchʼutik chchabiike. Ta slajeb ne, li Satanase la spas akʼo taluk jun mukʼta tsatsal ikʼ, la sjines li na yoʼ bu oyik li lajunvoʼ xnichʼnabtak li Jobe, icham skotolik. Pe manchuk mi jech, li Jobe tun-o batel ta stojolal li Jeovae (Job 1:13-22).

Kʼalal chaʼloʼilaj xchiʼuk Satanás li Jeovae, laj yalbe ti tukʼ to yoʼonton li Jobe. Li Diabloe chchibalkʼopta to li stukʼilal Jobe, jech un chaʼa xi laj yalbee: Akʼbun akʼo jyayijes, vaʼun cha kʼel kʼu yelan cha xchopolkʼoptaot ta asat, xi. Vaʼun li Jeovae laj yakʼ akʼo syayijes Job li Satanase, pe laj yalbe ti akʼo mu smile.

 Li Satanase la snojesbe ta chin sjunul sbekʼtal li Jobe. Mu buchʼu skʼan xnopaj ta stsʼel, yuʼun toj tsots yikʼ li xchinale. Kʼalal to ta yajnil xi laj yale: «Tuchʼo ta utel li Diose, chaman xa», x-utat. Junantik yamigotak ta alele ay svulaʼanik li Jobe, mas to laj yakʼbeik yat yoʼonton, yuʼun laj yalik ti jaʼ la ta skoj ti yuʼun oy kʼusitik toj chopol spasoj ti jech oy ep svokole. Pe, manchuk mi akʼbat ep svokol yuʼun Satanás li Jobe, li stuke tukʼ-o itun batel ta stojolal li Jeovae (Job 2:1-13; 7:5; 19:13-20).

¿Kʼu van yelan laj yaʼi sba xa naʼ li Jeova kʼalal laj yil ti tukʼ yoʼonton laj yakʼ sba li Jobe?... Xmuyubaj tajmek, yuʼun xuʼ xi la stakʼbe li Satanase: ¡Kʼelo li Jobe! Chtun ta jtojolal yuʼun oy ta yoʼonton tskʼan tspas. ¿Mi jechot van kʼuchaʼal Job, ti xuʼ chal akʼoplal Jeova ti jaʼot jun skʼelobil sventa chakʼ ta ilel ti jaʼ jun jut kʼop li Satanase?... Jaʼ jun mukʼta matanal ti chi jtunutik ta stakʼobil li kʼusi la sbatsʼi al li Diabloe, ti xuʼ la tspas akʼo mu xa xtunik ta stojolal Jeova buchʼuuk krixchanoale. Ta melel, ta sventa li Jesuse jaʼ jun mukʼta matanal laj yil.

Li Mukʼta Jchanubtasvaneje muʼyuk bu laj yakʼ akʼo stsalat yuʼun Satanás sventa akʼo spas smul. ¡Nopo avaʼi kʼu to yepal imuyubaj yuʼun li sTote! Li Jeovae xuʼ laj yakʼ ta ilel li Jesuse xchiʼuk xuʼ xi la stakʼbe li Satanase: ¡Kʼelo li jNichʼone! Tukʼ-o tajmek yakʼoj sba ta jtojolal yuʼun skʼanojun, xi. Nopo avaʼi ek kʼu yelan imuyubaj li Jesús kʼalal laj yakʼ muyubajuk li sTote. Koliyal li ta smuyubajele, kuch yuʼun ti jokʼanbil ta teʼ ichame (Hebreos 12:2).

¿Mi cha kʼan jechot kʼuchaʼal li Mukʼta Jchanubtasvanej xchiʼuk ti chavakʼ muyubajuk li Jeovae?... Mi jaʼ jeche chano batel li kʼusi tskʼan Jeova akʼo xa pase, xchiʼuk ta me xavakʼ muyubajuk mi jaʼ jech cha pase.