KʼALAL chʼi li Jesús xchiʼuk laj yaʼi kʼu x-elan chabiat yuʼun Jeova kʼalal olol toʼoxe, ¿mi laj van skʼopon sventa tstojbe ta vokol xa naʼ?... ¿Kʼusi van laj yalbe xa naʼ li María xchiʼuk li José kʼalal laj yaʼi ti ikʼat batel ta Egipto sventa mu xichʼ milele?...

Ta melel, li Jesuse maʼuk xa jun uni olol xchiʼuk muʼyuk xa liʼ kuxul ta Balumile. Pe, ¿mi aviloj ti oy junantik krixchanoetik ta jkʼakʼaliltik ti tsnopik ti jaʼ to jun uni olol ti puchʼul ta veʼeb vakax li Jesuse?... Ta butikuk noʼox jaʼ jech ta xichʼ akʼel ta ilel li Jesuse, mas to li ta skʼakʼalil sVokʼel Ninyoe.

Manchuk mi muʼyuk xa liʼ oy ta Balumil li Jesuse, ¿mi kuxul to van xa naʼ?... Kuxul, ichaʼkuxesat yuʼun Dios, li avie jaʼ jun Ajvalil ti ep sjuʼel ta vinajele. Pe ¿kʼu van yelan xuʼ tskolta xa naʼ li yajtuneltake?... Kʼalal liʼ toʼox kuxul ta Balumil li Jesuse, laj yakʼ ta ilel ti xuʼ tskolta li buchʼutik skʼanojike. Jkʼeltik kʼu yelan la spas jun velta kʼalal te oy ta jun barko xchiʼuk li yajtsʼaklomtake.

Yuʼun xa ch-och akʼobal. Li Jesuse sjunul kʼakʼal te ichanubtasvan ta xokon nab  Galilea, ti jaʼ jun mukʼta nab ti yichʼoj lajcheb kilometro sjamleje xchiʼuk te van jtobuk kilometro snatile. Vaʼun xi laj yalbe li yajtsʼaklomtake: «Batic ta jot nab», xi. Jech un chaʼa, imuyik ta jun barko, lik jelavikuk. Li Jesuse luben tajmek, jaʼ yuʼun bat vayuk ta spat yut barko, te ipuchʼi ta jun xonjolil. Ta anil noʼox bat xchʼulel ta vayel.

Li yajtsʼaklomtake julavem ikomik sventa tsbeiltasik batel li barkoe. Lek toʼox kʼuuk sjalil, pe vaʼun xjumumet likel tal tsatsal ikʼ. Solel mas to tsatsaj tal li ikʼe, vaʼun mas to tsyukʼilan sba li nabe. Li voʼ ti tsyukʼilan sbae tsmajolan li barkoe, vaʼun lik nojuk ta voʼ.

Li jtsʼaklometike chiʼik mi chmuk yalel ta voʼ li barkoe. Pe li Jesuse jun yoʼonton te chvay ta spat yut li barkoe. Ta slajeb ne, li jtsʼaklometike la stijik li Jesuse xchiʼuk xi laj yalbeike: Jchanubtasvanej, Jchanubtasvanej, pojunkutik, yuʼun chi jchamutik li ta ikʼaloʼ liʼe, xutik. Kʼalal laj yaʼi taje, ilik li Jesuse, vaʼun xi laj yalbe li ikʼ xchiʼuk li nabe: ¡Anchanik! ¡Tsʼijlanik!, xut.

Vaʼun ta anil noʼox ichʼab li ikʼe, paj ta yukʼlajetel ek li nabe. Toj  chʼayel ikʼot yoʼontonik li yajtsʼaklomtake, yuʼun muʼyuk bu xilik-o jech. Xi ta xalbe sbaike: «¿Bochʼo vinical liʼi? Yuʼun cʼalal ta icʼ, cʼalal ta nab tspas ta mantal, pero chʼunbil smantal», xut sbaik (Lucas 8:22-25; Marcos 4:35-41).

Li voʼote, ¿mi xa naʼ buchʼu jaʼ li Jesuse?... ¿Bu chlik talel li smukʼta juʼele?... Ta sventa ti te oy ta stojolal yajtsʼaklomtak li Jesuse muʼyuk ixiʼik ti jechuke, yuʼun mu xkoʼolaj ta yan krixchano li Jesuse. Spas yuʼun kʼusitik labal sba ti mu spas yuʼun yan krixchanoe. Ta xkalbot avaʼi kʼusi la spas ta yan ikʼaloʼ.

Taje kʼot ta pasel ta tsʼakal. Jun kʼakʼal ti kʼalal chbat xa Kʼakʼale, li Jesuse laj yalbe yajtsʼaklomtak ti akʼo x-ochik ta barkoe, ti akʼo la xjelavik ta jot nab xchiʼuk ti akʼo te smalaike. Vaʼun stuk la stam batel sbe ta vits, ti jaʼ jun osil ti muʼyuk buchʼu te oy sventa tskʼopon sTot ti jaʼ li Jeova Diose.

 Li yajtsʼaklomtake ochik li ta barkoe, vaʼun lik xanavikuk batel li ta nabe. Pe mu jaluk ne, lik taluk ikʼ, solel tstsatsub tal li ikʼe. Akʼobaltik xa. Li viniketike la syalesbeik li smantail li barkoe, vaʼun lik svelik batel li voʼ sventa chanav batel li sbarkoike, pe muʼyuk bu nat chanav batel yuʼunik, yuʼun toj tsots chtal ikʼ ta stojolalik. Li barkoe xyal-xmuy ta skoj ti yuʼun tsyukʼilan sba li voʼe, vaʼun chnoj batel ta voʼ li barkoe. Li jtsʼaklometike chakʼik persa sventa chkʼotik ta stiʼ li nabe, pe mu xuʼ yuʼunik.

Lek xa jal te oy stuk ta vits li Jesuse. Jech un chaʼa, kʼalal laj yil ti oyik ta vokol li yamigotak ta skoj ti tsyukʼilan sba li nabe, yal tal kʼalal ta tiʼ nab. Ta skoj ti yuʼun tskʼan tskolta li yamigotake, li Jesuse lik xanavuk batel yoʼ bu oy li yajtsʼaklomtak li ta sba yukʼlajetel nabe.

¿Kʼusi van chkʼot ta atojolal xa naʼ ti cha xanav ta sba voʼe?... Cha muki yalel xchiʼuk xuʼ cha jikʼav. Pe li Jesuse jelel, yuʼun li stuke oy sjuʼel ti mu buchʼu jech yuʼune. Sventa chkʼot ti bu to oy li barkoe, toj nat ixanav. Jaʼ yuʼun, kʼalal laj yilik li jtsʼaklometik ti te xa chnopaj tal xchiʼuk ti chanav tal ta sba voʼ li Jesuse, jutuk xa mu tsakub osil. Li stukike mu xchʼunik li kʼusi yakal tskʼelike. Ixiʼik tajmek, lik avanikuk. Vaʼun, li Jesuse xi laj yale: «Mu me xaxiʼic, vuʼun Jesusun. Tsatsubtaso avoʼntonic», xi.

Kʼalal imuy ta barko li Jesuse, ichʼabi li ikʼaloʼe. Li jtsʼaklometike chʼayem yoʼonton komik yan velta. La snijan sbaik ta stojolal li Jesuse xchiʼuk xi laj yalbeike: «Ta melel voʼot Xnichʼonot li Diose», xutik (Mateo 14:22-33; Juan 6:16-21).

Ti jaʼuk-o li jkuxiutik xchiʼuk lajuk kiltik li skʼelobiltak juʼelal la spas li Jesuse, ¿mi mu van alakʼuk sba xa naʼ?... ¿Mi xa naʼ kʼu yuʼun la spasanan?... Yuʼun skʼanoj li yajtsʼaklomtake xchiʼuk tskʼan tskolta. Jech xtok, kʼalal la spas li skʼelobiltak juʼelal taje, la skʼan laj yakʼ ta ilel li smukʼta juʼelal ti oy yuʼune, xchiʼuk ti jaʼ ta stunes ta tsʼakal kʼalal ch-ajvalilaj ta Ajvalilal yuʼun Diose.

 Jaʼ no jech xtok li ta jkʼakʼaliltike, kʼalal li Satanás tskʼan tspajtsan yaʼi li yajtsʼaklomtak Jesús ta xcholbel yan krixchanoetik li aʼyej ta sventa li Ajvalilal yuʼun Diose, li Jesuse tstunilan sjuʼel sventa tskolta li yajtsʼaklomtake. Pe, muʼyuk bu tstunes sventa tskolta ta chamel o sventa chpoxta li yajtsʼaklomtake. Yuʼun kʼalal kʼot skʼakʼalile kʼalal ta yajtakboltak ichamik. Li Santiago ti jaʼ sbankil Juane, laj ta milel, li Juan xtoke la stikʼik ta chukel (Hechos 12:2; Apocalipsis 1:9).

Li avie jaʼ jech chkʼot ta pasel ek. Skotol li krixchanoetike ta x-ipajik xchiʼuk ta xchamik, akʼo mi chtunik ta stojolal Jeova o mi muʼyuk. Pe poʼot xa ta xjel skotol kʼalal ta spas mantal kʼuchaʼal Ajvalil ta Ajvalilal yuʼun Dios li Jesuse. Muʼyuk xa buchʼu kʼusi ta xiʼta, yuʼun li Jesuse ta stunes li sjuʼel sventa chakʼbe bendision skotol li buchʼutik chchʼunbeik smantale (Isaías 9:6, 7).