JLOM krixchanoetike chalik ti jaʼ noʼox ta xchʼunik li kʼusi chilike, pe taje mu xkʼot-o. Oy ep kʼusitik ti mu bu kilojtike, akʼo mi jech, te oyik. ¿Kʼusitik van taje?...

¿Mi xuʼ xkaʼitik li ikʼ ti chkichʼtike?... Toyo li akʼobe, juchʼtao. ¿Mi oy kʼusi chavaʼi?... Jech, jaʼ li ikʼe, pe ¿mi mu jechuk ti mu xkiltike?...

Ta kapituloetik ti jchanojtik xae laj yichʼ albel skʼoplal kuxlejaletik ti mu xvinajik ta kʼelele. La jchantik ti jlome lek yoʼontonik, pe li yane chopolik. ¿Mi xuʼ xavalbe sbi jlomuk li buchʼutik lekike?... Jech, te oy Jeova Dios, Jesús xchiʼuk li lekil anjeletike. ¿Mi yuʼun van oy chopol anjeletik ek chaʼa?... Li Vivliae chal ti oye. ¿Kʼusi la achan ta stojolalik leʼe?...

Akʼo mi lekil anjeletik o mi chopol anjeletik jnaʼojtik ti mas to xjelav yipike. Li Mukʼta Jchanubtasvaneje ep kʼusitik snaʼoj ta sventa li anjeletike, yuʼun kʼalal muʼyuk toʼox chvokʼ kʼuchaʼal jun neneʼ liʼ ta Balumile jaʼ toʼox jun anjel ek. Ta smiyonal noʼox anjeletik la xchiʼin ta naklej ta vinajel. ¿Mi oy sbi skotol li anjeletike?...

Laj xa jchantik ti Diose laj yakʼbe sbi li kʼanaletike. Jech un chaʼa, xuʼ xkaltik ta melel ti oy sbiik ek li anjeletike. Jech noxtok, jnaʼojtik ti ta xchiʼin sbaik ta loʼile, yuʼun li Vivliae chal ti oy skʼopojel li anjeletike (1 Corintios 13:1). ¿Kʼusi van chalik xa naʼ? ¿Mi ta van sloʼiltaik li buchʼutik liʼ oyik ta Balumile?...

Laj xa kiltik ti yaj-anjeltak Satanase tskʼanik ti mu jchʼunbetik smantal li Jeovae. Jaʼ yuʼun, oyikʼaluk van jaʼ ta xchapik kʼuxi tspas yuʼunik taje. Jaʼ tskʼanik ti xi jkoʼolaj kʼuchaʼal stukike sventa mu junuk  yoʼonton ta jtojolaltik li Jeovae. Pe ¿li lekil anjeletik ne? ¿Mi oyutik van ta yoʼontonik xa naʼ?... Oy, yuʼun tskʼan ta skoltautik. Ta xkalbot avaʼi kʼuxi ti jlom anjeletike, la skoltaan krixchanoetik ti skʼanojik Jeova xchiʼuk ti tspasbeik yabtele.

Jech kʼuchaʼal ta voʼnee oy toʼox jun vinik ti jaʼ sbi Daniel ti te toʼox nakal ta Babiloniae. Tee, jutuk krixchanoetik skʼanojik li Jeovae. La spasik jun mantal ti chal chichʼ akʼbel tstoj smul li buchʼu ta skʼopon Jeova Diose. Pe li Daniele muʼyuk bu laj yikta sba ta skʼoponel li Diose. ¿Mi xa naʼ kʼusi la spasbeik?...

Junantik chopol krixchanoetike la spasik ti akʼo sjipik ochel ta yut xchʼen leonetik li Daniele. Li Daniele te joyobtabil ta leonetik ti chviʼnajike. ¿Kʼusi kʼot ta stojolal?... Li Daniele xi ta xchapbutike: «Li Dios cuʼune la stac tal yajʼalmantal; jaʼ la smacbe ye li  leonetique», xi. ¡Mu kʼusi pasbat! Li anjeletike spas yuʼunik kʼusitik labal sba ta stojolal li yajtuneltak Jeovae (Daniel 6:18-22).

Jun veltae li Pedroe laj yichʼ tikʼel ta chukel, chvul van ta ajol ti jaʼ toʼox yamigo li Mukʼta Jchanubtasvanej Jesucristoe. Kʼalal laj yal Pedro ti jaʼ xNichʼon Dios li Jesuse, li jlom krixchanoetike ilinik ta stojolal. Jech oxal, la stikʼik ta chukel, pe sventa mu xjatav li Pedroe laj yakʼik soltaroetik. ¿Mi oy van buchʼu xuʼ tskolta?...

Li Pedroe chabibil chvay ta chaʼvoʼ soltaroetik xchiʼuk chukbil ta kadena li skʼobtake. Pe li Vivliae xi ta xale: ¡Kʼelavil! Ta ora noʼox te vinaj jun yaj-anjel Jeova. Toj sakubel noʼox ikʼot li yut chukinabe. Li  anjele la stijbe xokon li Pedroe, la stij likel, vaʼun xi laj yalbee: «Lican ta ora», xut.

Kʼalal jech kʼot ta pasel taje, kol lokʼel li kadena ta skʼob li Pedroe, vaʼun li anjele xi laj yale: Lapo ta anil akʼuʼ, lapo axonob, batik, xi. Li soltaroetike muʼyuk paj yuʼunik, yuʼun jaʼ jun anjel ti buchʼu la skolta li Pedroe. Vaʼun kʼotik ta jun tiʼna ti pasbil ta tsatsal takʼine, vaʼun oy kʼusi yan sba kʼot ta pasel: jam stuk li tiʼnae. Li anjele la skolta lokʼel li Pedroe, yuʼun sventa chchol-o batel li mantale (Hechos 12:3-11).

¿Mi xuʼ van skoltautik ek li yaj-anjeltak Diose?... Ta melel xuʼ yuʼunik. Pe taje, ¿mi jaʼ van tskʼan chal ti muʼyuk chkil-o jvokoltike?... Moʼoj. Mi yalel ta jsaʼ jvokoltike, li anjeletike muʼyuk ta skoltautik. Pe oy bakʼintike ta xkil jvokoltik manchuk mi muʼyuk kʼusi xibal sba ta jpastik. Li Diose muʼyuk yalojbe mantal anjeletik ti akʼo xchabiutik ta skotol orae. Pe oy yan tsots yabtel akʼbilik.

Li Vivliae chalbe skʼoplal jun anjel ti yakal chalbe krixchanoetik ta buyuk noʼox ti akʼo yichʼik ta mukʼ li Diose (Apocalipsis 14:6, 7). ¿Kʼuxi ta spas taje? ¿Mi yuʼun tsots ta x-avan tal ta vinajel sventa xaʼi skotol li krixchanoetike?... Moʼoj. Jaʼ li yajtsʼaklomtak Jesús ta Balumil li buchʼutik ta xalbeik skʼoplal li Diose, li anjeletike jaʼ ta xbeiltasvanik li ta chol mantale. Li anjeletike jaʼ tskʼelik lek ti akʼo xaʼiik mantal li buchʼutik tskʼan chojtikinik ta melel li Diose. Voʼotike xuʼ jpastik li abtelal liʼe, li anjeletike ta xi skoltautik.

Pe, ¿kʼusi van ta jpastik kʼalal mi ta saʼutik ta kʼop krixchanoetik ti muʼyuk skʼanojik Diose? ¿Mi la stikʼutik ta chukel ne? ¿Mi ta van skoltautik lokʼel li anjeletike?... Spas yuʼunik, pe mu skotoluk velta jech ta spasik.

Jun veltae, jun yajtsʼaklom Jesús ti jaʼ sbi Pabloe, ikʼbil batel ta jun barko kʼuchaʼal jun jchukel jaʼo kʼalal oy tsatsal ikʼe. Pe li anjeletike muʼyuk la skoltaik lokʼel ta anil, yuʼun oy yan krixchanoetik ti skʼan to xaʼiik ta sventa li Diose. Xi albat yuʼun jun anjele: «Pablo, mu me  xaxiʼ. Ta persa chacʼot ta stojol li mucʼta ajvalil César ta Romae», x-utat. Li Pabloe laj yichʼ ikʼel batel ta stojolal li ajvalil ta Romae sventa chcholbe mantal. Li anjeletike snaʼojik onoʼox bu oy li Pabloe, xchiʼuk la stsatsubtasbeik yoʼonton. Ta stsatsubtasbutik koʼontontik ek mi tukʼ ta jpasbetik yabtel li Diose (Hechos 27:23-25).

Li anjeletike oy to yan tsots skʼoplal yabtel akʼbilik ti skʼan spasike, taje poʼot xa ta spasik. Mu xa jaluk skʼan sventa x-akʼbat slajelik yuʼun Dios li buchʼutik chopolike, xchiʼuk li buchʼutik mu xichʼik ta mukʼe. Li buchʼu chalik ti mu xchʼunik ta stojolal li anjeletik ta skoj ti mu xil ta satike, ta xakʼik venta ti chʼayemike (2 Tesalonicenses 1:6-8).

¿Kʼusi tskʼan chalbutik taje?... Mi ta xkakʼ jbatik ta stojolal li yaj-anjeltak Diose, ta xi skoltautik. Pe ¿mi kakʼoj jbatik ta stojolalik?... Chkakʼ jbatik ta stojolalik mi ta jpasbetik yabtel li Jeovae. Mi ta jpasbetik li yabtele, ta jtijbetik yoʼonton yan krixchanoetik sventa jech tspasik ek.