KʼALAL tspasik kʼusitik lek li ololetike, ta xakʼ muyubajikuk li buchʼutik chchabiatike. Kʼalal oy kʼusi lek tspas li jun uni tsebe, li stote xmuyubaj chalbe yantik: «Liʼi jaʼ kuni tseb», xi. Mi oy kʼusitik lek tspas li jun uni kereme, li stote xmuyubaj ta xal: «Liʼi jaʼ kuni kerem», xi.

Li Jesuse jaʼ onoʼox ta spas li kʼusitik lek chil li sTote. Jaʼ yuʼun xmuyubaj yoʼonton li sTote. ¿Mi xvul to ta ajol li kʼusi la spas sTot Jesús kʼalal te toʼox oyik xchiʼuk oxvoʼ yajtsʼaklomtak li Jesuse?... Li Diose kʼopoj tal ta vinajel xchiʼuk xi laj yale: «Liʼi jaʼ jnichʼon, lec jcʼanoj. Lec jpatoj coʼnton yuʼun», xi (Mateo 17:5).

Li Jesuse xmuyubaj ta spasel li kʼusitik ch-albat yuʼun li sTote. ¿Mi xa naʼ kʼu yuʼun? Yuʼun skʼanoj ta melel li sTote. Mi oy buchʼu sujbil ta spas kʼusitikuke, toj tsots ta pasel chaʼi. Pe kʼalal ta sjunul yoʼonton ta spase, kʼun ta pasel chaʼi. ¿Mi xa naʼ kʼusi skʼan chal li kʼusi jun koʼontontik ta jpastik kʼusitikuke?... Jaʼ skʼan chal ti ta jkʼan ta jpastik ta melele.

Kʼalal muʼyuk toʼox talem ta Balumil li Jesuse, ta sjunul yoʼonton la spas stekel li kʼusi albat yuʼun li sTote. La spas yuʼun skʼanoj tajmek li Jeova Diose. Li yabtel Jesús ta vinajel kʼalal te toʼox oy xchiʼuk sTote, toj yan sba yutsil. Pe li Diose oy toʼox jun yabtel ti tsots skʼoplal ti chakʼbe spas li Jesuse. Sventa tspas li abtel taje, li Jesuse skʼan ta xikta li vinajele. Li stuke skʼan ta x-ayan kʼuchaʼal neneʼ olol liʼ ta Balumile. Li Jesuse ta sjunul yoʼonton la spas, yuʼun li Jeovae jaʼ tskʼan ti akʼo jech spase.

Sventa ch-ayan ta Balumil li Jesuse, skʼan oyuk smeʼ. ¿Mi xa naʼ buchʼu jaʼ?... Li sbie jaʼ María. Te ta vinajele li Jeovae la stak tal li anjel  Gabriel sventa chalbe li María ti ta xil jun yuni ole, xchiʼuk ti Jesús ta sbiin li neneʼe. ¿Buchʼu van jaʼ li stote?... Li anjele laj yal ti jaʼ li Jeova Diose. Jaʼ yuʼun li Jesuse xNichʼon Dios ta sbiin.

¿Kʼusi van laj yal xa naʼ li Mariae?... ¿«Moʼoj, mu jkʼan ti voʼon smeʼun li Jesuse», mi xi van? Moʼoj, li stuke ta sjunul yoʼonton la spas li kʼusi tskʼan ti Diose. Pe, ¿kʼuxi xuʼ ta x-ayan ta Balumil li xNichʼon Dios ti te toʼox kuxul ta vinajele? ¿Kʼu yuʼun mu xkoʼolaj ti kʼuyelan ayan Jesús jech kʼuchaʼal ch-ayan yan ololetike? ¿Mi anaʼoj?...

Jech un chaʼa, li Diose, kʼalal la spas li baʼyel jtot jmeʼtik, li Adán xchiʼuk Evae, toj alakʼ sba la spasanan. Yuʼun xuʼ ta xchiʼin sbaik sventa chlik chʼiuk jun uni olol ta yav yalajeb li meʼile. Li krixchanoetike chalik ti taje jaʼ jun skʼelobil juʼelal, voʼone chkal ta melel ti jaʼ jech cha nop eke.

Pe, li Diose la spas jun skʼelobil juʼelal ti mas to yan sba yutsile. La stsakbe li xkuxlejal xNichʼon te ta vinajele, vaʼun laj yakʼbe ta yav yalajeb li Mariae. Ta voʼnee, li Diose muʼyuk bu jech spasoj kʼuchaʼal taje, xchiʼuk muʼyuk bu la spas jech yan velta xtok. Ta skoj li skʼelobil juʼelal taje, li Jesuse te ichʼi ta yav yalajeb li Mariae, ichʼi jech kʼuchaʼal buchʼuuk ololal. Tsʼakal ne, li Mariae inupun xchiʼuk José.

Kʼalal kʼot skʼakʼalil ti ch-ayan li Jesuse, te oyik ta vulaʼal ta steklumal Belén li María xchiʼuk Josee. Ta skoj ti yuʼun toj ep krixchanoetik tee, muʼyuk bu la sta snail bu chvayik. Jaʼ yuʼun te ikomik ta snail  sveʼeb vakaxetik. Li Mariae te ayan yuʼun li Jesuse, xchiʼuk la xpuchʼan ta jun sveʼeb vakax, jech kʼuchaʼal cha kʼel li ta lokʼole. Jun sveʼeb vakaxe jaʼ yavil bu chichʼ akʼbel sveʼel vakaxetik xchiʼuk yan chonbolometik.

Ta yakʼobalil kʼalal ayan li Jesuse, oy kʼusitik toj labalik sba kʼotanan ta pasel. Te ta stsʼel Belene laj yakʼ sba ta ilel jun anjel ta stojolal junantik jkʼel chijetik. Li anjele laj yalanbe ti toj tsots skʼoplal li Jesuse. Li anjele xi laj yale: ¡Kʼelavilik! Yakal ta xkalboxuk lekil aʼyejetik ti cha muyubajik yuʼune. Li avie, ayan xa li buchʼu tskolta li krixchanoetike, xi (Lucas 2:10, 11).

Li anjele laj yalanbe li jkʼel chijetik ti te tstaik ta Belén li Jesuse, xchiʼuk ti puchʼul ta sveʼeb vakax ta staike. Jaʼ to yilike, li yan anjeletik ta vinajel xchiʼuk li baʼyel anjele, lik skʼejintabeik yutsilal li Diose.  Xi kʼejinike: Ichʼbiluk ta mukʼ li Diose, xchiʼuk junuk yoʼontonik li krixchanoetik ti lek ilbilik yuʼun Dios liʼ ta Balumile, xiik (Lucas 2:12-14).

Kʼalal ichʼayik batel li anjeletike, li jkʼel chijetike batik ta Belén, te la staik li Jesuse. Te laj yalbeik li José xchiʼuk María li lekil aʼyejetik ti laj yaʼiike. ¿Mi xnop avuʼun ti kʼu to x-elan imuyubaj li María ta skoj ti yuʼun jaʼ la svokʼes li Jesuse?

Tsʼakal ne, li José xchiʼuk li Mariae laj yikʼik batel ta Nazaret li Jesuse, vaʼun te ichʼi. Kʼalal la sta svaʼleje, lik spas un li mukʼta abtel ta sventa li chanubtasvaneje. Taje jaʼ li jvokʼ abtel ti skʼan Jeova Dios akʼo spas li xNichʼon liʼ ta Balumile. Li Jesuse ta sjunul yoʼonton la spas, yuʼun skʼanoj ta skotol yoʼonton li sTot ta vinajele.

 Kʼalal muʼyuk toʼox likem yabtel kʼuchaʼal Mukʼta Jchanubtasvaneje, akʼbat yichʼ voʼ ta ukʼum Jordán yuʼun li Juan J-akʼvanej ta voʼe. Vaʼun oy kʼusi labal sba kʼot ta pasel. Kʼalal ilokʼ ta voʼ li Jesuse, kʼopoj tal ta vinajel li Jeovae xchiʼuk xi laj yale: «Liʼi jaʼ Jnichʼon, lec jcʼanoj, lec jpatoj coʼnton yuʼun», xi (Mateo 3:17). ¿Mi mu meleluk ti jun avoʼonton chavaʼi aba ti kʼalal cha yalbikot ti skʼanojikot li atot ameʼe?... Xuʼ jnoptik ta melel ti jaʼ jech laj yaʼi sba ek li Jesuse.

Li Jesuse jaʼ onoʼox la spasilan li kʼusitik leke. Li stuke muʼyuk bu la skuy sba ta yan ti kʼusi maʼuke. Jech xtok muʼyuk bu laj yal ti jaʼ Dios li stuke. Li anjel Gabriele laj onoʼox yalbe María ti xNichʼon Dios ta sbiin li Jesuse. Li Jesuse laj onoʼox yal stuk ti jaʼ Nichʼonil yuʼun li Diose. Li stuke muʼyuk bu laj yal ti jaʼ mas snaʼe, ti jaʼ mu snaʼ li sTote. Moʼoj, li stuke xi laj yale: «Yuʼun ti stuque xʼechʼ to jelavem scʼoplal, jaʼ mu sta ti vuʼune», xi (Juan 14:28, Ch).

Jech xtok, kʼalal te toʼox kuxul ta vinajel li Jesuse, la spas li kʼusitik albat yuʼun li sTote. Li stuke skʼanoj li sTote, jaʼ yuʼun laj yaʼibe li smantale. Jech un chaʼa, kʼalal ital liʼ ta Balumile, li Jesuse la spas li kʼusitik albat yuʼun li sTote. Muʼyuk bu la xchʼay skʼakʼal ta spasel kʼusitik yan. Jech un chaʼa, muʼyuk bu labal chkaʼitik ti jun yoʼonton ta stojolal xNichʼon li Jeovae.

Voʼotike ta jkʼan ta jlekubtasbetik yoʼonton ek li Jeovae, ¿mi mu jechuk?... Vaʼun chaʼa, skʼan chkakʼtik ta ilel ta melel ti chkaʼibetik li Diose, jech kʼuchaʼal la spas li Jesuse. Li Diose chi skʼoponutik ta Vivlia. Muʼyuk me lek ti ta xkaʼibetik yileluk li Diose, xchiʼuk tsʼakal ta jchʼuntik xchiʼuk ta jpastik li kʼusitik skontrainoj li Vivliae, ¿mi mu jechuk?... Xchiʼuk vuleso ta ajol, mi jkʼanojtik ta melel li Jeovae, chi jmuyubajutik ti ta jlekubtasbetik yoʼontone.