¿MI OY avabinojbe junuk velta sloʼilal li slajeb balumile?... Taje jaʼ jun loʼil ti chichʼ alilanel ta jkʼakʼaliltike. Junantik krixchanoetike ta snopik ti jaʼ la krixchanoetik ta slajesik ta jun paskʼop ti bu tstunesik vomba atomikaetike. Yantik krixchanoetike tsnopik ti jaʼ la Dios li buchʼu tslajes li jkʼupil Balumiltike. ¿Kʼusi cha nop li voʼote?...

Jech kʼuchaʼal jchanojtik xae, li Vivliae ta xalbe sloʼilal li slajeb balumile. «Li banamile [...] ta onoʼox xlaj», xi (1 Juan 2:17). ¿Mi jaʼ van skʼan xal xa naʼ ti yuʼun chlaj li jBalumiltike?... Moʼoj, yuʼun li Vivliae ta xalbe smelolal ti Diose la  spas li Balumil «sventa acʼo oyuc bochʼo te chnaquie», sventa akʼo xkuxiik xchiʼuk akʼo xmuyubajik te li krixchanoetike (Isaías 45:18). Ta Salmo 37:29 ta SCʼop Dios ta Chamula xi ta xale: «Ti buchʼu oy slequil ti cʼusi ta spasique, ta xrextoinic ti banomile, sbatel osil ta xnaquiic tey», xi. Ta skoj taje, li Vivliae ta xal xtok ti Balumile te oy-o sbatel osil (Salmo 104:5; Eclesiastés 1:4).

Ti mi maʼuk slajeb batsʼi Balumil li slajeb balumile, ¿kʼusi smelolal un chaʼa?... Sventa ta jnabetik li stakʼobile, jkʼeltik li kʼusi kʼot ta pasel ta skʼakʼalil li Noee. Li Vivliae xi ta xalbe smelolale: «Ta sventa pulel ta voʼ ichʼay li banamile», xi (2 Pedro 3:6).

¿Mi oy buchʼu kuxul ikom li ta mukʼta nojelal ta voʼ ti la slajes li balumil ta skʼakʼalil li Noee?... Li Vivliae ta xal ti Diose «cʼajomal noʼox laj scolta ti Noee, ti buchʼu laj yalbe scʼoplal ti lequil tuqʼuil xcuxlejale, xchiʼuc ti yan vucvoʼe», kʼalal «laj stac talel nojel ta voʼ ta stojolic ti chopol jnaclejetic ta banomile» (2 Pedro 2:5, Ch).

Vaʼun chaʼa, ¿kʼusi balumilal ti laje: mi jaʼ li batsʼi Balumile, o mi jaʼ li chopol krixchanoetike?... Li Vivliae ta xal ti jaʼ li «chopol jnaclejetic ta banomile». Kʼelo noxtok ti Noee laj yichʼ biiltasel kʼuchaʼal «buchʼu laj yalbe scʼoplal lequil tuqʼuil xcuxlejale», jaʼ xkaltik, ti jaʼ toʼox jun jchol mantale. ¿Kʼusi van la xchol xa naʼ?... La xcholbe li krixchanoetik ti chnopaj xaʼox tal li slajeb li «lum banomil ta voʼnee».

Kʼalal laj yalbe skʼoplal li mukʼta Nojelal ta voʼ li Jesuse, laj yalbe li yajchankʼoptak li kʼusitik toʼox tspasik li krixchanoetik kʼalal yuʼun xaʼox chtal li slajeb balumil taje. Liʼe jaʼ li kʼusi laj yalanbee: «Cʼalal muʼyuk toʼox chtal li pulel ta voʼe jaʼ noʼox batem ta yoʼntonic saʼel sveʼelic, ta xnupinic, xchiʼuc ta xacʼ ta malijel stsebic. Jaʼ to iquechaj yuʼunic ti cʼalal iʼoch ta barco li Noee. Muc xchʼunic ti chtal li pulel ta voʼe. Jaʼ to la xchʼunic ti cʼalal itale, pero ilaj o scotolic», xi. Li Jesuse laj yal xtok ti kʼalal skʼan to xlaj li balumil li ta jkʼakʼaliltike, jaʼ jech ta spasik ek li krixchanoetike (Mateo 24:37-39).

 Li kʼusitik laj yal li Jesuse ta xakʼbutik ta ilel ti oy kʼusi xuʼ ta jchantik ta sventa li kʼusitik tspasik toʼox li krixchanoetik kʼalal muʼyuk toʼox talem li Nojelal ta voʼe. Ta kapitulo 10 yuʼun li livro liʼe laj xa jkʼeltik kʼu yelan toʼox li stalelalike. ¿Mi xvul to ta ajol?... Junantik krixchanoetike toj simaronik toʼox xchiʼuk toj echʼ noʼox tsaʼik kʼop. Pe jutuk mu skotoluk li krixchanoetik jech kʼuchaʼal laj yal li Jesuse, muʼyuk bu la stukʼulanik li kʼusi takbatik ta albel yuʼun Dios ta stojolal li Noee.

Pe vaʼun, kʼot skʼakʼalil ti Jeovae laj yalbe li Noé ti ta slajes ta jun nojelal ta voʼ li chopol krixchanoetike. Li voʼe ta smuk skotol li Balumile, kʼalal to ta mukʼtik tayal vitsetik mukul chkom. Li Jeovae laj yalbe Noé ti akʼo spas jun mukʼta arkae. Xkoʼolaj kʼuchaʼal jun mukʼta natil kaxa, jech kʼuchaʼal chavil li ta lokʼol ta pajina 238.

Li Jeovae laj yalbe li Noé ti toj jmukʼuk akʼo spas li arkae, yuʼun jaʼ te chkol-o stuk xchiʼuk li yutsʼ yalale, xchiʼuk epal chonbolometik. Toj tsots abtejik li Noé xchiʼuk li yutsʼ yalale. La xtuchʼik mukʼtik teʼetik, vaʼun lik smeltsanik-o li arkae. Ta skoj ti yuʼun toj echʼ noʼox mukʼe, echʼ ep jabiletik sventa tsuts yuʼunik.

Kʼalal jaʼo yakal spas arka li Noee, ¿kʼusi yan abtelal la spas?... La xchol mantal sventa chalbe li krixchanoetik ti chtal jun nojelal ta voʼe. ¿Mi oy buchʼu aʼibat? Jaʼ noʼox li yutsʼ yalale. Li yantike jaʼ noʼox batem yoʼontonik ta spasel yan kʼusitik. ¿Mi xvul to ta ajol kʼusi laj yal Jesús ti tspasike?... Chveʼik, ch-uchʼbajik xchiʼuk chnupunik. Muʼyuk bu snopojik mi jaʼik chopol krixchanoetik, jech un chaʼa muʼyuk bu la xchʼak skʼakʼalik sventa chaʼibeik li Noee. Jkʼeltik kʼusi kʼot ta stojolalik.

Kʼalal ochemik xaʼox ta yut arka li Noé xchiʼuk li yutsʼ yalale, li Jeovae la smakbe li stiʼ arkae. Li yantik krixchanoetike mu toʼox xchʼunik mi chtal li nojelal ta voʼe. ¡Jaʼ to laj yilike, lik taluk li voʼe! Pe mu jechuk kʼuchaʼal onoʼox chakʼ voʼe, yuʼun taje toj tsots ta jyalel.  Ta anil noʼox ayan mukʼtik ukʼumetik ti xlomomet noʼox tajmeke. Li ukʼume la slomes mukʼtik teʼetik xchiʼuk la xjoch mukʼtik tonetik jech kʼuchaʼal bikʼtal tonetik yileluk. ¿Kʼusi kʼot ta stojolalik li buchʼutik muʼyuk te oyik ta yut arkae?... Li Jesuse xi laj yale: Ital «li pulel ta voʼe [...] pero ilaj o scotolic», xi. Muʼyuk buchʼu kuxul ikom. ¿Kʼu yuʼun?... Yuʼun jech kʼuchaʼal laj yalbe smelolal li Jesuse, «muc xchʼunic ti chtal li pulel ta voʼe». Muʼyuk bu laj yaʼiik li kʼusi takbatik ta albele (Mateo 24:39; Génesis 6:5-7).

Pe mu me xchʼay ta ajol ti laj yal Jesús ti chtun kuʼuntik ta xchanobil li kʼusitik kʼot ta pasel taje. ¿Kʼusi ta xchanubtasutik?... Veno, mu jaʼuk noʼox ta skoj xchoplejalik ti laj yichʼik lajesel li krixchanoetik taje, yuʼun toj ep li buchʼutik jaʼ noʼox batem yoʼontonik ta spasel kʼusitik yan ti muʼyuk xa yorail yuʼunik sventa chchanik ta stojolal li Diose xchiʼuk li kʼusi ta toʼox spase. Li voʼotike skʼan ta jchabi jbatik sventa mu jechuk xkʼot ta jtojolaltik ek, ¿mi mu jechuk?...

¿Mi ta van xchaʼlajes ta jun nojelal ta voʼ li balumil li Diose?... Moʼoj, li stuke laj yal ta melel ti muʼyuk xa bu jech ta spase. Xi laj yale: «Jaʼ li vacnabal laj cacʼ ta vinajele, jaʼ senyail», xi. Li Jeovae laj yal ti vaknakʼobale, jaʼ chtun sventa senyail ti muʼyuk xa ta xchaʼtal jun nojelal ta voʼ sventa chules li kʼusitik oy sbekʼtale (Génesis 9:11-17).

Jech oxal chaʼa, xuʼ ta jchʼuntik ta melel ti muʼyuk xa bu ta xchaʼlajes ta jun nojelal ta voʼ li balumil li Diose. Pe, jech kʼuchaʼal jkʼelojtik xae, li Vivliae ta xal ti ta onoʼox xlaj li  avi balumile. ¿Buchʼutik ta xkolik kʼalal ta slajes li Diose?... ¿Mi jaʼ van li buchʼutik batem yoʼontonik ta spasel yan kʼusitik ti muʼyuk la skʼan la xchanik ta sventa li Diose? ¿Mi jaʼ van li buchʼutik muʼyuk skʼakʼalil yuʼunik sventa la xchanik li Vivliae? ¿Kʼusi cha nop li voʼote?...

Li voʼotike ta jkʼan te oyutik ta stojolalik ek li buchʼutik ta skolta li Jeovae, ¿mi mu jechuk?... ¿Mi mu van alakʼuk sba ti jechuk kutsʼ kalaltik jech kʼuchaʼal yuʼun Noé, xchiʼuk ti tskoltautik jkotoltik li Jeovae?... Pe sventa kuxul chi jkom li ta slajeb balumile, baʼyel skʼan ta xkaʼibetik smelolal kʼu yelan ta slajes li Diose xchiʼuk kʼu yelan ta xichʼ tal li tukʼil achʼ balumil yuʼune. Jkʼeltik kʼu yelan ta spas.

Li Vivliae ta xalbe smelolal te ta Daniel, kapitulo 2, versikulo 44. Li teksto liʼe xi ta xalbe skʼoplal li jkʼakʼaliltike: «Cʼalal jaʼo ochemic ta ajvalilal li ajvaliletic leʼe, li Dios te oy ta vinajele ta sliques jun ajvalil; muʼyuc bochʼo xuʼ chtuchʼbat yabtel, mu junuc lum chtal tsalatuc yuʼun. Jaʼ ta stsal, jaʼ ta slajesbe scʼoplal scotol li yantic ajvaliletique; yan li stuque jʼechʼel te chcom o sbatel osil», xi.

¿Mi xavaʼibe kʼusi smelolal taje?... Li Vivliae ta xal ti ajvalilal yuʼun Diose ta slajes skotol li ajvaliletik liʼ ta Balumile. ¿Kʼu yuʼun?... Yuʼun mu xchʼunbeik smantal li Ajvalil ti biiltasbil yuʼun Diose. ¿Buchʼu jaʼ leʼe?... Jaʼ li Jesucristoe.

Li Jeova Diose oy sderecho sventa tstʼuj buchʼu junukal ajvalilal ti mas leke, xchiʼuk jaʼ stʼujoj sventa jaʼuk Ajvalil li xNichʼone, jaʼ li Jesuse. Jutuk xa skʼan skʼakʼalile, li Ajvalil taje tsbeiltasbe echʼel li slajelal skotol li ajvaliletik ta Balumile. Te ta Vivlia, ta slivroal Apocalipsis, kapitulo 19, versikulo 11 kʼalal to ta 16, ta xalbutik kʼu yelan ta spas. Sventa xa naʼe xuʼ xa kʼel li lokʼol ti te oy ta yan pajinae. Li Vivliae, Armagedón ta sbiiltas li paskʼop yuʼun Dios ti bu ta slajes skotol li ajvaliletik ta balumile.

Li Diose ta xalbutik ti jaʼ ta stojolal Ajvalilal yuʼun ti tslajes li ajvaliletik  ta balumile, pe ¿mi chalbutik ti akʼo jkoltatik ta slajesele?... Moʼoj, li Vivliae ta xal ti Armagedone jaʼ li «mucʼta pleito ta scʼacʼalil yuʼun Dios ti echʼem svuʼele» (Apocalipsis 16:14, 16). Jaʼ jech, li Armagedone jaʼ li paskʼop yuʼun Diose, xchiʼuk li Jesucristoe jaʼ li buchʼu ta sbeiltas li anjeletik ta vinajel li ta paskʼop taje. ¿Mi poʼot xa van ta xlik li paskʼop taje? Jkʼeltik kʼuxi xuʼ ta jnaʼtik.