¿MI XAVOJTIKIN ololetik ti chalik ti jaʼ mas tsotsik xchiʼuk ti tsaʼilanik kʼope?... ¿Mi lek chavaʼi ti te oyot xchiʼukike? ¿O mi jaʼ mas lek chavaʼi cha chiʼin li buchʼutik lek yoʼontonik xchiʼuk mu snaʼ saʼik kʼope?... Li Mukʼta Jchanubtasvaneje xi laj yale: «Xcuxet noʼox yoʼnton li bochʼo yacʼoj svocolic ta spajesel cʼope; jaʼ xnichʼnabtac Dios, xi scʼoplalic», xi (Mateo 5:9).

Pe bakʼintike, chi j-ilinutik ta skoj li kʼusitik tspasik li yan krixchanoetike, ¿mi mu jechuk?... Jaʼ yuʼun bakʼintike ta jkʼan ta jpaktik sutel. Jaʼ jech kʼot ta stojolalik li yajtsʼaklomtak Jesús ti kʼalal jaʼo te xbatik ta sbelel Jerusalene. Ta xkalbot avaʼi kʼusi kʼot ta pasel.

Kʼalal nat xa xanavemik batel li ta bee, li Jesuse la stak batel jayvoʼuk yajtsʼaklomtak te ta jun bikʼit lum ta yosilal Samaria sventa tsaʼik bu ch-echʼ yuʼunik akʼobal. Pe li krixchanoetik li ta bikʼit lum taje mu skʼanik ti te chkomike, yuʼun jaʼ ta skoj ti yan srelijionike. Jech xtok, li jsamariaetike muʼyuk bu lek chilik li buchʼutik  chbatik ta Jerusalén sventa chbat smuyubtaik li Diose.

Ti voʼotuk ikʼot ta atojolal taje, ¿kʼusi van laj apas jechuke? ¿Mi la ilin van? ¿Mi laj van akʼan la apak sutel?... Taje jaʼ li kʼusi la skʼan la spasik li jtsʼaklom Santiago xchiʼuk Juane. Xi laj yalbeik li Jesuse: ¿Mi cha kʼan ta jkʼankutik akʼo yaluk tal kʼokʼ ta vinajel sventa akʼo xlajik?, xutik. Muʼyuk bu labal chkaʼitik chaʼa ti Xnichʼnab Chauc akʼbat sbiinik yuʼun li Jesuse. Li Jesuse laj yal ti muʼyuk lek ti jaʼ jech ta spasbeik li yantik jech kʼuchaʼal taje (Lucas 9:51-56; Marcos 3:17).

Melel onoʼox ti chopol tspas sbaik bakʼintik ta jtojolaltik li krixchanoetike. Oyikʼal van mu skʼan xa xchiʼinoxuk ta tajimol li yan ololetike. Xuʼ van xi cha yalboxuke: «Mu jkʼanotkutik liʼi», xuʼ van xiik. Kʼalal jech chkʼot ta jtojolaltik taje, ¿mi mu meleluk ti chopol chkaʼi jbatike? Oyikʼal van ta jkʼan ta jpaktik sutel. Pe ¿mi skʼan ta jpaktik?...

¿Kʼu yuʼun mu xa saʼ tal aVivlia? Ta jkʼeltik Proverbios, kapitulo 24, versikulo 29. Tee xi ta xale: «Mu me jechuc xanop: “Ti cʼu xʼelan la spasbune jaʼ jech ta jpasbe yaʼay ec; acʼo spas yaʼay ec ti cʼu xʼelan la spasbune”, mu me xachi», xi.

¿Kʼusi van skʼan xal chavaʼi li jpʼelantik kʼop taje?... Jaʼ skʼan chal ti mu stakʼ jpaktik sutel li kʼusi chkichʼtik pasbele. Mu me chopoluk jpas jbatik ta stojolal jun krixchano ta skoj noʼox ti yuʼun chopol la spas sba ta jtojolaltik li stuke. Pe ¿ati mi oy buchʼu cha saʼot ta kʼope? Oyikʼal van chalbot kʼusitik chopol sventa chkap ajol, cha stseʼintaot xchiʼuk cha yalbot ti yuʼun cha xiʼe. Nopo avaʼi ti xi cha yalbote: jxiʼelot, ti xa yute. ¿Kʼusi skʼan cha pas? ¿Mi xuʼ van cha takʼbe xchiʼuk cha maj aba xchiʼuk?...

Jchaʼkʼeltik li kʼusi chal li Vivliae. Saʼo Mateo, kapitulo 5, versikulo 39. Xi chalbutik li Jesuse: «Mu me xapacbeic sutel li bochʼo chopol cʼusi chaspasboxuque. Me oy bochʼo chasmajboxuc jot xocon abatsʼisatique, acʼo smajboxuc noxtoc li yan jote», xi. ¿Kʼusi van la  skʼan laj yal xa naʼ li Jesuse? ¿Mi jaʼ van tskʼan chal ti mi oy buchʼu xmichʼoj skʼob tsmajbot jot xokon asat ti akʼo xavakʼbe smaj li yan jot xtoke?...

Moʼoj, li Jesuse maʼuk la skʼan laj yal taje. Jmoj tʼaxel ta majele mu xkoʼolaj xchiʼuk li jmoj majel ti jmichʼoj jkʼobtike. Li tʼaxel ta majele jaʼ xkoʼolaj kʼuchaʼal xujel noʼox batel. Li buchʼu chtʼaxbutik majel o chi xujutik batele oyikʼal van tskʼan tsaʼ majbail. Tskʼan akʼo xi j-ilinutik. Mi chi j-ilinutik xchiʼuk ta jxujtik batel eke, ¿kʼusi chkʼot ta pasel?... Xuʼ van ta jmaj jbatik xchiʼuk.

Pe li Jesuse mu skʼan ti akʼo smaj sbaik li yajtsʼaklomtake. Jaʼ yuʼun laj yal ti mu me jpaktik sutel mi oy buchʼu chtʼaxbutik majel ta jsatike. Skʼan mu xi j-ilinutik mi jaʼuk ta jmaj jbatik. Yuʼun mi li j-ilinutik xchiʼuk mi la jmaj jbatike, ta xkakʼtik ta ilel ti yuʼun koʼolutik xchiʼuk li buchʼu la slikes kʼope.

 Mi chlik kʼope, ¿kʼusi van chaval ti jaʼ mas lek ta pasele?... Jaʼ mas lek ti ta jtam batel jbetike. Oyikʼaluk van ta xchaʼxujot yan velta li krixchanoe. Pe xuʼ van te chlaj-o skotol li kʼope. Kʼalal cha tam batel abee, mu yuʼunuk chavakʼ ta ilel ti yuʼun kʼunil keremot o kʼunil tsebote, moʼoj, chavakʼ ta ilel ti yuʼun tsotsote, yuʼun skʼan oyuk stsatsal koʼontontik sventa ta jpastik li kʼusi leke.

Pe, ¿kʼusi xuʼ chkʼot ta pasel mi cha tikʼ aba ta majbail xchiʼuk cha pas kanale? ¿Kʼusi xuʼ chkʼot ta pasel ta tsʼakal?... Li buchʼu la apas ta kanale xuʼ tsut tal xchiʼuk yamigotak, pe maʼuk noʼox taje, yuʼun xuʼ cha syayijesot ta teʼ o ta jun navaja. Tana un, ¿mi chavaʼibe smelolal kʼu yuʼun mu skʼan ta jpastik kʼop li Jesuse?...

¿Kʼusi skʼan ta jpastik mi chkiltik ti yakal tsmaj sbaik li yan krixchanoetike? ¿Mi lek van ti ta jkoltatik junuk ti buchʼutik yakal tsmaj sbaike?... Li Vivliae ta xalbutik kʼusi xuʼ ta jpastik. Jsaʼtik Proverbios, kapitulo 26, versikulo 17. Tee xi ta xale: «Me ta jticʼ jbatic ta cʼop ti maʼuc jventatique, xuʼ chlic sjol jech chac cʼu chaʼal jcot tsʼiʼ me ta jnitbetic ta xchiquine», xi.

¿Kʼusi chkʼot ta pasel mi cha tsakbe ta xchikin li jkot tsʼiʼe? Kʼux chaʼi xchiʼuk tskʼan cha stiʼot, ¿mi mu jechuk? Kʼalal chakʼ yipal sventa tspoj sba li tsʼiʼe, skʼan mas to tsots xa tsak, vaʼun mas to ta sok sjol. Mi la kolta batele, oyikʼal van tsots cha stiʼot. Pe, ¿mi te cha tsakbe-o xchikin skotol ora?...

Mi ta xkiltik jun majbail xchiʼuk ta jtikʼ jbatike, ta jtatik kʼop jech kʼuchaʼal taje.  Oyikʼaluk mu jnaʼtik buchʼu la slikes li majbaile xchiʼuk kʼu yuʼun ti yakal ta smaj sbaike. Oyikʼaluk oy kʼusi laj yelkʼan li buchʼu yakal xlaj ta majele, jaʼ yuʼun yakal smajik. Mi ta jkoltatike, yakal me ta jkoltatik jun j-elekʼ. Taje muʼyuk lek, ¿mi mu jechuk?

Jech un chaʼa, ¿kʼusi skʼan cha pas kʼalal chavil jun majbaile?... Mi jaʼ te ta chanob vune, xuʼ xbat avalbe ta anil junuk maestro. Mi maʼuk xa te ta chanob vune, xuʼ chavikʼ tal atot ameʼ o junuk polisia. Manchuk mi tskʼan tspasik kʼop li yan krixchanoetike, li voʼotike skʼan mu jsaʼtik kʼop.

Voʼotik li melel yajtsʼaklomutik Jesuse chkakʼbetik yipal sventa mu jmaj jbatik. Kʼalal jech ta jpastike, ta xkakʼtik ta ilel ti oy stsatsal koʼontontik sventa ta jpastik li kʼusi leke. Li Vivliae ta xal ti yajchankʼop Jesuse «maʼuc yabtel ta sliques cʼop. Jaʼ tscʼan ti oy smucʼul yoʼnton ta stojol scotole» (2 Timoteo 2:24).