¿BUCHʼU van jaʼ xa naʼ li olol ti mas laj yakʼ muyubajuk li Diose?... Jaʼ li xnichʼone, ti Jesús sbie. Ta jloʼiltatik junantik kʼusitik la spas ti laj yakʼ muyubajuk li sTot ta vinajel li Jesuse.

Li yutsʼ yalal Jesuse nakalik ta jun jteklum ti oxib kʼakʼal snamal yiloj li Jerusalene, li jteklum yoʼ bu oy li skʼupil chʼulna Jeovae. Li Jesuse sna Jtot, xi la sbiiltas li chʼulnae. Li Jesús xchiʼuk li yutsʼ yalale skotol jabiletik te chkʼotilanik sventa tspasik li kʼin Koltaele.

Jun veltae, kʼalal lajcheb xaʼox sjabilal li Jesuse, sut batel ta snaik li yutsʼ yalale, jaʼo kʼalal laj xa li skʼinal kʼin Koltaele. Kʼalal kʼotik yoʼ bu chkux yoʼontonik sventa chetʼesik akʼobale, jaʼ to laj yilik ti muʼyuk bu te oy li Jesuse, muʼyuk bu te xchiʼinoj yutsʼ yalal mi jaʼuk li yamigoike. Jech oxal, li María xchiʼuk li Josee ta anil noʼox isutik batel ta Jerusalén sventa tsaʼik li Jesuse. ¿Bu van la staik xa naʼ?...

Te la staik ta chʼulna. Li Jesuse yakal ta xaʼibe li jchanubtasvanejetike xchiʼuk oy kʼusitik yakal ta sjakʼanbe. Kʼalal oy kʼusi chjakʼbat li Jesuse, li stuke lek onoʼox xtakʼ yuʼun. Li jchanubtasvanejetike toj chʼayel to yoʼonton ikʼotik ti toj lek tajmek xtakʼ yuʼun li Jesuse. ¿Mi xavaʼibe smelolal kʼu yuʼun xkuxet yoʼonton ta stojolal xNichʼon li Diose?...

Jech un chaʼa, kʼalal la staik Jesús li María xchiʼuk Josee, mas xa jun yoʼonton laj yaʼi sbaik. Pe li stuke muʼyuk bu ta xat yoʼonton, yuʼun snaʼoj ti chʼulnae jaʼ jun lekil na yoʼ bu xuʼ te oy li Jesuse. Jaʼ yuʼun xi la sjakʼanbe li stot smeʼe: «¿Me mu xanaʼic ti tscʼan liʼ oyun ta sna li Jtote?», xi. Li Jesuse xchʼunoj tajmek ti jaʼ sna Dios li chʼulnae, xchiʼuk toj kʼupil chaʼi ti te oye.

 Tsʼakal ne, li María xchiʼuk li Josee laj yikʼik batel ta Nazaret li Jesuse, li jteklum yoʼ bu nakalike. Li Jesuse, ¿kʼu van yelan la spas sba xa naʼ ta stojolal li stot smeʼe? Veno, li Vivliae ta xal ti «lec la xchʼunbe smantal li stot smeʼe». Li stuke laj noʼox spas li kʼusitik albat yuʼun stot smeʼe, manchuk mi jaʼ noʼox kʼusitik skʼan pasel ta na, jech kʼuchaʼal slupel tal voʼ ta poso (Lucas 2:41-52).

Jech un chaʼa nopo ta sventa liʼe: manchuk mi mu jaʼuk jmulavil li Jesuse, la xchʼunbe smantal li stot smeʼ ti jaʼ jmulaviletike. ¿Mi laj yakʼ muyubajuk li Jeova taje?... Ta melel laj, yuʼun li ta sKʼope xi ta xalbe li alab nichʼnabiletike: «Chʼunbeic smantal atot ameʼic», xi (Efesios 6:1). Mi cha chanbe stalelal Jesús xchiʼuk cha chʼunbe smantal li atot ameʼe, li voʼote chavakʼ muyubajuk ek li Diose.

Yan yelan ti kʼuxi xuʼ xavakʼ muyubajuk li Diose jaʼ ti kʼalal cha kʼopon yantik krixchanoetik ta stojolale. Junantik krixchanoetike chalik ti taje mu la jaʼuk yabtel ololetik. Pe kʼalal junantik krixchanoetik la skʼan la spajesik li ololetik ta skoj ti yuʼun tskʼan chkʼopojik ta  sventa li Diose, li Jesuse xi laj yale: ¿Mi muʼyuk akʼelojik ta sKʼop Dios: Ta skʼop bikʼtal ololetik ta xichʼ kʼupil kʼoptael li Diose, ti xie?, xi (Mateo 21:16). Jech un chaʼa skotol buchʼu oy ta yoʼontone xuʼ tskʼopon yantik krixchanoetik ta stojolal Jeova xchiʼuk chal kʼu yelan toj kʼupil sba li Diose. Mi ta jpastike, chmuyubaj ta jtojolaltik li Diose.

¿Bu ta jchantik ta sventa Dios ti xuʼ ta xkalbetik yantik ta tsʼakale?... Ta jVivliatik, jaʼo ti kʼalal ta jchantik ta jnatike. Pe mas to ta jchantik ti bu tstsob sbaik li steklumal Dios sventa chchanik li Vivliae. ¿Kʼuxi xuʼ ta jnaʼtik buchʼu jaʼ li steklumale?...

Veno, ¿kʼusi tspasik ta stsobajelik li krixchanoetik taje? ¿Mi jaʼ chakʼik ta chanel ta melel li kʼusi chal li Vivliae? ¿Mi ta skʼelik xchiʼuk ta xchanik? Taje jaʼ jech kʼuchaʼal ta xkaʼibetik li Diose, ¿mi mu jechuk xa naʼ?... Ta tsobajeletike, ta jmalatik ti chkaʼitik li kʼusi chal li Diose, ¿mi mu jechuk?... Pe, ¿ati mi jtsop krixchanoetik chalik ti mu persauk chi jkuxiutik jech kʼuchaʼal chchanubtasvan li Vivliae? ¿Mi chaval van ti jaʼ steklumal li Diose?...

Jech xtok oy to kʼusi yan skʼan cha nop. Li Vivliae ta xal ti yajtuneltake ta xkʼotik «ta steclumal» sventa sbi (Hechos 15:14). Li sbi Diose jaʼ Jeova, jech un chaʼa li buchʼutik jaʼ yajtuneltak yaloj sbaike xuʼ ta jakʼbetik mi jaʼ Jeova sbi li sDiosike. Mi ta xalbutik ti maʼuke, vaʼun xuʼ ta jnaʼtik ti maʼuk steklumal li Diose. Jech xtok, li buchʼutik oyik li ta steklumale skʼan ta xkʼopojik ta stojolal yantik ta sventa li Ajvalilal yuʼun Diose. Xchiʼuk skʼan chakʼik ta ilel ti skʼanojik li Jeova kʼalal ta xchʼunbeik li smantaltake (1 Juan 5:3).

Mi xavojtikin jtsop krixchanoetik ti tspasik skotol li kʼusitik taje, tsobo aba xchiʼukik sventa cha muyubta li Diose. Chikintao lek li kʼusitik chichʼ alel li ta stsobajelike xchiʼuk takʼo kʼalal ta xichʼ jakʼele. Li Jesuse jaʼ jech laj yakʼ ta ilel stalelal kʼalal te toʼox oy li ta sna Diose. Mi cha chanbe stalelale, chavakʼ muyubajuk li Jeovae, jaʼ jech kʼuchaʼal la spas li Jesuse.

 ¿Mi xvul ta ajol yan olol ti chal Vivlia ti laj yakʼ muyubajuk li Diose?.... Jun lekil skʼelobile jaʼ li Timoteoe. Li stote muʼyuk la xchʼun ta stojolal li Jeovae. Pe li smeʼ ti jaʼ sbi Eunice xchiʼuk li syaya ti jaʼ sbi Loidae, la xchʼunik. Li Timoteoe la xchikinta li kʼusi albat yuʼun smeʼ xchiʼuk syayae, jaʼ jech la xchan ta stojolal li Jeovae.

Kʼalal mukʼta krixchano xa li Timoteoe, li jtakbol Pabloe la svulaʼanbe li steklumal bu nakale. Li jtakbole laj yakʼ venta ti tskʼan tajmek chtun ta stojolal Jeova li Timoteoe. Jech un chaʼa, laj yalbe ti akʼo xbat chiʼinatuk sventa xuʼ chtun mas ta stojolal li Jeovae. Ta skotol li jteklumetik ti la svulaʼanike, la skʼoponik li krixchanoetik ta sventa li Ajvalilal yuʼun Diose xchiʼuk ta sventa li Jesuse (Hechos 16:1-5; 2 Timoteo 1:5; 3:14, 15).

Pe, li Vivliae, ¿mi oy chalbe skʼoplal junuk uni tseb ti laj yakʼ muyubajuk li Diose?... Oy ta melel . Jkʼelbetik sloʼilal jun uni tseb ta Israel. Ta skʼakʼalil kʼalal ikuxi li uni tsebe, li slumal Siria xchiʼuk Israele skontrainoj sbaik. Jun kʼakʼale, li jsirioetike la spasik kʼop xchiʼuk li  j-israeletike, vaʼun chukul laj yikʼik batel li uni tsebe. La stakik batel ta sna bankilal yuʼun soltaroetik ti Naamán sbie. Laj yakʼik abtejuk sventa jaʼuk skiara li yajnil Naamane.

Li Naamane chaʼi toʼox kʼaʼemal chamel. Mi junuk jpoxtavanej poxtaj yuʼun li xchamele. Pe li uni j-israelal tsebe xchʼunoj ta melel ti xuʼ ta xpoxtabe xchamel Naamán li jun yajtunel Jeova ti tsots skʼoplale, ti jaʼ jun j-alkʼope. Li Naamán xchiʼuk yajnile muʼyuk toʼox bu yichʼojik ta mukʼ li Jeovae. ¿Mi ta van skʼan ta xal li kʼusi snaʼoj li uni tsebe? ¿Kʼusi van laj apas jechuk li voʼote?...

Li uni tsebe xi laj yale: Tauk xbat skʼel li j-alkʼop yuʼun Jeova ti te oy ta Israel li Naamane, ta xpoxtabat jechuk li skʼaʼemal chamele, xi. Li Naamane laj yaʼibe li skʼope, vaʼun bat skʼel li j-alkʼope. Kʼalal la spas li kʼusitik albat yuʼun li j-alkʼope, ipoxtaj li xchamele. Taje jaʼ la spas sventa akʼo likuk smuyubta li melel Diose (2 Reyes 5:1-15).

¿Mi cha kʼan buchʼu cha kolta sventa chchan ta stojolal Jeova xchiʼuk li kʼusi xuʼ ta spas, jech kʼuchaʼal la spas li uni tsebe?... ¿Buchʼutik van xuʼ cha kolta?... Veno, ta slikebale oyikʼal van tsnopik ti mu persauk xichʼik koltael li krixchanoetike. Pe mi cha loʼiltabe li kʼusitik lek tspas li Jeovae, oyikʼal van cha yaʼiboxuk. Kʼalal jech cha pase xuʼ cha chʼun ta melel ti chmuyubaj yuʼun li Diose.