VOʼONE jnaʼoj ti jech cha nop ek ti oy buchʼutik mas tsots yabtelike, jaʼ xkaltik, ti mas tsots skʼoplalik xchiʼuk oy mas svuʼelike. ¿Buchʼutik van jaʼ xa naʼ?... Li june jaʼ li Jeova Diose. ¿Kʼusi xuʼ xkaltik ta sventa li xNichʼone, jaʼ xkaltik, li Mukʼta Jchanubtasvaneje? ¿Mi jaʼ van mas tsots yabtel xa naʼ, ti jaʼ muʼyuk li voʼotike?... Jaʼ, jaʼ mas tsots.

Li Jesuse te ikuxi ta vinajel xchiʼuk li Diose. Jaʼ toʼox jun nichʼonil ti mu xvinaj ta kʼelele, jaʼ jun anjel. Li Diose, ¿mi laj van spas yan anjeletik, o nichʼoniletik ti mu xvinaj ta kʼelele?... Laj, epal miyonetik la spas. Jech ek, li anjeletike jaʼ mas tsots yabtelik xchiʼuk oy mas sjuʼelik, li voʼotike moʼoj (Salmo 104:4; Daniel 7:10).

¿Mi xvul to ta ajol kʼusi sbi li anjel ti la skʼopon li Mariae?... Gabriel sbi. Li anjel liʼe jaʼ li buchʼu laj yalbe María ti jaʼ xNichʼon Dios li yuni neneʼe. Li Jeovae laj yakʼbe tal ta yalajeb María li xkuxlejal xNichʼone sventa xuʼ x-ayan liʼ ta Balumile (Lucas 1:26, 27).

¿Mi cha chʼun li skʼelobil juʼelal taje? ¿Mi cha chʼun ti kuxi xchiʼuk Dios ta vinajel li Jesuse?... Li Jesuse laj yal ti jaʼ jeche. ¿Kʼuxi la snaʼ? Kʼalal bikʼit toʼoxe, li Mariae oyikʼal van laj yalbe li Jesús li kʼusi albat yuʼun li Gabriele. Jech xtok, li Josee oyikʼal van laj yalbe ti smelel tot Jesuse jaʼ li Diose.

Kʼalal laj yichʼ voʼ li Jesuse, li Diose ikʼopoj tal ta vinajel xchiʼuk xi laj yale: «Liʼi jaʼ Jnichʼon», xi (Mateo 3:17). Kʼalal jun xaʼox akʼobal skʼan xcham li Jesuse, xi laj yalbe ta orasion li Diose:  «Tati, acʼbun xa yan velta jlequilal cutsilal te ta atojol jech chac cʼu chaʼal jlequilal cutsilal te ta atojol ti cʼalal muʼyuc toʼox li banamile», xi (Juan 17:5). Jech, li Jesuse la skʼan ti akʼo xchaʼkuxi ta vinajel xchiʼuk li Diose. ¿Kʼuxi xuʼ taje?... Jaʼ noʼox xuʼ mi ta xchaʼkʼatajesat yuʼun Jeova ta jun kuxlejal ti mu xvinaj ta kʼelele, ta jun anjele.

Tana un oy kʼusi ta jkʼan ta jakʼbot ti tsots skʼoplale. ¿Mi lek yoʼontonik stekelik li anjeletike? ¿Kʼusi van chaval?... Jun kʼakʼale lek toʼox yoʼontonik skotolik. Jaʼ la spasanan li Jeovae, xchiʼuk lek skotol li kʼusitik tspase. Pe, jun kʼakʼale, li june chopol la spas sba. ¿Kʼuxi xa noʼox kʼot ta pasel un taje?

Sventa ta jnabetik li stakʼobile, sutkutik batel li ta skʼakʼalil kʼalal la spas li baʼyel vinik xchiʼuk li baʼyel ants li Diose, li Adán xchiʼuk Evae. Junantik krixchanoetike ta xalik ti taje jaʼ jun jecheʼ loʼil ti mu meleluke. Pe li Mukʼta Jchanubtasvaneje snaʼoj ti melele.

Kʼalal ipasatik yuʼun Dios li Adán xchiʼuk Evae, akʼatik ta jun kʼupil nichimaltik ti jaʼ sbi Edene. Taje jaʼ toʼox jun paraiso. Xuʼ toʼox ta xil yalab xnichʼnabik, ta xkʼatajik ta jun mukʼta utsʼ alalil xchiʼuk ta xkuxiik ta sbatel osil li ta Paraisoe. Pe skʼan toʼox ta xchanik jun xchanobil tsots skʼoplal ti jchanojbetik xa skʼoplale. Jkʼeltik mi xvul to ta joltik.

 Li Adán xchiʼuk Evae, albatik yuʼun Jeova ti xuʼ ta slobeik sat skotol li teʼetik ti te toʼox oy ta nichimaltike, kʼajomal noʼox jtekʼ ti mu stakʼ slobeik sate. Mi ta slobeik sat li teʼ taje, albatik ta melel yuʼun Dios ti ta xchamike (Génesis 2:17). ¿Kʼusi toʼox jaʼ chaʼa li xchanobil ti skʼan ta xchanik li Adán xchiʼuk Evae?...

Jaʼ li xchanobil ta sventa li xchʼunel mantale. Jech ta melel, li kuxlejale ta xichʼ tael mi ta xichʼ chʼunbel smantal li Jeova Diose. Mu baluk ti ta xalik noʼox ti ta xchʼunbeik smantal Dios li Adán xchiʼuk Evae. Skʼan toʼox ta xakʼik ta ilel ta xkuxlejalik. Mi ta toʼox xchʼunbeik smantal li Diose, ta xakʼik ta ilel ti skʼanojike xchiʼuk ti tskʼanik li ajvalilal Yuʼune. Vaʼun xuʼ toʼox me ta xkuxiik ta sbatel osil li ta Paraisoe. Pe mi la slobeik li sat li teʼ taje, ¿kʼusi toʼox ta xakʼik ta ilel?...

Ta xakʼik ta ilel ta melel ti yuʼun muʼyuk bu ta stojbeik ta vokol li kʼusitik akʼbatik yuʼun li Diose. Ti teuk oyote, ¿mi laj van achʼunbe smantal ti jechuke?... Ta slikebale, li Adán xchiʼuk Evae la xchʼunik. Pe ta tsʼakal ne, oy buchʼu mas tsots yabtel laj yakʼ akʼo mu xchʼunbe smantal Jeova li Evae. ¿Buchʼu jaʼ?...

Li Vivliae ta xal ti ikʼoponat yuʼun jkot kiletel chon li Evae. Pe li voʼote anaʼoj ti mu snaʼ xkʼopoj  li kiletel chone. Jech un chaʼa, ¿kʼuxi xa noʼox xuʼ ikʼopoj?... Jun anjel la spas ti yuʼun chkʼopoj yileluk li kiletel chone. Pe ta melel jaʼ li anjel buchʼu ikʼopoje. Li anjel taje lik snop kʼusitik chopol. Jaʼ la skʼan ti akʼo xmuyubtaat yuʼun li Adán xchiʼuk Evae xchiʼuk ti akʼo spasik li kʼusitik chale. Tskʼan toʼox chichʼbe li yavil Diose.

Jech un chaʼa li chopol anjel taje la stikʼbe kʼusitik chopol ta sjol li Evae. Ti kʼalal la stunes li kiletel chone, xi jpʼel skʼop laj yalbe li antse: Li Diose muʼyuk laj yalboxuk li kʼusi melele. Muʼyuk bu cha chamik mi cha lobeik sat li teʼe. Cha pʼijubik jech kʼuchaʼal li Diose. ¿Mi laj van achʼun jechuk li kʼusi laj yal li yechʼomal eil taje?...

Li yoʼonton Evae lik skʼan li kʼusi muʼyuk akʼbil yuʼun li Diose. La slobe li sat teʼ ti albat mu stakʼ sloʼe. Te une laj yakʼbe ek li Adane. Li Adane muʼyuk bu la xchʼun li kʼusi laj yal li kiletel chone. Pe li yoʼontone jaʼ mas skʼanoj ti te oyuk xchiʼuk li Evae, maʼuk ti te oyuk xchiʼuk li Diose. Jaʼ yuʼun la sloʼ ek li sat teʼe (Génesis 3:1-6; 1 Timoteo 2:14).

¿Kʼusi kʼot ta pasel?... Li Adán xchiʼuk Evae ipasik ta jmulavil krixchanoetik, imalubik xchiʼuk ichamik. Ta skoj ti yuʼun jaʼ jmulavil krixchanoetike, li yalab xnichʼnabike jmulavil krixchanoetik  ek, kʼalal kʼot skʼakʼalil ne imalubik xchiʼuk ichamik. Muʼyuk bu la sjut kʼop li Diose. Li kuxlejale ta xichʼ tael mi ta jchʼunbetik li smantale (Romanos 5:12). Li Vivliae ta xalbutik ti anjel buchʼu la sloʼla li Evae jaʼ sbi Diablo Satanás, li anjeletik ti chopol la spas sbaik eke sbiinojik pukujetik (Santiago 2:19; Apocalipsis 12:9).

Tana un, ¿mi xavaʼibe smelolal kʼu yuʼun ipas ta chopol li lekil anjel toʼoxe?... Jaʼ ta skoj ti yuʼun lik snop li kʼusitik chopole. La skʼan ti jaʼuk mas ichʼbiluk ta mukʼe. Ta skoj ti yuʼun snaʼoj ti albatik yuʼun Dios ti akʼo xil yalab xnichʼnabik li Adán xchiʼuk Evae, jaʼ la skʼan ti jaʼuk akʼo xmuyubtaat yuʼun skotolike. Li Diabloe tskʼan ti jkotoltik akʼo mu jchʼunbetik smantal li Jeovae. Jaʼ yuʼun chakʼbe yipal sventa tstikʼbutik ta joltik li kʼusitik chopole (Santiago 1:13-15).

Li Diabloe jpʼel-o skʼop yaloj ti muʼyuk buchʼu skʼanoj ta melel li Jeovae. Yaloj ti mi jaʼuk voʼot mi jaʼuk voʼon jkʼanojtik li Diose, xchiʼuk ti mu la jkʼan jpastik ta melel li kʼusitik chal li Diose. Jpʼel-o skʼop yaloj ti jaʼ noʼox la ta jchʼunbetik smantal Jeova ti kʼalal lek chbat kuʼuntik li kʼusitike, jech kʼuchaʼal ta jkʼantike. ¿Mi oy srason li Diabloe? ¿Mi jaʼ jechutik?

Li Mukʼta Jchanubtasvaneje laj yal ti jaʼ jun jloʼlavanej li Diabloe. Li Jesuse laj yakʼ ta ilel ti ta melel skʼanoj li Jeova kʼalal la xchʼunbe li smantale. Xchiʼuk maʼuk noʼox la xchʼun ti kʼalal kʼun ta pasele, yuʼun skotol ora la xchʼun. Kʼalal to ta slajel laj yakʼ ta ilel ti tukʼ yoʼonton ta stojolal li Jeovae. Ta skoj taje, li Diose la spas ti akʼo xchaʼkuxie, xchiʼuk ti akʼo xkuxi ta sbatel osile.

Jech un chaʼa, ¿buchʼu van chaval ti jaʼ li jmukʼta kontratike chaʼa?... Jaʼ, jaʼ li Diablo Satanase. ¿Mi xuʼ van xkiltik?... ¡Moʼoj! Pe jnaʼojtik ti oye xchiʼuk ti jaʼ mas tsots yabtel xchiʼuk ti jaʼ mas oy sjuʼele, ti jaʼ muʼyuk li voʼotike. Pe, ¿buchʼu jaʼ mas tsots yabtel, mi jaʼ li Diabloe o mi jaʼ li Jeovae?... Jaʼ li Jeova Diose. Jaʼ yuʼun jnaʼojtik ta melel ti xuʼ ta spojutik li Diose.