MI LI jchamutike, ¿mi tskʼan van xchaʼkuxesutik xa naʼ li Diose, jaʼ xkaltik, ti tsutesbutik noxtok li jkuxlejaltike?... Jun lekil vinik ti Job sbie la spat yoʼonton ti tanae. Jaʼ yuʼun, kʼalal jutuk xa skʼan xcham laj yaʼie, xi laj yalbe li Diose: «Xuʼ chavicʼun, vuʼun ta jtacʼbot», xi. Li Jobe laj yal ti Diose tskʼan la tajek chaʼi ti chchaʼkuxesvane (Job 14:14, 15).

Li Jesuse jaʼ jech kʼuchaʼal li sTote, li Jeova Diose. Tskʼan tskoltautik ek. Kʼalal xi albat yuʼun jun jkʼaʼemal chamele: «Cajval, me chacʼan chacoltaune, xuʼ avuʼun chalecubtasun», kʼalal xie; li Jesuse xi la stakʼe: «Ta jcʼan ta jcoltaot», xi. Vaʼun la xpoxtabe li xchamele (Lucas 5:12, 13).

Li Jesuse la xchanbe stalelal sTot ta skʼanel li ololetike. Voʼne xa tajmeke, li Jeovae la xchaʼkuxes chaʼvoʼ ololetik ta stojolal yajtuneltak. Li Eliase la skʼanbe vokol Jeova ti akʼo xchaʼkuxesbe yol jun ants ti akʼbat ta ilel slekil yoʼontone, vaʼun li Jeovae la xchaʼkuxes. Jech noxtok li Diose la stunes li Eliseo ti jaʼ yajtunele sventa la xchaʼkuxes yan uni olol (1 Reyes 17:17-24; 2 Reyes 4:32-37).

 ¿Mi mu toj alakʼuk sba chkaʼitik ti toj ep skʼanojutik li Jeovae?... Maʼuk noʼox tsnop ta jtojolaltik kʼalaluk kuxulutike. Jech ek chi jvulutik ta sjol mi li jchamutike. Jech noxtok li Jesuse laj yal ti kʼalal chcham jun yajtunel Jeova ti skʼanoje, kuxul la chaʼi yaʼeluk (Lucas 20:38). Li Vivliae ta xal ta melel ti mi jaʼuk lajelal, mi jaʼuk kuxlejal, mi jaʼuk kʼusitik liʼ tanae mi jaʼuk kʼusitik ta tsʼakal xuʼ ta xchʼakutik ta skʼanelal li Diose (Romanos 8:38, 39).

Kʼalal liʼ toʼox kuxul ta Balumil li Jesuse, laj yakʼ ta ilel ti skʼanoj ololetik li Jeovae. Chvul van ta ajol ti Jesuse la xchʼak skʼakʼal sventa chchiʼin ta loʼil li ololetik ta sventa li Diose. Pe ¿mi anaʼoj ti akʼbat sjuʼel yuʼun Jeova li Jesús sventa chchaʼkuxes ololetik ti chamemik xaʼoxe?... Ta xkalbetik sloʼilal ti kʼalal la xchaʼkuxes jun uni tseb ti lajcheb sjabilale, ti jaʼ yuni tseb jun vinik ti jaʼ sbi Jairoe.

Li Jairoe te toʼox nakal xchiʼuk yajnil xchiʼuk ti jun noʼox stseb te ta nopol nab Galileae. Jun kʼakʼale, iʼipaj tajmek li uni tsebe, li Jairoe laj yil ti yuʼun xa chchame. Vaʼun li Jairoe vul ta sjol li Jesuse, yuʼun yabinoj ti jaʼ jun vinik ti toj labal sbae, ti xuʼ la chpoxta li chameletike. Jech un chaʼa bat saʼ, te la sta ta stiʼil nab Galilea, yakal xchanubtas epal krixchanoetik.

Li Jairoe la snetʼ sba ochel ta epal krixchanoetik, la spatan sba ta stojolal li Jesuse, xi laj yalbee: Li kuni tsebe toj ip tajmek. ¿Mi xuʼ xbat akolta? Avokoluk tajmek, laʼ chiʼinun, xi. Li Jesuse ta ora noʼox ibat xchiʼuk li Jairoe. Li epal krixchanoetik ti batem skʼelik li Mukʼta Jchanubtasvaneje la stsʼaklinik batel ek. Pe kʼalal batemik te xa van kʼu snatiluk ta bee, te la snupik ta be jayvoʼ viniketik ti te likik tal ta sna li Jairoe, vaʼun xi laj yalbeike: «Icham xa li atsebe. Altic xa chavacʼbe svocol li jchanubtasvaneje», xiik.

Li Jesuse laj yaʼi li kʼusi laj yalike. Ta skoj ti yuʼun snaʼoj ti toj kʼux chaʼi ti cham li jun noʼox stseb li Jairoe, xi laj yalbee: Mu xa xiʼ. Jaʼ noʼox akʼo xchʼunojel avoʼonton ta stojolal Dios, ta xlekub li atsebe, xut. Vaʼun xanavik batel jaʼ to ti kʼalal kʼotik  ta sna li Jairoe. Li yamigotak li utsʼ-alalil ti te stsoboj sbaike yakal ta x-okʼik, yuʼun chamem xa li tsebe. Li Jesuse xi laj yale: Mu xa okʼik. Li uni tsebe muʼyuk bu chamem, yuʼun jaʼ noʼox ta xvay, xi.

Kʼalal jech laj yal li Jesuse, li krixchanoetike lik slabanik, yuʼun snaʼojik ti chamem li uni tsebe. Li Jesuse, ¿kʼu yuʼun laj yal ti yakal ta xvaye?... ¿Kʼusi van xchanobil skʼan chakʼbe snaʼ xa naʼ li krixchanoetik taje?... Tskʼan akʼo snaʼik ti lajelale xkoʼolaj kʼuchaʼal buchʼu ochem tajmek svayel. Tskʼan ta xchanubtasvan ti jaʼ noʼox ta sjuʼel Dios ti mu vokoluk ta xchaʼkuxes jun krixchano jech kʼuchaʼal mu bu vokoluk ta julavestik li buchʼu vayale.

Li Jesuse la stak lokʼel skotol li buchʼutik te oyik ta yut nae, pe muʼyuk bu la stak lokʼel li stot smeʼ uni tsebe xchiʼuk li jtakboletik Pedro, Santiago xchiʼuk li Juane. Tsʼakal ne, och batel yoʼ bu oy li uni tsebe, la stsakbe skʼob, xi laj yalbee: «Tseb, lican», xut. Li uni tsebe ta anil noʼox ilik, vaʼun lik xanavuk. Xmuyubajik tajmek li stot smeʼe (Marcos 5:21-24, 35-43; Lucas 8:40-42, 49-56).

Nopo avaʼi liʼe: mi xuʼ la sutesbe xkuxlejal li uni tseb li Jesuse, ¿mi xuʼ van jech tspas ta stojolal li yantik eke?... ¿Mi tspas van ta melel  xa naʼ?... Tana. Xi laj yal stuk li Jesuse: Ta to sta skʼakʼalil ta xaʼibikun jkʼopojel xchiʼuk ta xlokʼik tal skotolik li buchʼutik te oyik ta mukinaletike, xi (Juan 5:28, 29).

¿Mi tskʼan van xchaʼkuxes xa naʼ li krixchanoetik li Jesuse?... Oy yan skʼelobil ta Vivlia ti ta skoltautik ta stakʼel li sjakʼobil taje. Li kʼusi kʼot ta pasel jun velta te ta steklumal Naine, ta xakʼbutik ta ilel kʼusi chaʼi Jesús ta stojolal li buchʼutik chokʼita yanimaike.

Ta jteklum Naine te yakal xlokʼik tal epal krixchanoetik sventa chbat smukik jun kerem ti chamem xae. Li smeʼ li kereme chat tajmek yoʼonton. Oy xa onoʼox skʼakʼalil chamem ek li smalale, tana un li jun noʼox yole chamem xa ek. Ep slakʼnatak te xchiʼinojik li antse. Yakal ch-okʼ tajmek li antse, li krixchanoetike mu kʼusi xuʼ spasik sventa tspatbeik yoʼonton.

Ta skʼakʼalil taje, jaʼo xa te xbatik li Jesús xchiʼuk li yajtsʼaklomtak li ta steklumal Naine. Kʼalal jaʼo te chnopajik batel li ta yochebal jteklume, te la snupik ta be epal krixchanoetik ti chbat xa smukik li kereme. Kʼalal laj yil ti yakal ch-okʼ smeʼ li kereme, li Jesuse ikʼuxubaj ta yoʼonton. Kʼux laj yaʼi ta yoʼonton ta skoj ti chat yoʼonton li antse, jech oxal la skʼan la skolta.

Jech un chaʼa, ta slekil yoʼonton xchiʼuk jpʼel xi laj yalbee: «Mu xaʼocʼ» xut. Li krixchanoetike lokʼel tskʼelik li Jesuse, yuʼun tskʼan tsnaʼik kʼu yuʼun ti jech laj yakʼ ta ilel stalelale. Kʼalal inopaj batel ta stsʼel anima li Jesuse, yakal van ta sjakʼbe sbaik skotolik kʼusi van ta spas. Xi laj yal li Jesuse: «Querem, vuʼun chacalbot lican», xut. Li kereme ta anil noʼox ilik, lik kʼopojuk (Lucas 7:11-17).

Nopo avaʼi kʼu yelan laj yaʼi sba li antse. ¿Kʼu van yelan chavaʼi aba xa naʼ ti tauk xchaʼkuxi buchʼu junukal avuʼun ti akʼanoj tajmeke?... Li kʼusi la spas li Jesuse, ¿mi mu tauk xakʼ ta ilel ti skʼanoj ta melel xchiʼuk tskʼan tskolta li krixchanoetike?... ¡Nopo avaʼi kʼu to yelan toj alakʼ sba ta jchʼamtik li buchʼutik ta xchaʼkuxiik li ta achʼ balumil  yuʼun li Diose! (2 Pedro 3:13; Apocalipsis 21:3, 4.)

Junantik li buchʼutik ta xchaʼkuxiike jaʼik me krixchanoetik ti xkojtikintik xa onoʼoxe, te kapal xchiʼuk ololetik. Ta xkojtikintik jech kʼuchaʼal laj yojtikin stseb li Jairo kʼalal ichaʼkuxesbat yuʼun li Jesuse. Yantike jaʼik me krixchanoetik ti ep xa sienal o smilal jabil ti chamemike. Pe, manchuk mi toj ep xa tajmek skʼakʼalil echʼem, muʼyuk bu ta xchʼay ta sjol li Diose.

¿Mi mu alakʼuk sba ti ta jnaʼtik ti toj ep skʼanojutik li Jeova xchiʼuk li Jesús ti jaʼ xNichʼone?... Li stukike mu jayibuk noʼox sjabilal tskʼanik chi jkuxiutik, moʼoj, tskʼanik chi jkuxiutik ta sbatel osil.