¿MI LEK ti chopol kʼusitik ta jnoptik ta stojolal jun krixchano ti mu to xkojtikintike?... Moʼoj. Yuʼun taje jaʼ skʼan chal ti muʼyuk lek ta xkiltik ta skoj noʼox ti yuʼun jelel o ti yan-o skʼope.

¿Mi lek van xa naʼ ti jech ta jnoptike?... Moʼoj. Ta snopel jech kʼuchaʼal taje muʼyuk lek xchiʼuk maʼuk yakʼobil ta ilel slekil oʼontonal. Muʼyuk buchʼu xuʼ xkilbajintik ta skoj ti yuʼun mu xkoʼolaj kʼuchaʼal voʼotike.

Nopo avaʼi ta sventa liʼe: ¿mi oy buchʼu xavojtikin ti jelel sbekʼtal ti mu xkoʼolaj kʼuchaʼal li avuʼune xchiʼuk ti yan-o skʼope?... Oyikʼal van xavojtikin krixchanoetik ti tsʼiʼlejem sbekʼtalik ta skoj chamel o ta skoj syayijemalike. ¿Mi cha vakʼbe ta ilel slekil avoʼonton xchiʼuk akʼanoj li buchʼutik mu xkoʼolajik kʼuchaʼal voʼote?...

Mi ta xkaʼibetik li Mukʼta Jchanubtasvanej Jesucristoe, chkakʼtik ta ilel slekil koʼontontik ta skotol krixchanoetik, manchuk mi yan slumalik o mi yan sbekʼtalik. Akʼo mi mu jechuk tsnopik skotol li krixchanoetike, li Jesuse ichanubtasvan ta sventa taje. Jkʼeltik kʼusi jaʼ.

Jun judío vinik ti tsnop toʼox kʼusitik chopol ta stojolal yan krixchanoetike inopaj ta stojolal li Jesuse xchiʼuk xi la sjakʼbee: ¿Kʼusi skʼan ta jpas sventa ta jta li kuxlejal sbatel osile?, xi. Li Jesuse snaʼoj li kʼusi tsnop li vinik taje, smalaoj ti ch-albat ti jaʼ noʼox skʼan chakʼbe ta ilel slekil yoʼonton li krixchanoetik ti jmoj stsʼunbalik o ti jmoj slumalike. Pe li Jesuse muʼyuk bu la stakʼbe, moʼoj, jaʼ yuʼun xi la sjakʼbee: Li smantal Diose, ¿kʼusi chal ti akʼo jpastike?, xut.

 Li vinike xi la stakʼe: Kʼano me ta skotol avoʼonton li Jeova Dios avuʼune, xchiʼuk kʼano me li achiʼiltak jech kʼuchaʼal kʼux ta avoʼonton abekʼtal atuke, xi. Li Jesuse xi la stakʼbee: Toj lek laj atakʼ. Paso batel jech xchiʼuk jech cha ta li kuxlejal sbatel osile, xi.

Pe li vinike mu skʼan xakʼbe ta ilel slekil yoʼonton mi jaʼuk tskʼan li krixchanoetik ti mu xkoʼolajik xchiʼuke. Jaʼ yuʼun laj yakʼbe yipal kʼuxi xuʼ tspoj sba, xchiʼuk xi la sjakʼbe li Jesuse: «¿Bochʼo ta melel li jchiʼile?, -xut». Oyikʼal van xi tskʼan chtakʼbat yuʼun li Jesuse: «Li achiʼile jaʼ li avamigotake», o «Jaʼ li krixchanoetik ti jmoj xa-elanik xchiʼuke», xi van tsnop. Li Jesuse la stakʼbe ta jun loʼil ta sventa jun judío vinik xchiʼuk jun jsamaria vinik ti yan slumale.

Oy jun judío vinik ti yal batel ta sbelel steklumal Jerusalén ti chkʼot kʼalal to ta Jericoe. Te ta bee itsakat yuʼun j-elekʼetik, pojbat li stakʼine xchiʼuk li skʼuʼ spokʼe. Ta tsʼakal ne, laj yakʼbeik majel xchiʼuk jutuk xa mu chamem kom yuʼunik ta tiʼ be.

Ta mukʼta jlikele, te echʼ jun pale, laj yil ti toj yayijem li vinike. Ti voʼotuke ¿kʼusi van laj apas jechuke?... Li palee tukʼ echʼ batel mi jaʼuk inopaj ta stsʼel. Mu kʼusi la spas sventa tskolta.

 Te une echʼ yan vinik ti lek xchʼunoj Diose. Jaʼ jun leví vinik ti te chtun ta chʼulna ta Jerusalene. ¿Mi ta van xpaj sventa tskolta li jyayijele?... Moʼoj. Li leví vinike jaʼ noʼox jech la spas ek jech kʼuchaʼal li palee.

Ta slajeb ne, te ital jun jsamaria vinik. ¿Mi xavil ti te yakal xnopaj tal ta bee?... Li jxanvile laj yil ti te mochol ta lum li judío vinike, toj yayijem laj yil. Ta melel, jutuk mu skotoluk li jsamariaetik xchiʼuk li judioetike muʼyuk bu lek chil sbaik (Juan 4:9). Jech un chaʼa, ¿mi ta van stam batel sbe xchiʼuk muʼyuk bu ta skolta li vinik taje? ¿Mi xi van la snope: «Muʼyuk bu sujbilun ta skoltael li judío vinik liʼe. Li stuke muʼyuk bu tskoltaun ti voʼonukun yayijemune», mi xi van?

 Veno, li jsamaria vinike la skʼel li vinik ti te mochol ta tiʼ bee, toj kʼux ta yoʼonton laj yaʼi. Mu xuʼ te mochol chikta sventa akʼo chamuk. Jech un chaʼa iyal li ta sburoe, inopaj batel ta stsʼel li judío vinike, vaʼun lik xpoxtabe ta aseite xchiʼuk yaʼlel tsʼusub li syayijemaltake. Tsʼakal ne la xpixbe ta pokʼ.

Li jsamaria vinike kʼunkʼun la skajan li ta sburoe. Vaʼun kʼunkʼun la stam batel sbe jaʼ to ti kʼalal kʼot ta jun snail vayebale. Li jsamaria vinike la xchʼamun jun kuarto sventa li jyayijele xchiʼuk la skʼel ti akʼo xichʼ chabiele.

Kʼalal tsuts ta yalel sloʼil li Jesuse, xi la sjakʼbe li vinik ti chchiʼin ta loʼile: Li ta yoxibalike, ¿buchʼu junukal laj yakʼ ta ilel ti jaʼ xchiʼil li judío vinik ti laj ta majel yuʼun j-elekʼetike? ¿Kʼusi van chaval li voʼote? ¿Mi jaʼ li palee, mi jaʼ li leví vinike, o mi jaʼ li jsamaria vinike?...

Li vinike xi la stakʼe: Li xchiʼile jaʼ li buchʼu la spajtsan sba xchiʼuk la skoltae, xi. Li Jesuse xi la stakʼbee: Oy arason. Batan, paso jech ek, xi (Lucas 10:25-37).

¿Mi mu jaʼuk jun kʼupil loʼil taje? Jamal ta xalbutik smelolal buchʼu jaʼ li jchiʼiltike. Maʼukik noʼox li kamigotaktike xchiʼuk maʼukik noʼox li krixchanoetik ti koʼol  jbekʼtaltik o ti jmoj jkʼoptik xchiʼukike. Li Jesuse la xchanubtasutik kʼuxi xuʼ xkakʼtik ta ilel slekil koʼontontik ta skotol li krixchanoetike, manchuk mi yan slumalik, mi yan sbekʼtalik o mi yan-o skʼopik.

Jaʼ jech stalelal li Jeova Diose. Muʼyuk kʼusi chopol tsnop ta stojolal li yantike. Li Jesuse xi laj yale: Li atotik te oy ta vinajele ta xakʼ lokʼuk kʼakʼal ta stojol li buchʼutik lekike xchiʼuk li buchʼutik chopolike, ta xakʼbe tal voʼ li buchʼutik tukʼike xchiʼuk li buchʼutik muʼyuk tukʼike, xi. Jech un chaʼa, lekuk me koʼontontik ta stojolal skotol li krixchanoetike, jech kʼuchaʼal tspas li Diose (Mateo 5:44-48).

Jech oxal chaʼa, mi oy buchʼu yayijem chavile, ¿kʼusi cha pas?... ¿Ati mi yan slumal, o mi mu xkoʼolaj li sbekʼtal kʼuchaʼal avuʼune? Manchuk mi jech, jaʼ achiʼil, skʼan cha kolta. Mi mu xuʼ avuʼun atuke, albo junuk mukʼta krixchano ti akʼo skoltaote. Xuʼ xavikʼ tal jun polisia (mayol) o jun maestro. Taje jaʼ skʼan xal ti lek avoʼontone, jech kʼuchaʼal slekil yoʼonton li jsamaria vinike.

Li Mukʼta Jchanubtasvaneje tskʼan ti akʼo xkakʼtik ta ilel slekil koʼontontike xchiʼuk ti akʼo jkoltatik li yantike, manchuk mi buchʼuuk krixchanoal. Jaʼ yuʼun laj yalbutik li sloʼilal ta sventa li lekil jsamaria vinike.