Jaʼ be, jaʼ melel xchiʼuk jaʼ kuxlejal
Toj lek van chavaʼi ti xa-albat lekil aʼyejetike. Pe mi xanaʼe, oy me lekil aʼyejetik chkalbotkutik avaʼi xchiʼuk avutsʼ avalal.
Te oy ta Vivlia li lekil aʼyejetik taje. Jaʼ laj yakʼ ta tsʼibael leʼ xa ta sjayibal jabil li Buchʼu la spas vinajelbalumile, li Jeova Diose. Li ta jlik livro liʼe jaʼ chalbe skʼoplal chanib livroetik ta Vivlia ti naka lekil aʼyej chalbutike. Jaʼ jech sbi jujulik livro ti buchʼu la stsʼibae, jaʼ Mateo, Markos, Lukas xchiʼuk Juan.
Ep buchʼutik ti chanib Evanjelio sbi yuʼunik li livroetik taje. Naka lekil aʼyej chal ta sventa Jesus, ti jaʼ chtunesat yuʼun Dios sventa tspojutike xchiʼuk ti jaʼ vaʼanbil yuʼun Dios sventa x-och ta Ajvalilal ta vinajele. Chal xtok ti chakʼbutik bendision kʼalal mi ch-ajvalilaj xaʼox mi kakʼoj xchʼunel koʼontontik ta stojolale (Markos 10:17, 30; 13:13).
¿KʼU YUʼUN CHANIB EVANJELIO?
Yikʼaluk xi chanope: «¿Kʼu yuʼun chanib Evanjelio laj yakʼ ta naʼel Dios sventa chakʼ ta naʼel kʼu yelan echʼ xkuxlejal li Jesuse xchiʼuk li kʼusi laj yakʼ ta chanele?».
Veno, toj ep tskoltautik ti chanib to Evanjelio oy ti chal kʼusi la spas xchiʼuk kʼusi laj yal li Jesuse. Xi kalbetik skʼoplale: jnoptik avaʼi ti te vaʼalik chanvoʼ viniketik ta stojolal jun jchanubtasvanej ti lek ojtikinbile. Li buchʼu te vaʼal ta yeloval li jchanubtasvaneje jaʼ jun jtsobpatan. Li buchʼu te oy ta sbatsʼikʼobe jaʼ jun doktor. Li buchʼu te oy ta stsʼetkʼobe jaʼ jun jtsakchoy xchiʼuk yamigo tajek sbaik xchiʼuk li jchanubtasvaneje. Li jun vinik te oy ta spat li jchanubtasvaneje, jaʼ mas kerem to ta xchanvoʼalik. Akʼo mi jmoj tukʼ yoʼontonik, jelajtik ti kʼusi mas tsots skʼoplal laj yilike xchiʼuk ti kʼusi mas laj yalbeik skʼoplale. Jaʼ yuʼun, mi la stsʼibaik ta jujuntal ti kʼusi tspas xchiʼuk ti kʼusi chal li jchanubtasvanej yuʼunike, ta melel jelajtik van ti kʼusitik chalike. Jech oxal chaʼa, kʼalal jelel kʼusi tskʼanik xchiʼuk li kʼusi oy ta yoʼonton la stsʼibaike jaʼ me tskoltautik sventa xkaʼibetik lek smelolal li kʼusi la spas xchiʼuk li kʼusi laj yal jchanubtasvaneje. Vaʼun chaʼa, toj ep me sbalil ta jtabetik ti chanib to Evanjelio oy ta sventa xkuxlejal li Mukʼta Jchanubtasvaneje, li Jesuse.
Kalbetik to skʼoplal li chanvoʼ viniketike, kʼalal la stsʼiba S-evanjelio li jtsobpatane jaʼ la snopbe skʼoplal li krixchanoetik ti xojtikinik kʼu yelan li xkuxlejal judaetike, jech oxal jaʼ laj yalbe skʼoplal li chanubtaseletik yuʼunike xchiʼuk li kʼusitik tspasik sventa xaʼibeik lek smelolale. Li doktore jaʼ mas laj yalbe skʼoplal kʼu yelan poxtaj li jchameletike xchiʼuk li buchʼutik mu xtun skʼobike, pe jaʼ muʼyuk mas laj yal jlom li kʼusitik laj yal jtsobpatane, o moʼoje jelel jutuk ti kʼu yelan xcholet la stsʼibae. Li buchʼu yamigo tajek jchanubtasvaneje jaʼ mas laj yalbe skʼoplal ti kʼusi oy ta yoʼonton li jchanubtasvaneje xchiʼuk ti kʼu yelan stalelale. Yan li buchʼu mas kerem toe mas komkom li Evanjelio la stsʼibae. Manchuk mi jech, lek tukʼ kʼusi la stsʼibaik. Jaʼ yuʼun chaʼa, kʼalal chanib to Evanjelio oy ta sventa xkuxlejal li Jesuse, xuʼ xkaʼibetik lek smelolal li kʼusitik la spase, li kʼusitik laj yakʼ ta chanele xchiʼuk ti kʼu yelan stalelale.
Yikʼaluk van xi chalik li krixchanoetike: «Li S-evanjelio Mateoe» o «Li S-evanjelio Juane». Ta melel, mu chopoluk ti jech chalike, yuʼun chalik «lekil aʼyejetik ta sventa Jesukristo» li jujun jtsʼibajome (Markos 1:1). Pe ti xkaltik leke, kʼajomal noʼox jun Evanjelio ta skotol o jlik slivroal lekil aʼyejetik ta sventa li Jesuse.
Ep ti buchʼutik chchanbeik lek Skʼop Diose skoʼoltasojik li kʼusi chal Mateo, Markos, Lukas xchiʼuk Juane, vaʼun yakʼojik venta ti jmoj smelolale. Jaʼ jech la spas leʼ xa van ta sjabilal 170 ta jkʼakʼaliltik jun jtsʼibajom ta Siria ti Taciano sbie. Jamal laj yakʼ venta ti lek tukʼ kʼusi chale xchiʼuk ti jaʼ yakʼoj ta naʼel Diose. Vaʼun la spas ta jlik livro li kʼusitik kʼot ta pasel ta xkuxlejal li Jesuse xchiʼuk li cholmantal la spase, Diatessaron sbi li slivro taje.
Jaʼ jechtik tspas ek li livro ti xi sbie: Li Jesuse: jaʼ li bee, jaʼ li melele, jaʼ li kuxlejale. Jaʼ noʼoxe mas to lek, yuʼun lek tukʼ li kʼusi chale xchiʼuk lek tsʼakal. Xuʼ jech xkaltik, yuʼun mas xa xkaʼibetik smelolal ti kʼuxi chkʼot ta pasel li albil kʼopetike xchiʼuk li lokʼolkʼopetik laj yal Jesuse. Vaʼun jaʼ jech jamal xkaʼibetik smelolal li kʼusi laj yale, li kʼusi la spase xchiʼuk ti xcholet chal batel ti kʼusi ora kʼot ta pasele. Jech xtok, koltavanem li kʼusitik mukajtik tabile, yuʼun oy kʼusitik chal ta sventa ti kʼusi oy ta yoʼonton li jtsʼibajometik yuʼun Evanjelioe. Pe mu me stakʼ ti jpʼel xa xkaltik ta sventa ti kʼu yelan xcholet xa kʼot ta pasel skotole. Akʼo mi jech, laj yichʼ akʼbel yipal sventa lekuk ta smelolal xchiʼuk ta rasonuk xchol batel aʼyej li livro liʼe.
JAʼ BE, JAʼ MELEL XCHIʼUK JAʼ KUXLEJAL
Kʼalal chakʼupin batel ta xchanel li livro liʼe, nopo kʼusi chakʼ achan xchiʼuk avutsʼ avalal. Teuk me ta ajol ti xi laj yalbe jtakbol Tomas li Jesuse: «Voʼon li beune, voʼon li melelune xchiʼuk voʼon li kuxlejalune. Muʼyuk buchʼu xuʼ xtal ta stojolal li Totile, jaʼ noʼox ta jventa» (Juan 14:6).
Li livro liʼe jaʼ me tskoltaot sventa xavakʼ venta ti jaʼ ‹be› ta melel li Jesuse. Jaʼ noʼox me ta stojolal xuʼ xijnopaj ta stojolal Jeova kʼalal ta jkʼopontike. Jech xtok, jaʼ me be xkaltik li Jesus sventa lek xkil jbatik xchiʼuk li Diose (Juan 16:23; Romanos 5:8). Ta melel, jaʼ noʼox me koliyal Jesus ti xuʼ xkamigointik li Diose.
Xi laj yal li Jesuse: «Voʼon li melelune». Jaʼ jech vinaj ta skʼopojel xchiʼuk ta xkuxlejal li kʼusi laj yale, yuʼun jaʼ ta stojolal Jesus ti la staik kʼusi melel li krixchanoetike. Ta melel, «jaʼ jech ‹xuʼ› kʼotem [ta pasel ep albil kʼopetik] ta stojolal» (2 Korintios 1:20; Juan 1:14). Li albil kʼopetik taje jaʼ tskoltautik sventa xkiltik ti toj tsots skʼoplal yabtel Jesus ta sventa li kʼusi tskʼan tspas Diose (Apokalipsis 19:10).
Xi laj yal li Jesuse: «Voʼon li kuxlejalune». Kʼalal la spojutike, jaʼ xkaltik, ti laj yakʼ xkuxlejal xchiʼuk ti la smal xchʼichʼel ta jtojolaltike, jaʼ me ta jtatik-o «li batsʼi mero kuxlejale», «li kuxlejal sbatel [osile]» (1 Timoteo 6:12, 19; Efesios 1:7; 1 Juan 1:7). Maʼuk noʼox, yuʼun ta smiyonal noʼox animaetik chakʼbe ‹xkuxlejal› xtok sventa xkuxiik sbatel osil ta Paraiso (Juan 5:28, 29).
Ta melel, jkotoltik me skʼan oyuk sbalil xkiltik li kʼusi yabtel tspas Jesus ta sventa li kʼusi tskʼan tspas Diose. Jech oxal chaʼa, xkuxetuk noʼox me avoʼonton ojtikino batel mas li Jesuse, yuʼun ‹jaʼ be, jaʼ melel xchiʼuk jaʼ kuxlejal›.
