Ta skoj ti jaʼ jun tukʼil krixchano echʼ li Jesuse, muʼyuk bu mas jech laj yil svokol xchiʼuk laj yat yoʼonton kʼuchaʼal yan krixchanoetike. Akʼo mi jech, kʼux laj yaʼi li jnaklejetike. Jaʼ yuʼun la spas ep kʼusitik sventa tskoltaan, manchuk mi mu toj persauk yilel. Jaʼ jech, ta skoj ti oy xkʼuxul yoʼontone la skolta li krixchanoetike. Kʼelavil kʼu yelan laj yakʼ ta ilel stalelal ta kapitulo 32, 37, 57 xchiʼuk ta 99.

Xmuyubaj noʼox chnopajik ta stojolal Jesus li uni ololetike xchiʼuk li yijil krixchanoetike, yuʼun muʼyuk bu ti mu xaxokob tspas sbae o ti xtoyet xae. Ta skoj ti xilbeik ta stalelal ti toj lek yoʼontone, jun yoʼonton chnopajik ta stojolal. Kʼelavil kʼuxi la spas ti te ta jtatik ta kapitulo 25, 27 xchiʼuk ta 95.

Nopajtik noʼox ti ta sjunul yoʼonton tskʼopon Stot ta orasion li Jesuse, bakʼintike ta stuk o mi moʼoje xchiʼuk yajtuneltak Dios. Ep bu la spas orasion, maʼuk noʼox li ta yorail veʼele. La spas orasion sventa tstojbe ta vokol li Stote, sventa tskʼupil kʼopta xchiʼuk sventa chalbe ti akʼo xbeiltasat kʼalal oy kʼusi tsots skʼoplal tsnope. Te chkilbetik kʼu yelan stalelal ta kapitulo 24, 34, 91, 122 xchiʼuk ta 123.

Bakʼintike tskʼan chkux yoʼonton jlikeluk li Jesuse. Pe muʼyuk bu jech la spas ta skoj ti tskʼan tskolta li krixchanoetike. Muʼyuk bu la snop ti jaʼ mas tsots skʼoplal li stuke. Jaʼ me jech skʼan jpastik ek. Jkʼeltik avil kʼu yelan laj yakʼ ta ilel ta kapitulo 19, 41 xchiʼuk ta 52.

Maʼuk noʼox laj yakʼ ta chanel ti skʼan xij-akʼvan ta pertone, yuʼun laj yakʼ ta ilel ta stalelal xtok kʼalal laj yakʼ ta perton li yajchankʼoptake xchiʼuk li yan krixchanoetike. Jnopbetik skʼoplal avaʼi li kʼusi chal ta kapitulo 26, 40, 64, 85 xchiʼuk ta 131.

Albil xa onoʼox ti jutuk mu skotoluk li judaetike mu skʼan stsakik ta mukʼ ti jaʼ Mesias li Jesuse xchiʼuk ti chlaj ta milel yuʼun yajkontratake. Jech oxal, xuʼ muʼyuk kʼusi mas la spas jechuk ta stojolal li krixchanoetike. Pe mu jechuk la spas, kʼajomal laj yakʼbe yipal ti jaʼuk xichʼik ta mukʼ Dios ta melel li krixchanoetike. Toj lek laj yakʼ ta ilel stalelal ta sventa li yajtsʼaklomtak ti chilik ilbajinele, o ti chilik kontrainel xtoke. Kʼelavil li kapitulo 16, 72 xchiʼuk li 103.

Ta skoj ti jaʼ jun tukʼil krixchano echʼ li Jesuse mi jaʼuk xijkoʼolaj xchiʼuk, yuʼun jaʼ mas ep yojtikinobil yuʼun xchiʼuk mas pʼij. Ta melel mas pʼij snopben xchiʼuk mas xtojob yok skʼob ta spasel kʼusitik. Akʼo mi jech, bikʼit laj yakʼ sba, tun ta stojolal yantik. Jchantik li kapitulo 10, 62, 66, 94 xchiʼuk li 116.

Laj yakʼ ta ilel ti oy smalael yuʼun Jesus ta stojolal li yajtakboltake xchiʼuk ta stojolal yan krixchanoetik kʼalal muʼyuk chchanbat stalelale xchiʼuk kʼalal muʼyuk bu chakʼ ta xkuxlejalik li kʼusi chakʼbe xchane. Jamal xvinaj ti oy smalael yuʼun kʼalal laj yakʼbe xchan yan velta mantaletik li krixchanoetik yoʼ xnopajik ta stojolal li Jeovae. Kʼelavil kʼu yelan laj yakʼ ta ilel ta kapitulo 74, 98, 118 xchiʼuk ta 135.