Li ta slokʼeb Kʼakʼal ta Vits Olivatik ti te van oxibuk kilometro xil Jerusalene, te xkom jun bikʼit lum ti jaʼ sbi Betaniae (Juan 11:18). Li Jesuse te kʼot ta sna Marta xchiʼuk Maria ti smuk xvix sbaike. Li tsebetik xchiʼuk li smukik ti Lasaro sbie yamigoik tajek li Jesuse, jaʼ yuʼun oy ta yoʼontonik ti tskʼan lek chchʼam ta snaike.

Jaʼ jun matanal ti kʼot ta vulaʼal ta snaik li Mesiase, oy tajek ta yoʼonton Marta ti tsmakʼlin leke, jaʼ yuʼun och ta spasel veʼlil ta anil. Kʼalal yakal tspas lekil veʼlil li Martae te chot xi ta yok Jesus li Maria ti jaʼ mukile sventa chchikinta li kʼusi chale. Vaʼun xi laj yalbe Marta li Jesuse: «Kajval, ¿mi lek noʼox chavil ti jtuk chakʼ jpas jmuk li kʼusitik skʼan pasele? Albo ti akʼo xtal skoltaune» (Lukas 10:40).

Muʼyuk kʼusi chopol xalbe Maria li Jesuse, jaʼ oy kʼusi laj yalbe li Marta ta skoj ti jaʼ batem ta yoʼonton li kʼusitik chichʼ lajesele, yuʼun xi laj yalbee: «Marta, Marta, toj ep kʼusitik chavul-o avoʼonton. Yuʼun jutuk noʼox li kʼusi chtune o mi moʼoje jun noʼox. Yan li Mariae jaʼ la stʼuj li kʼusi leke, vaʼun muʼyuk bu chichʼ pojbel» (Lukas 10:41, 42). Jaʼ jech, jamal laj yakʼ ta ilel Jesus ti mu persauk ep tajek jchʼakbetik yorail sventa jpastik epal veʼlile. Moʼoj, yuʼun lek noʼox ta jsetʼ-juteb.

Lek li kʼusi oy ta yoʼonton Martae, yuʼun tskʼan lek chchʼamvan ta sna. Pe kʼalal jaʼ batem tajek ta yoʼonton ta spasel sveʼele, ¡jaʼ jech muʼyuk bu laj yaʼi li mantal ti toj echʼ xa noʼox ep sbalil yakal chal li Xnichʼon Diose! Vaʼun laj yal Jesus ti jaʼ la stʼuj kʼusi lek li Mariae, yuʼun tstabe sbalil ta sjunul xkuxlejal xchiʼuk oy kʼusi toj tsots skʼoplal laj yakʼ jchantik ek.

Oy jun velta xtok ti oy kʼusi laj yakʼ ta chanel Jesus ti toj tsots skʼoplale. Xi jakʼbat yuʼun jun yajchankʼope: «Kajval, chanubtasunkutik kʼuxi ta pasel orasion, jech kʼuchaʼal la xchanubtas yajchankʼoptak li Juane» (Lukas 11:1). Leʼ xa van ta jun jabil xchiʼuk oʼlol ti laj yakʼ ta chanel Jesus ta Mantaletik ta Vits ti kʼuxi ta pasel orasione (Mateo 6:9-13). Pe jaʼo muʼyuk te oy yaʼeluk li jchankʼop la sjakʼe, jaʼ yuʼun la xchaʼal Jesus li kʼusitik mas tsots skʼoplale. Vaʼun laj yal jun lokʼolkʼop sventa xakʼ ta ilel ti skʼan mu xijlubtsaj ta spasel orasione.

Xi laj yale: «Jnoptik avaʼiik ti oy junuk avamigoik ti chbat akʼoponik ta oʼlol akʼobal ti xi chavalbeike: ‹Amigo, jkʼextik oxibuk apan, yuʼun tal jun kamigo ti jaʼ to vul tal ta nome, vaʼun muʼyuk kʼusi xkakʼbe slajes›. Pe xi tstakʼ tal ta yut nae: ‹Anchan xa. Jmakoj xa lek stiʼ jna, puchʼulun xa ta tem xchiʼuk kuni nichʼnab. Mu xa xuʼ xilik xchiʼuk mu xuʼ kʼusi xkakʼbot jutebuk›. Chkalboxuk avaʼiik ti chlik yakʼbe li kʼusitik chtun yuʼun li yamigoe, pe maʼuk ta skoj ti yuʼun jaʼ yamigoe, jaʼ ta skoj ti solel te xkʼankʼune» (Lukas 11:5-8).

Maʼuk yakal chakʼ ta aʼyel Jesus ti yuʼun mu skʼan lek stakʼ j-orasiontik Jeova kʼuchaʼal li amigoil taje. Moʼoj, ti kʼusi laj yakʼ ta aʼyele jaʼ ti ta onoʼox xakʼ kʼusi chkʼanbat li amigoil mi oy buchʼu te xvulvun ta stojolale, akʼo mi vokol chaʼi ti jech tspase. ¡Pe mas to me tstakʼbe s-orasion tukʼil yajtuneltak li jkʼanvanej Totil ta vinajel ti ta sjunul yoʼonton tspasike! Xi to laj yal li Jesuse: «Jaʼ yuʼun chkalboxuk avaʼiik ti xakʼanilanike, vaʼun cha-akʼbatik; saʼilanik, vaʼun chataik; kʼojilanik li tiʼ nae, vaʼun chajambatik. Yuʼun skotol li buchʼu tskʼane ch-akʼbat, skotol li buchʼu tsaʼe tsta xchiʼuk skotol li buchʼu tskʼojilan tiʼ nae chjambat» (Lukas 11:9, 10).

Vaʼun li Jesuse lik yal kʼu yelan stalelal li totiletik sventa xaʼibeik lek smelolal li kʼusi yakal chalbe skʼoplale. Xi laj yale: «¿Buchʼu junukal totil avuʼunik ti chon chakʼbe xnichʼon kʼalal  chkʼanbat choye? ¿O mi tsek van chakʼbe kʼalal chkʼanbat ton alakʼe? Jaʼ yuʼun chaʼa, mi lek li matanaletik xanaʼ xavakʼbeik anichʼnabik akʼo mi toj chopoloxuk li voʼoxuke, ¡buuk xa jech tspas li Atotik te oy ta vinajele, chʼul espiritu chakʼbe li buchʼutik tskʼanike!» (Lukas 11:11-13). ¡Batsʼi toj lek ti kʼu yelan laj yakʼ ta chanel Jesus ti ta sjunul yoʼonton chchikinta j-orasiontik li Jtotike xchiʼuk ti chakʼbutik li kʼusi chtun kuʼuntike!