Mi jaʼuk xchʼun jfariseoetik ti jaʼ Jesus ti buchʼu la sjambe sat li vinik ti maʼsat onoʼox vokʼeme, jech oxal la stakbeik ta ikʼel li stot smeʼe. Snaʼoj lek li stot smeʼ vinik «ti tsnutsik lokʼel ta nail tsobobbail mi oy buchʼu chal ta jamal ti jaʼ Kristoe» (Juan 9:22). Kʼalal oy buchʼu chichʼ nutsel lokʼele jaʼ me jech chchʼak-o sbaik xchiʼuk li yamigotakike xchiʼuk chil-o svokolik ta takʼin.

Oy chaʼtos kʼusi la sjakʼbeik skʼoplal li jfariseoetike: «¿Mi jaʼ akeremik liʼe, ti maʼsat onoʼox vokʼ chavalike? ¿Kʼuxi ti xil xa osil li avie chaʼa?». Xi la stakʼ li totil meʼile: «Jnaʼojkutik ti jaʼ jkeremkutike xchiʼuk ti maʼsat onoʼox vokʼe. Pe ti kʼusi mu jnaʼkutike jaʼ ti kʼuxi jam li sate xchiʼuk mu jnaʼkutik xtok buchʼu ti la sjame». Manchuk onoʼox mi albat yuʼun li skeremike, yichʼoj tajek smelol ti kʼu yelan chtakʼavike, jaʼ yuʼun xi laj yalike: «Jakʼbeik stuk, yuʼun mukʼ xa. Akʼo yal skʼoplal stuk» (Juan 9:19-21).

Vaʼun la stakik ta ikʼel yan velta vinik li jfariseoetike xchiʼuk la sibtasik, laj yalbeik ti oy lek sprevail yuʼunik ti oy la smul li Jesuse. Xi laj yalik mantale: «Alo ta jamal ta sat Dios; yuʼun jnaʼojkutik ti jaʼ jun jsaʼmulil li vinik taje». Xi laj yal li vinik ti jam sat sventa chakʼ ta ilel ti mu meleluk li kʼusi chalike: «Mu jnaʼ mi jaʼ jun jsaʼmulil li vinike, ti kʼusi noʼox jnaʼoje jaʼ ti maʼsatun toʼoxe, pe li avi une xkil xa osil» (Juan 9:24, 25).

Mu skʼan jfariseoetik ti jechuk noʼox xkome, jaʼ yuʼun xi to laj yalike: «¿Kʼusi la spasbot? ¿Kʼuxi la sjambot li asate?». Laj yakʼ ta ilel li vinik ti tsots jutuk yoʼontone, yuʼun xi la stakʼe: «Laj xa kalboxuk, pe mu xakʼan xachʼunik. ¿Kʼu yuʼun chakʼan chavaʼiik yan velta? ¿Mi yuʼun chakʼan cha-ochik ta yajchankʼop ek?». Pe xi laj yal li jfariseoetik ta stiʼetel sjolike: «Voʼot yajchankʼopot li vinik taje, yan li voʼonkutike jaʼ yajchankʼopunkutik li Moisese. Jnaʼojkutik ti kʼoponat yuʼun Dios li Moisese; jaʼuk li vinik taje mu jnaʼkutik bu likem tal» (Juan 9:26-29).

Labal to sba laj yaʼi li jkʼanlimoxnae, jaʼ yuʼun xi laj yale: «Ta melel, toj labal sba ta aʼiel ti mu xanaʼik bu likem tale, akʼo mi jech, la sjambun jsat». Vaʼun laj yal vinik ti chchikintabat skʼop yuʼun Dios li buchʼu poxtavane xchiʼuk ti lek ch-ilat yuʼun Diose, yuʼun xi laj yale: «Jnaʼojtik ti muʼyuk ch-aʼibat skʼop yuʼun Dios li jpasmuliletike, pe mi oy buchʼu chiʼta Dios xchiʼuk ti tspasbe li kʼusi tskʼan yoʼontone ch-aʼibat skʼop. Yuʼun muʼyuk bu xkaʼibetik-o skʼoplal ta voʼne mi oy buchʼu xuʼ yuʼun ta sjambe sat junuk krixchano ti maʼsat onoʼox vokʼe». Laj une xi la stsutses sloʼil li vinike: «Ti maʼukuk ta stojolal Dios likem tal li vinik taje, mu kʼusi spas yuʼun jsetʼuk ti jechuke» (Juan 9:30-33).

Mu xa snaʼ kʼusi tstakʼbeik jkʼanlimoxna li jfariseoetike, jaʼ yuʼun xi lik xchopol kʼoptaike: «Pixilot xa onoʼox ta mulil kʼalal lavokʼe, ¿kʼuxi xa noʼox ti voʼot chtal achanubtasunkutike?». Vaʼun la snutsik lokʼel (Juan 9:34).

Kʼalal laj yaʼi Jesus ti kʼusi kʼot ta pasele, bat saʼ li vinike xchiʼuk xi la sjakʼbee: «¿Mi chavakʼ xchʼunel avoʼonton ta stojolal li Xnichʼon krixchanoe?». Xi la stakʼ li vinik ti jam sate: «¿Buchʼu taje, bankilal? Albun kaʼi, yuʼun chkakʼ xchʼunel koʼonton ta stojolal». Xi jamal laj yal li Jesuse: «Liʼ akʼeloje, yuʼun ta melel, jaʼ li buchʼu yakal chchiʼinot ta loʼile» (Juan 9:35-37).

Xi la stakʼ li vinike: «Chkakʼ xchʼunel koʼonton ta stojolal chaʼa, Kajval». Laj yakʼ ta ilel ti chakʼ xchʼunel yoʼonton ta stojolale xchiʼuk ti chichʼ ta mukʼe, jaʼ yuʼun la snijan sba ta stojolal. Vaʼun xi laj yal li Jesuse: «Jaʼ me chichʼ tsakel ta mukʼ sventa chapanel ti lital ta balumile: sventa xilik osil li buchʼutik mu xilik osile xchiʼuk sventa spasik ta maʼsat li buchʼutik xilik osile» (Juan 9:38, 39).

Li jfariseoetik ti jaʼo te oyike snaʼojik ti maʼuk  maʼsatetike. Pe ¿kʼusi xuʼ xkaltik ta sventa li jbeiltasvanejetik ta mantal ta alele? Xi xkʼakʼet sjol la sjakʼike: «Maʼuk maʼsatunkutik ek, ¿mi mu jechuk?». Xi laj yal li Jesuse: «Ti yuʼunuk maʼsatukoxuke muʼyuk amulik ti jechuke. Pe xi chavalike: ‹Xkilkutik osil›. Jaʼ yuʼun te akuchoj-o li amulike» (Juan 9:40, 41). Oy van srasonal jechuk ti la spʼajik Jesus ti maʼukuk jchanubtasvanejetik ta Israele. Pe jaʼ jun tsatsal mulil ti la spʼajike, yuʼun xojtikinik lek li Mantale.