Poʼot xa xnel li sjabilal 32 ta jkʼakʼaliltike xchiʼuk poʼot xa xlokʼ oxib jabil ti laj yichʼ voʼ li Jesuse. Jaʼ to ayik ta kʼin Axibalna ta Jerusalen xchiʼuk li yajchankʼoptake. Pe te to nopol oyik yaʼel (Lukas 10:38; Juan 11:1). Ta melel, tetik xa noʼox oy ta Judea o ta jot Ukʼum Jordan ta yosilal Perea chchol mantal li Jesuse, jaʼtik xa noʼox te ti kʼajomal xa noʼox vakib u chchol mantale. Yuʼun skʼan cholel mantal ek li ta lumetik taje.

Laj xa onoʼox xchol mantal jayibuk u ta Judea xchiʼuk xanav ta Samaria li Jesuse, jaʼo kʼalal echʼem xaʼox li kʼin Koltael ta sjabilal 30 ta jkʼakʼaliltike. Pe kʼalal poʼot xaʼox van li kʼin Koltael ta sjabilal 31 ta jkʼakʼaliltike, ta ox smil yaʼiik Jesus li judaetik ta Jerusalene. Jaʼ yuʼun te bat ta snorteal Jerusalen, ta Galilea, sventa masuk xchol mantal te. Vaʼun ep buchʼutik kʼot ta yajchankʼoptak li vaʼ kʼakʼale. Jaʼ te ta Galilea la xchanubtas yajtakboltak li Jesuse xchiʼuk ti la stak batel ta cholmantale. Xi laj yalbe batele: «Cholik mantal xchiʼuk xi xavalilanike: ‹Nopajem xa tal li Ajvalilal ta vinajele›» (Mateo 10:5-7). Li avie yakal xa chchapan jun kampanya sventa cholmantal ta Judea.

Sventa slikes li kampanya taje la stʼuj 70 ta voʼ yajchankʼoptak sventa stak batel ta chaʼchaʼvoʼ. Jaʼ yuʼun bat 35 ta chop jcholmantaletik sventa Ajvalilal yuʼun Dios ti bu «toj ep kʼusitik tsʼunbil ti skʼan tsobbel sate, pe jaʼ toj jutuk li j-abteletike» (Lukas 10:2). Vaʼun jaʼ baʼyuk bat xcholik mantal li ta lumetik ti bu chkʼot ta tsʼakal li Jesuse. La xpoxtaik jchameletik li 70 ta voʼ jchankʼopetik taje xchiʼuk jaʼ onoʼox la xcholik batel li mantal la xchol Jesuse.

Maʼuk te chchanubtasvanik ta nail tsobobbailetik li jchankʼopetike. Yuʼun albatik yuʼun Jesus ti akʼo xbat xcholbeik mantal ta sna li krixchanoetike. Xi albatike: «Xi me baʼyel xavalik kʼalal cha-ochik ta yut nae: ‹Junuk avoʼontonik li buchʼutik liʼ nakaloxuk ta nae›. Yuʼun mi oy buchʼu lek xil sba xchiʼuk li jun oʼontonale, ta me xichʼ li jun oʼontonal avuʼunike». ¿Kʼusi ti chakʼik ta chanele? Xi laj yal li Jesuse: «Xi xavalbeike: ‹Nopajem xa tal ta atojolalik li Ajvalilal yuʼun Diose›» (Lukas 10:5-9).

Li mantal laj yalbe li 70 ta voʼ yajchankʼoptak li Jesuse xkoʼolaj kʼuchaʼal li mantal laj yalbe li lajchaʼvoʼ yajtakboltak kʼalal la stak batel ta cholmantal leʼ xa van ta jun jabile. Albatik onoʼox ti mu skotoluk krixchanoetik lek chaʼiik li mantal chcholike. Pe ti vaʼ yelan chakʼbeik yipal cholmantale jaʼ sventa ti oyuk tajek ta yoʼonton krixchanoetik ta yojtikinel li Jchanubtasvanej ti poʼot xa xkʼot tee xchiʼuk ti oyuk ta yoʼontonik chchikintabeik li kʼusi chakʼ ta chanele.

Mu ta sjaliluk une, sutik tal ti bu oy Jesus li 35 ta chop jcholmantaletik sventa Ajvalilal yuʼun Diose. Xi xmuyubaj vul yalbeike: «Kajval, kʼalal ta pukujetik la xchʼunik jmantalkutik kʼalal la jtuneskutik abie». Xkuxet van tajek yoʼonton laj yaʼi Jesus kʼalal albat li kʼusitik lek kʼot ta pasel yuʼunike, jaʼ yuʼun xi  laj yale: «Laj kil ti sjisluj xa yalel ta balumil kʼuchaʼal saksevul ta vinajel li Satanase. ¡Kʼelo avilik!, laj kakʼ avabtelik sventa xapechʼilanik ta tekʼel li chon xchiʼuk tseke» (Lukas 10:17-19).

Kʼalal jech albatik yuʼun Jesus li jchankʼopetike jaʼ sventa x-albat yaʼiik ti ta xkuch yuʼunik li kʼusitik chopol tspasbatike, ti xkoʼolaj kʼuchaʼal chpechʼilanik ta tekʼel chonetik xchiʼuk tseketike. Jech xtok, xuʼ spat yoʼontonik ti jpʼel skʼoplal chichʼ jipel lokʼel ta vinajel li Satanase. Maʼuk noʼox, yuʼun laj yalbe yajchankʼoptak Jesus ti akʼo xakʼik venta kʼusi ti mas to tsots skʼoplal ta tsʼakale, yuʼun xi laj yale: «Mu me jaʼuk xkuxetuk-o avoʼontonik taje, ti la xchʼunik amantalik li pukujetike, jaʼ kuxetuk-o avoʼontonik ti teuk tsʼibabil ta vinajel li abiike» (Lukas 10:20).

Xmuyubaj tajek Jesus la skʼupil kʼopta Stot ta skoj ti toj labal sba kʼu yelan tstunes li yajtuneltak ti bikʼit yakʼoj sbaike. La skʼel batel yajchankʼoptak li Jesuse, xi laj yalbee: «Xmuyubaj noʼox satik li buchʼutik chilik li kʼusitik yakal chavilike. Yuʼun chkalboxuk avaʼiik ti ep j-alkʼopetik xchiʼuk ajvaliletik oy ox ta yoʼonton tskʼel yaʼiik li kʼusitik chakʼelik voʼoxuke, pe muʼyuk bu xilik, xchiʼuk oy ox ta yoʼonton chaʼiik li kʼusitik chavaʼiik voʼoxuke, pe muʼyuk bu xaʼiik» (Lukas 10:23, 24).