Ep ta tos kʼu yelan laj yakʼ persa sventa tstijbe yoʼonton krixchanoetik li Jesuse, sventa snopik ti kʼu yelan oyik ta stojolal li Diose. Yuʼun kʼalal laj xaʼox yoʼonton ta xchiʼinel ta loʼil krixchanoetik te ta stsʼel sna jun jfariseoe te laj yalbe skʼoplal xtok taje.

Jlom li buchʼutik te taje laj yalbeik skʼoplal ti oy kʼusi tsots kʼotem ta pasele. Jaʼ chalbeik skʼoplal ti «kʼu yelan milatik yuʼun [ajvalil ta Roma Ponsio] Pilato li jgalileaetik kʼalal jaʼo te chakʼik milbil matanale» (Lukas 13:1). ¿Kʼu yuʼun ti jech laj yalike?

Yikʼaluk van jaʼo lajik ta milel jgalileaetik kʼalal ta smilal xa noʼox judaetik bat skʼanik parte ta stojolal Pilato ta skoj ti la stunes li takʼin ta temploe. ¿Kʼusi sventa? Sventa tspasbe sbe voʼ yoʼ xkʼot kʼalal to ta Jerusalen. Ti buchʼutik van la skolta sbaik ta slokʼesel li takʼin ta templo sventa xakʼbeik li Pilatoe jaʼik li j-abteletik ta temploe. Yikʼaluk van li buchʼutik yakal chchapik li kʼusi kʼot ta pasel taje tsnopik ti yuʼun toj tsots spasoj smulik li jgalileaetik ti la snuptanik tsatsal vokolile. Pe mu jechuk tsnop maʼ Jesuse.

Xi la sjakʼe: «¿Mi chanopik ti jaʼ mas to toj tsots smulik li jgalileaetik ta skoj ti vaʼ yelan tsots vokol la snuptanike, ti jaʼ mu sta jech smulik li yan jgalileaetike?». «Moʼoj, mu jechuk», xi li Jesuse. Vaʼun xi la spʼijubtas judaetik ta sventa li kʼusi kʼot ta pasele: «Mi mu xasutes avoʼontonike jaʼ me jech chalaj akotolik ek» (Lukas 13:2, 3). Laje laj yalbe skʼoplal ti oy kʼusi yan jaʼ to kʼotem ta pasel xtoke, yikʼaluk van jaʼ ta skoj xtok li smeltsanbel sbe voʼe. Xi la sjakʼe:

«O ti vaxaklajunvoʼ chamik ta skoj ti lajik ta netʼel ta toyol kʼelob osil ta Siloame, ¿mi chanopik ti jaʼ mas to toj tsots smulik ti vaʼ yelan la snuptanike, ti jaʼ mu sta jech skotol li yan krixchanoetik te nakalik ta Jerusalene?» (Lukas 13:4.) Yikʼaluk van la snop krixchanoetik ti jaʼ chamik-o ta skoj ti toj chopolike. Pe mu jechuk tsnop maʼ Jesus xtoke. Yuʼun snaʼoj ti xuʼ oy kʼusitik chopol jnuptantik ta skoj «li kʼusitik muʼyuk malabil chkʼot ta pasele» (Eclesiastés 9:11, TNM). Pe oy kʼusi tsots skʼoplal skʼan xchanik li krixchanoetik ta sventa li kʼusi kʼot ta pasele. Xi laj yal li Jesuse: «Mi mu xasutes avoʼontonike jaʼ me jech chalaj akotolik ek» (Lukas 13:5). Pe ¿kʼu yuʼun mas xa toj tsots skʼoplal avi ti jech chalbe mantal li krixchanoetike?

Jaʼ jech chal ta skoj ti kʼu xa sjalil slikel tal ta cholmantale, vaʼun la stunes jun lokʼolkʼop sventa chchapbe lek smelolal. Xi laj yale: «Oy jun vinik ti te tsʼunul jtekʼ igo ta stsʼusubtake, tal stulbe sat, pe chʼabal bu la sta. Jech oxal xi laj yalbe li jtsʼuntsʼusube: ‹Oy xa ta oxib jabil liʼ xivaʼvun ta sabel sat li teʼel igoe, pe chʼabal bu jta. ¡Tsʼeto lokʼel! ¿Kʼu yuʼun ti jecheʼ liʼ tsmak balumile?›. Vaʼun xi takʼav li jtsʼuntsʼusube: ‹Kajval, akʼo to te oyuk li jabil liʼe, ta jokʼbe baʼyel li xokontak yoke xchiʼuk chkakʼbe skʼaʼal. Mi laj yakʼ sat ta tsʼakale, lek un bi; pe mi muʼyuke tsʼeto lokʼel›» (Lukas 13:6-9).

Oy xa mas ta oxib jabil ti yakʼoj persa ta xchʼiesbel xchʼunel yoʼonton judaetik li Jesuse. Pe jayvoʼ noʼox ti buchʼutik kʼotemik ta yajchankʼoptake, ti xuʼ xkaltik ti jaʼ li kʼusi lek kʼotem ta pasel yuʼun ta skoj li cholmantal tspase. Vaʼun mas to laj yakʼbe yipal cholmantal kʼalal stsakoj xaʼox xchanibal jabil chchol mantale. Yuʼun la sjokʼbe yok xchiʼuk laj yakʼbe skʼaʼal xkaltik li judaetik ti xkoʼolaj kʼuchaʼal teʼel igo kʼalal la xchol mantal xchiʼuk chanubtasvan  li ta Judea xchiʼuk ta Pereae. ¿Mi ep buchʼutik la xchʼunik? Muʼyuk, jayvoʼ noʼox judaetik ti kʼot ta yoʼontonike. Yuʼun jutuk mu sjunuluk jteklum muʼyuk la skʼan la sutes yoʼontonik, jech oxal jaʼ xa skʼelojik batel li lajelale.

Kʼalal mu toʼox jaluk yechʼele, jamal vinaj yan velta ti muʼyuk ta yoʼonton chchʼunike, yuʼun oy kʼusi kʼot ta pasel ta skʼakʼalil Savado. Te chchanubtasvan ta nail tsobobbail li Jesuse. Te laj yil jun ants ti oy xa ta vaxaklajuneb jabil ti xvujvun chanav ta skoj ti uʼuninbil yuʼun pukuje. Kʼuxubaj ta yoʼonton ants li Jesuse, xi laj yalbee: «Ants, chkol li achamele» (Lukas 13:12). Laj yakʼ skʼob ta stojolal li antse xchiʼuk ta ora noʼox lik tukʼibuk li spate, vaʼun lik skʼupil kʼopta li Diose.

Pe chopol tajek laj yil li bankilal jpasmantal ta nail tsobobbaile, jaʼ yuʼun xi laj yale: «Oy vakib kʼakʼal sventa xij-abtej; jaʼo xatalik sventa xavichʼik poxtael, pe mu xatalik maʼ ta skʼakʼalil Savadoe» (Lukas 13:14). Muʼyuk bu chal bankilal jpasmantal ti muʼyuk sjuʼel Jesus sventa chpoxtavane, moʼoj, ¡ti kʼusi laj yale jaʼ ti oy smulik li krixchanoetik ta skoj ti chtal skʼanik poxtael ta skʼakʼalil Savadoe! Pe xi jamal laj yal li Jesuse: «Jloʼlavanejetik, ¿mi muʼyuk chatitun lokʼel ta sna stot avakaxik o avuroik ta skʼakʼalil Savado sventa chbat avakʼbeik yuchʼ voʼ? Jaʼ yuʼun chaʼa, ¿mi mu lekuk xanaʼik ti xkol lokʼel ta mosoil ta skʼakʼalil Savado li ants liʼe, ti jaʼ stseb Abraan, ti oy xa ta vaxaklajuneb jabil chukbil yuʼun li Satanase?» (Lukas 13:15, 16).

Chkʼexavik li jkontrainvanejetike, pe xmuyubajik noʼox maʼ li krixchanoetik ta skoj li kʼusi labal sba laj yilik la spas Jesuse. Vaʼun la xchaʼal chib lokʼolkʼop liʼ ta Judea ta sventa li Ajvalilale, ti laj xa onoʼox yal kʼalal jaʼo te oy ta jkot varko ta Nab Galileae (Mateo 13:31-33; Lukas 13:18-21).