Kʼalal te to chveʼ ta sna jfariseo li Jesuse, ta smilal xa noʼox krixchanoetik te chmalaat ta pana. Jaʼ jechtik laj yil Jesus kʼuchaʼal li epal krixchanoetik ta Galileae (Markos 1:33; 2:2; 3:9). Yuʼun ep buchʼutik ta Judea ti tskʼan tskʼelik xchiʼuk tskʼan chchikintaik li kʼusi chakʼ ta chanele, mi jaʼuk xkoʼolajik xchiʼuk li jfariseoetik ti bu ay ta veʼel li Jesuse.

Li kʼusi baʼyel laj yal Jesuse jaʼ mas toj tsots skʼoplal ta sventa li yajchankʼoptake, xi laj yale: «Kʼelo me abaik ta skoj slevadurail li jfariseoetike, ti jaʼ li loʼlavaneje». Oy xa onoʼox jech pʼijubtasvan, pe ta skoj ti kʼu yelan laj yil li jfariseoetik ti bu ay ta veʼele toj tsots skʼoplal laj yaʼi ti xpʼijubtasvan yan veltae (Lukas 12:1; Markos 8:15). Sventa tsmukik ti toj chopol yoʼonton li jfariseoetike lek xa yoʼonton tspas sbaik yilel, pe taje toj xibal me sba, jaʼ yuʼun skʼan xakʼik venta li krixchanoetike. Xi laj yal li Jesuse: «Muʼyuk kʼusi lek nakʼal ti muʼyuk chichʼ vinajesele xchiʼuk muʼyuk kʼusi mukul ti muʼyuk chichʼ akʼel ta naʼele» (Lukas 12:2).

Yikʼaluk van ep li buchʼutik te oyik ta stsʼel Jesuse jaʼik judaetik ti muʼyuk xaʼiik kʼalal chanubtasvan ta Galileae. Jaʼ yuʼun la xchaʼal li kʼusitik tsots skʼoplal yaloj xa noʼoxe. Xi laj yalbe skotol li krixchanoetike: «Mu xaxiʼtaik li buchʼu xmil yuʼun abekʼtalike pe ti mu xa kʼusi xuʼ yuʼun spasel ta tsʼakale» (Lukas 12:4). Jaʼ onoʼox jech kʼuchaʼal laj yal ta slikebale, laj yalbe yajtsʼaklomtak ti skʼan spat yoʼontonik ti chchabiatik onoʼox yuʼun li Diose. Jech xtok, laj yalbe ti skʼan xojtikinik li Xnichʼon krixchanoe xchiʼuk ti skʼan xakʼik venta ti xuʼ xkoltaatik yuʼun li Diose (Mateo 10:19, 20, 26-33; 12:31, 32).

Vaʼun oy jun vinik ti laj yakʼ ta ilel ti oy kʼusi chat-o yoʼontone, xi laj yale: «Jchanubtasvanej, albo li jbankil ti akʼo koʼol jchʼakbe jbakutik li kʼusi chkichʼkutike» (Lukas 12:13). Jamal chal Smantal Dios ti j-oʼlol to yepal xjelav sparte chichʼ li ba nichʼonile, jaʼ yuʼun muʼyuk chlik-o kʼop ti jechuke (Deuteronomio 21:17). Pe kʼuchaʼal chkakʼtik ventae, xuʼ van maʼuk noʼox jech yepal chichʼ yaʼi ti kʼu yepal skʼoplal chichʼe. Toj lek ti kʼu yelan takʼav li Jesuse, yuʼun mi junuk buchʼu la spoj. Xi la sjakʼe: «Chiʼiltik, ¿buchʼu la svaʼanun ta jchapanvanej avuʼunik o ti voʼon ta jchʼak li kʼusitik oy avuʼunike?» (Lukas 12:14).

Vaʼun xi laj yalbe tsatsal mantal skotol li krixchanoetike: «Vikʼiluk me lek asatik xchiʼuk kʼelo me abaik ta sventa skotol li xpichʼetel oʼontonale, yuʼun kʼalal ep kʼusitik oy yuʼun li jun krixchanoe, maʼuk tsta-o xkuxlejal li kʼusitik oy yuʼune» (Lukas 12:15). Mu ventauk kʼu to yepal skʼulejal li jun krixchanoe, ¿mi mu jechuk ti ta onoʼox xcham xchiʼuk ti te chkom skotol li skʼulejale? Vaʼun lik yal jun lokʼolkʼop ti mu xchʼay xkaʼitik ta sventa taje, ti chakʼ ta ilel ti jaʼ toj tsots skʼoplal ti lekuk oyutik ta stojolal Diose, xi laj yale:

«Oy jun jkʼulej vinik ti lek laj yakʼ li kʼusitik la stsʼun ta yosile. Jech oxal chaʼa, xi lik snop ta yoʼontone: ‹¿Kʼusi van ta jpas? Mu xa jnaʼ bu chkakʼ li kʼusitik lokʼ kuʼune›. Jech oxal xi laj yale: ‹Laj xa jnaʼ kʼusi ta jpas: ta jlomes li snail kʼusitik oy kuʼune, vaʼun ta jvaʼan mas mukʼtik, te ta jtsob skotol li kʼusitik la jtsʼune xchiʼuk skotol li kʼusitik oy kuʼune, xchiʼuk xi chkalbe jbae: «Vinik, oy ep kʼusitik kʼejel avuʼun sventa jayibuk jabil; junuk avoʼonton, veʼan noʼox, uchʼbolajan, kʼupino avaʼi li kʼusitik oy avuʼune»›. Pe xi albat yuʼun li Diose: ‹Bol vinik, chacham ta akʼobaltik tana. Vaʼun chaʼa, ¿buchʼu chichʼ komel li kʼusitik la atsobe?›. Jaʼ jech chkʼot ta stojolal li buchʼu tstsob skʼulejal stuke, pe ti maʼuk jkʼulej ta stojolal li Diose.» (Lukas 12:16-21.)

Xuʼ me stsʼujik ta stsobel skʼulejalik li yajchankʼoptak  Jesuse xchiʼuk li buchʼutik te chaʼiik mantale. Jech xtok, xuʼ me jaʼ xbat ta yoʼontonik xchabiel ti kʼu yelan kuxulike, ti jaʼ muʼyuk xa chtunik lek ta stojolal li Jeovae. Jaʼ yuʼun, la xchaʼal Jesus li lekil tojobtasel laj yal li ta Mantaletik ta Vits ti oy xa van ta jun jabil xchiʼuk oʼlole. Xi laj yale:

«Mu xa xavul avoʼontonik kʼuxi chakuxiik ta sventa ti kʼusi chalajesik o ti kʼusi chavuchʼike; o ta sventa li abekʼtalik ti kʼusi chalapike [...]. Nopbeik skʼoplal li jojetike: leʼe mu snaʼ x-ovolajik mi jaʼuk snaʼ stsob sveʼelik; jech xtok chʼabal snail sveʼelik. Akʼo mi jech, makʼlinbilik yuʼun Dios. ¿Mi mu jaʼuk mas tsots akʼoplalik li voʼoxuke, ti jaʼ mu sta li mutetike? [...]. Nopik kʼuxi chchʼi li nichimetike: muʼyuk bu tsots ch-abtejik xchiʼuk muʼyuk bu chnaujik; pe chkalboxuk avaʼiik ti mi jaʼuk sta jech yutsil skʼuʼ spokʼ la slap Salomon ta sjunul smukʼulal kʼuchaʼal li nichimetik taje [...]. Jech oxal chaʼa, mu xa xavul avoʼontonik ta saʼel li kʼusi chalajesik xchiʼuk li kʼusi chavuchʼike, mu xa xavul tajek avoʼontonik [...]. Li Atotike snaʼoj me ti chtun avuʼunik li kʼusitik taje. Jaʼ mas lek saʼilanik li Ajvalilal yuʼune, vaʼun ta me xakʼboxuk li kʼusitik taje.» (Lukas 12:22-31; Mateo 6:25-33.)

¿Buchʼutik tsaʼik li Ajvalilal yuʼun Diose? Laj yal Jesus ti «uni jtsop chij» noʼoxe, jaʼ xkaltik, uni juteb tukʼil krixchanoetik ti tsaʼik li Ajvalilal taje. Ta mas tsʼakale laj yichʼ alel ti jaʼik 144 mil yepalike. ¿Kʼusi van tstaik ta tsʼakal? Xi patbat yoʼontonik yuʼun li Jesuse: «Li Atotike snopoj xa chakʼboxuk li Ajvalilale». Jaʼ yuʼun, maʼuk batem ta yoʼontonik saʼel li kʼulejal liʼ ta balumil ti snaʼ xlaj ta j-elekʼe. Moʼoj, yuʼun jaʼ batem ta yoʼontonik ‹stsobel li kʼulejal ti mu snaʼ xlaj skʼoplal ta vinajele›, ti jaʼ te ti bu ch-ajvalilajik ta tsʼakal xchiʼuk Kristoe (Lukas 12:32-34).