Li Jesuse talem ta Jerusalen ta sventa ti tspasik kʼin li judaetike, jaʼ skʼinal ti laj yichʼ akʼel ta stojolal Dios li templo ta Jerusalene (Hanuká sbi xtok li kʼin taje). Taje jaʼ sventa tstaik ta naʼel ti laj yichʼ akʼel ta stojolal Dios li temploe. Yuʼun leʼ xa van mas ta 100 jabile, oy jun ajvalil ta Siria ti Antíoco Epífanes IV sbi ti la smeltsan skajleb matanal ta sba li smukʼta kajleb smoton Dios ta temploe. Pe ta mas tsʼakale, oy jayvoʼuk xnichʼnab jun pale ta Juda ti kuch yuʼunik spojel sutel li Jerusalene, vaʼun la xchaʼakʼik yan velta ta stojolal Jeova li temploe. Jech oxal te lik tal ti tspasik kʼin jujun jabil ta 25 yuʼun kisleve, ti jaʼ ta slajebtik noviembre xchiʼuk ta slikebaltik disiembree.

Taje jaʼo yorail siktik. Te xvaʼet chanav ta Kotkot na yuʼun Salomon ta templo li Jesuse. Te tal voliatuk yuʼun judaetik, xi ch-ilinik laj yalbeike: «¿Kʼu to van sjalil liʼ xinopnunkutik avuʼune? Mi voʼot li Kristoote, albunkutik ta jamal» (Juan 10:22-24). ¿Kʼu yelan laj yaʼi li Jesuse? Xi la stakʼe: «Kalojboxuk xa, pe mu xachʼunik». Melel onoʼox chaʼa, muʼyuk bu yalojbe ta jamal krixchanoetik ti jaʼ Kristo li stuke, muʼyuk bu jech yaloj kʼuchaʼal laj yalbe li jsamaria antse (Juan 4:25, 26). Akʼo mi jech, oy xa onoʼox yakʼoj ta aʼyel ti buchʼu ta melele, yuʼun xi yaloje: «Oyun xa onoʼox kʼalal muʼyuk toʼox li Abraane» (Juan 8:58).

Li kʼusi oy ta yoʼonton Jesuse jaʼ ti akʼo xakʼ venta stukik ti jaʼ li Kristoe. ¿Kʼuxi? Jaʼ kʼalal tskoʼoltasik lek li kʼusi chal albil kʼopetik ta sventa Kristo xchiʼuk li kʼusi tspas Jesus chilike. Jaʼ yuʼun oy jun velta laj yalbe yajchankʼoptak ti mu me buchʼu xalbeik ti jaʼ li Mesiase. Pe li avie xi jpʼel skʼoplal laj yalbe li yajkontratake: «Li abtelaletik yakal ta jpas ta sbi Jtote, jaʼ chalbun jkʼoplal. Pe mu xachʼunik li voʼoxuke» (Juan 10:25, 26).

¿Kʼu yuʼun mu xchʼun judaetik ti jaʼ Kristo li Jesuse? Xi laj yal Jesus ti kʼu yuʼun mu xchʼunike: «Mu xachʼunik li voʼoxuke, yuʼun maʼuk jchijoxuk. Li jchijtake chaʼiik li jkʼopojele xchiʼuk xkojtikinan, vaʼun tstsʼakliikun. Voʼon chkakʼbeik kuxlejal sbatel osil, muʼyuk bu chichʼik-o lajesel xchiʼuk muʼyuk buchʼu tspojbun ta jkʼob. Li kʼusi yakʼojbun Jtote jaʼ li kʼusi mas mukʼ ta skotol li kʼusitike». Vaʼun xi laj yalbe skʼoplal Jesus ti kʼu yelan lek xil sba xchiʼuk li Stote: «Li voʼon xchiʼuk li Totile jununkutik» (Juan 10:26-30). Pe taje maʼuk skʼan xal ti batsʼi jun tajek oyike, moʼoj, yuʼun li Jesuse jaʼo liʼ oy ta Balumile, yan li Stote te oy ta vinajel. Yuʼun ti kʼusi laj yakʼ ta aʼyel li Jesuse jaʼ ti jmoj o ti koʼol li kʼusi tskʼan tspasike.

Ilinik-o tajek judaetik li kʼusi laj yal Jesuse, jaʼ yuʼun tsmil ox yaʼiik ta ton yan velta. Pe muʼyuk bu xiʼo, yuʼun xi laj yale: «Ep lekil abtelaletik laj kakʼboxuk ta ilel ti likem tal ta stojolal li Totile. ¿Bu junukal abtelal ti chavakʼbeikun-o tone?». Xi la stakʼike: «Maʼuk ta skoj li lekil abtelal ti chkakʼbotkutik tone, moʼoj, jaʼ ta skoj ti chachopol kʼoptavane [...]. [Ti] chapʼis aba ta jun [diose]» (Juan 10:31-33). Ta melel, muʼyuk bu xal-o Jesus ti jaʼ jun diose. Vaʼun chaʼa, ¿kʼu yuʼun ti tsabeik smule?

Veno, laj yal Jesus ti oy sjuʼele, pe xchʼunoj judaetik ti jaʼ noʼox oy sjuʼel li Diose. Jech kʼuchaʼal ti xi laj yalbe skʼoplal li ‹chije›: «Voʼon chkakʼbeik kuxlejal sbatel osil», taje mi junuk krixchano spas yuʼun jech (Juan 10:28). Pe muʼyuk bu la stsak ta mukʼ judaetik ti jamal chal Jesus ti akʼbil yabtel yuʼun Stote.

Xi la sjakʼ Jesus sventa chakʼ ta ilel ti mu meleluk li kʼusi chalik ta stojolale: «¿Mi mu xiuk tsʼibabil [ta Salmo 82:6] li ta Mantal avuʼunike: ‹Xi laj kale: «Jaʼ diosoxuk li voʼoxuke»›? Mi ‹diosoxuk› xi laj yalbe skʼoplal Dios li buchʼutik muʼyuk lek ch-albat skʼoplalik yuʼun li skʼop Diose [...], ¿chavalbeikun: ‹Chachopol kʼoptavan›, ta skoj ti xi laj kale: ‹Xnichʼonun Dios›, voʼon ti la xchʼultajesun li Totile xchiʼuk ti la stakun tal ta stojolal krixchanoetike?» (Juan 10:34-36).

 Jaʼ jech, «diosoxuk» xi ch-albatik yuʼun Vivlia li jchapanvanejetik ti muʼyuk stukʼilike. Jech oxal chaʼa, ¿kʼu yuʼun tsots smul chilbeik Jesus kʼalal «Xnichʼonun Dios» xie? Vaʼun oy kʼusi laj yal ti jaʼ skʼan xchʼunik-o judaetik ti jechuke, yuʼun xi laj yale: «Mi maʼuk yabtel Jtot yakal ta jpase, mu xachʼunik li kʼusi chkale. Pe mi jaʼ yakal ta jpas taje, akʼo mi mu xachʼunik li kʼusi chkale, chʼunik ta skoj li abtelal ta jpase, sventa xanaʼik xchiʼuk xavojtikinik-o batel ti liʼ oy ta jtojolal li Totile xchiʼuk ti oyun ta stojolal ek li Totile» (Juan 10:37, 38).

Tstsak ox yaʼiik Jesus ta skoj taje, pe jatav yuʼunik xtok. Vaʼun lokʼ batel ta Jerusalen, echʼ xtuchʼ li Ukʼum Jordane, taje jaʼ te ti bu lik yakʼ ichʼvoʼ li Juan ti jutuk xa skʼan xlokʼ chanib Jabile. Yaʼeluke muʼyuk bu nom yiloj li sural Nab Galileae.

Vaʼun te tal ta stojolal Jesus epal krixchanoetik, xi laj yalike: «Mi junuk senyail la spas li Juane, pe skotol li kʼusitik laj yal Juan ta sventa li vinik liʼe, jaʼ melel» (Juan 10:41). Jaʼ jech, ep judaetik laj yakʼ xchʼunel yoʼontonik ta stojolal.