Te oy-o ta Jerusalen ta skʼakʼalil Savado li Jesuse. Ta skoj ti te chanavik ta jteklum xchiʼuk li yajchankʼoptake, te la staik ta ilel jun jkʼanlimoxna ti maʼsat onoʼox vokʼeme. Xi jakʼbat yuʼun yajchankʼoptak li Jesuse: «Rabi, ¿buchʼu la saʼ smul ti jech maʼsat vokʼ li vinik liʼe, mi jaʼ ta smul stuk o mi jaʼ ta smul li stot smeʼe?» (Juan 9:2).

Yikʼaluk van tskʼan tsnaʼik yajchankʼoptak mi yuʼun jpasmulilutik xa kʼalal te to tikʼilutik ta xchʼut jmeʼtike. Xi la stakʼ li Jesuse: «Muʼyuk bu la saʼ smul li vinik liʼe mi jaʼuk li stot smeʼe, yuʼun jaʼ sventa xvinaj ta stojolal li yabteltak Dios ti jech snuptanoje» (Juan 9:3). Jech ta melel, maʼuk ta smul li vinike mi jaʼuk ta smul li stot smeʼe, jech xtok maʼuk ta skoj ti yuʼun oy van kʼusi chopol spasoj ta skoj ti jech maʼsate. Moʼoj, jaʼ ta skoj ti la spas smul Adane, jech oxal oy xa onoʼox jmul jkotoltik kʼalal chijvokʼe xchiʼuk oy bu mu lekuk chijtal ta balumil, jech kʼuchaʼal li maʼsatetike. Pe ti jech makem sat li vinike jaʼ xuʼ te xakʼ ta ilel Jesus ti kʼu yelan sjuʼel li Diose, jech kʼuchaʼal oy xa onoʼox buchʼutik xpoxtaoj ti ip chaʼiike.

Jaʼ laj yakʼ ta aʼyel Jesus ti anil xa noʼox skʼan xichʼ pasel li abtelaletik liʼe. Xi laj yale: «Skʼan me jpasbetik yabtel li Buchʼu la stakun tal yoʼ to kʼakʼaltike; yuʼun mi och akʼobale muʼyuk xa me buchʼu xuʼ x-abtej. Voʼon lus kʼotemun ta stojolal krixchanoetik kʼalal liʼ to oyun ta stojolal krixchanoetike» (Juan 9:4, 5). Ta skoj ti poʼot xa xchame ch-och ta ikʼal osil li Jesus te ta mukinale, vaʼun muʼyuk xa me kʼusi xuʼ yuʼun spasel. Pe yoʼ to kuxule jaʼ me chakʼbe yil sakil osil li krixchanoetike.

Pe mi chpoxta vinik li Jesuse, ¿kʼuxi van chpoxta? La stubta lum, vaʼun lik spas achʼel ta stub, te une la xjaxbe ta sat li vinike xchiʼuk xi laj yalbee: «Bat poko ta stankeal voʼ ta Siloam» (Juan 9:7). La xchʼun li vinike, vaʼun jam sat kʼalal la spoke. Nopo xa noʼox avaʼi kʼu to van yelan xmuyubaj ta skoj ti jaʼ to laj yil osil ta xkuxlejale.

Labal to sba laj yil li slakʼnatak xchiʼuk li buchʼutik chilik onoʼoxe. Xi la sjakʼike: «¿Mi mu jaʼuk li vinik ti te toʼox xchotet ta kʼan limoxna leʼe?». Xi la stakʼ junantike: «Jaʼ». Pe oy junantik ti mu xchʼunike, jaʼ yuʼun xi laj yalike: «Maʼuk, jaʼ noʼox ti xkoʼolajike». Pe xi la stakʼ stuk li vinike: «Voʼon chkile» (Juan 9:8, 9).

Jech oxal xi la sjakʼbeike: «Vaʼun chaʼa, ¿kʼuxi jam li asate?». Xi la stakʼ li vinike: «Li vinik ti jaʼ sbi Jesuse la svotsʼ achʼel, vaʼun la xjaxbun ta jsat xchiʼuk xi laj yalbune: ‹Batan ta Siloam, te xbat apok li asate›. Jech oxal libat, bat jpok li jsate; vaʼun jam li jsate». Laje xi la sjakʼike: «¿Bu oy li vinik taje?». Xi la stakʼ li jkʼanlimoxnae: «Mu jnaʼ» (Juan 9:10-12).

Vaʼun li krixchanoetik taje laj yikʼik batel ta  stojolal jfariseoetik li vinike, ti tskʼan tsnaʼik ek kʼuxi jam li sate. Xi albatik yuʼun li jkʼanlimoxnae: «La xjaxbe achʼel li jsate, vaʼun la jpok, jaʼ jech jam li jsate». Ta melel, xmuyubajik jfariseoetik jechuk ta stojolal li vinik ti poxtaje. Pe muʼyuk bu xmuyubajik, yuʼun oy buchʼutik ti la sloʼiltaik li Jesuse, xi laj yalike: «Maʼuk likem tal ta stojolal Dios maʼ li vinik taje, yuʼun muʼyuk bu chchabi li Savadoe». Xi laj yal li yantik xtoke: «Mi jaʼ jun jsaʼmulil vinike, ¿kʼuxi xa noʼox ti tspas senyailtak kʼuchaʼal taje?» (Juan 9:15, 16). Jamal xvinaj ti mu parejouk li kʼusi tsnopike.

Ta skoj ti mu parejouk li kʼusi tsnopike, la skʼoponik li vinik ti xil xa osile xchiʼuk xi la sjakʼbeike: «¿Kʼusi xuʼ xaval ta stojolal ta skoj ti la sjambot asate?». Snaʼoj lek buchʼu jaʼ li Jesuse, jaʼ yuʼun xi la stakʼe: «Jaʼ jun j-alkʼop» (Juan 9:17).

Mu xchʼun tajek li judaetike. Yuʼun van tsnopik ti xchapoj lek skʼopik li vinik xchiʼuk Jesus sventa tsloʼlaik li krixchanoetike. Jaʼ yuʼun la snop tstakbeik ta ikʼel stot smeʼ li vinik sventa snaʼik lek kʼu yelan xchiʼuk sventa snaʼik mi yuʼun onoʼox maʼsat ta melel.