Kʼalal te to oy ta Judea li Jesuse, bat ta veʼel ta sna jun jfariseo ta kʼakʼaltik yaʼel (Lukas 11:37, 38; koʼoltaso xchiʼuk Lukas 14:12). Kʼalal mu to chlik veʼikuk li jfariseoetike oy kʼusi nopem xaʼi tspasik, jaʼ ti kʼalal to xukʼub tspok skʼobike. Pe mu jechuk la spok skʼob li Jesuse (Mateo 15:1, 2). Muʼyuk bu chopol chil Smantal Dios ti bu to kʼalal tspok skʼobike, pe muʼyuk bu chal xtok ti akʼo jech xichʼ pasele.

Toj labal sba laj yil jfariseo ti muʼyuk bu la spok skʼob Jesus ti kʼu yelan nopem xaʼi tspasike. Laj yakʼ venta li Jesuse, jaʼ yuʼun xi laj yale: «Kʼelo avil, li voʼoxuk ti jfariseooxuke, chapokbeik lek li spat xokon kopa xchiʼuk platoe, pe li yut avoʼontonike nojem ta xpichʼetel oʼontonal xchiʼuk ta kʼusitik toj chopol. ¡Bol krixchanoetik! Li Buchʼu la spasbe spat xokone jaʼ la spasbe xtok li yute, ¿mi mu jechuk?» (Lukas 11:39, 40).

Pe ti kʼusi toj tsots skʼoplale maʼuk ti kʼu yelan tspok skʼob jfariseoetik kʼalal mu to chveʼike, moʼoj, jaʼ ti chloʼlavanik ti kʼu yelan chichʼik ta mukʼ Diose. Kʼalal jaʼ jech nopem xaʼi tspok skʼobik li jfariseoetik xchiʼuk li yan krixchanoetike jaʼ jech muʼyuk bu sak li yoʼontonik ta skoj choplejale. Jech oxal xi tojobtasatik yuʼun li Jesuse: «Lokʼuk ta avoʼontonik xapasbeik kʼusitik lek li buchʼutik abol sbaike, ¡kʼelo avilik! sakoxuk me ajunulik mi jech chapasike» (Lukas 11:41). ¡Jech yaʼuk! Yuʼun kʼalal chakʼik matanale jaʼuk ta skoj ti yuʼun skʼanojik li krixchanoetike, maʼuk ta skoj ti tskʼan labal xa sba x-ilatik ta skoj ti tukʼik xa tajek yileluke.

Pe taje maʼuk skʼan xal ti muʼyuk bu chakʼik matanale. Xi laj yal li Jesuse: «Yuʼun chavakʼik li diesmo ta sventa alavena, lula xchiʼuk skotol li itajetike, pe jaʼ muʼyuk yakaloxuk spasel li tukʼilal xchiʼuk li kʼanelal ta stojolal Diose! Persa onoʼox skʼan pasel maʼ taje, pe maʼuk skʼan xal ti jaʼ muʼyuk xa bu chapasik li yan kʼusitike» (Lukas 11:42). Chal Smantal Dios ti skʼan xakʼik li diesmoe, jaʼ xkaltik, jun ta lajlajuneb ti kʼu yepal chlokʼ yuʼunik li kʼusitik tstsʼunike (Deuteronomio 14:22). Te smakojbe skʼoplal li alavena (o tulnichim) xchiʼuk lulae, ti chtun sventa smuineb veʼlile. Toj lek snaʼ xakʼ sdiesmoik li jfariseoetik ta sventa li tsʼiʼleletik taje, pe ¿mi ta van spasik li kʼusi mas tsots skʼoplal chal Mantal, jech kʼuchaʼal ti skʼan spasik li kʼusitik tukʼe xchiʼuk ti skʼan bikʼit xakʼ sbaik ta stojolal Diose? (Miqueas 6:8.)

Xi to laj yal batel li Jesuse: «¡Toj abol abaik, jfariseoetik, yuʼun jaʼ akʼanojik tajek li sbacholal chotlebal ta nail tsobobbailetike xchiʼuk lek xa chavaʼiik ti chakʼoponatik ta chʼivite! ¡Toj abol abaik, yuʼun xakoʼolajik kʼuchaʼal mukinal ti mu xvinaj leke xchiʼuk ti te chanavik ta sba li krixchanoetike, pe mu snaʼik!» (Lukas 11:43, 44). Ta melel, tsmak-o yok krixchanoetik li mukinaletik taje, vaʼun jaʼ jech oy yikʼobal chkomik jech kʼuchaʼal chal li Mantale. Jaʼ jech laj yal Jesus ta skoj ti mu jamaluk xvinaj ti ibal sba yoʼontonik li jfariseoetike (Mateo 23:27).

Ta skoj ti chopol chaʼi kʼusi chal Jesus jun vinik ti chanem lek ta Mantale, xi laj yale: «Jchanubtasvanej, chopol chkaʼikutik ek li kʼusi laj avale». Melel onoʼox ti skʼan xaʼibeik smelolal ek ti muʼyuk bu tskoltaik lek krixchanoetik li viniketik taje. Jaʼ yuʼun xi albatik yuʼun li Jesuse: «¡Toj abol abaik ek li voʼoxuk ti lek chanemoxuk ta Mantale, yuʼun alal ikatsil chavakʼbeik xkuch li krixchanoetike, pe li voʼoxuke mi jaʼuk jsetʼ xakʼan xapik ta junuk sniʼ akʼobik li ikatsile! ¡Toj abol abaik, yuʼun chavaʼanbeik smukinal li j-alkʼopetike, pe jaʼ la smilik j-alkʼopetik li amoltotakik ta voʼnee!» (Lukas 11:45-47).

Li alal ikatsil chalbe skʼoplal Jesuse jaʼ li kʼusitik nopem xaʼiik spasel ti jaʼ chal stukike xchiʼuk ti kʼu yelan chalbeik smelolal Mantal li jfariseoetike. Vaʼun jaʼ jech chakʼbeik tsots svokol li krixchanoetike. Yuʼun chalik ti akʼo la xichʼ pasel  ta persa skotole, vaʼun jaʼ jech chakʼbeik yikats li krixchanoetik ti toj ol ta kuchel chaʼiike. Li smoltotakike jaʼ la smilik li j-alkʼopetike, ti te lik tal ta stojolal Abele. Pe sventa chakʼik ta ilel ti chichʼik ta mukʼ yilel li j-alkʼopetike tsvaʼanbeik lek smukinalik, vaʼun jaʼ jech chchanbeik stalelal xchiʼuk li kʼusitik la spas stot smeʼik ta voʼnee. Maʼuk noʼox, yuʼun tskʼan tsmilbeik xtok li Bankilal Yaj-alkʼop Diose. Jaʼ yuʼun laj onoʼox yal Jesus ti toj tsots chichʼ chapanel yuʼun Dios li jkʼol kuxlejal liʼe. Taje kʼot ta pasel ta sjabilal 70 ta jkʼakʼaliltik, jaʼo kʼalal echʼ xaʼox 38 jabile.

Xi to laj yal li Jesuse: «¡Toj abol abaik li voʼoxuk ti lek chanemoxuk ta Mantale, yuʼun la apojbeik li syaveal yojtikinobile. Muʼyuk la-ochik li voʼoxuke xchiʼuk la amakik ta be xtok li buchʼutik yakal xaʼox ch-ochike!» (Lukas 11:52). Skʼan xalbeik smelolal Smantal Dios jechuk li viniketik taje. Pe mu jechuk tspasik, kʼajomal noʼox tsmakik ta be li krixchanoetik sventa mu xojtikinbeik Smantal li Diose xchiʼuk ti mu xaʼibeik smelolale.

¿Kʼu yelan laj yaʼi jfariseoetik xchiʼuk jchanubtasvanejetik ta Mantal li kʼusi albatike? Chopol laj yaʼiik, yuʼun kʼalal lokʼ batel li Jesuse solel lik kapuk sjolik ta stojolal xchiʼuk ep kʼusitik lik sjakʼbeik. Pe mu yuʼunuk oy ta yoʼonton tskʼan chchanik mas, moʼoj, jaʼ sventa ti oyuk kʼusi xal Jesus yoʼ xuʼuk stikʼik ta chukele.