Te to oy ta Samaria o ta Galilea li Jesuse. Vaʼun oy kʼusitik lik sjakʼbeik Jesus ta sventa Ajvalilal li jfariseoetike, yuʼun tsnopik ti toj labal xa noʼox sba kʼu yelan chvul ta lokʼele. Pe xi albatik yuʼun li Jesuse: «Mu yuʼunuk lek xa tajek xvinaj chtal li Ajvalilal yuʼun Diose, mi jaʼuk xi chalike: ‹¡Kʼelo avilik liʼe!› o ‹¡Leʼe!›. Yuʼun ¡kʼelo avilik!, liʼ oy ta oʼlol avuʼunik li Ajvalilal yuʼun Diose» (Lukas 17:20, 21).

Yikʼaluk van oy buchʼutik la snopik ti jaʼ yakal chakʼ ta aʼiel Jesus ti ta yoʼonton yajtuneltak Dios chventainvan li Ajvalilale. Pe mu jechuk maʼ taje, yuʼun muʼyuk te oy ta yoʼontonik Ajvalilal yuʼun Dios li jfariseoetik ti yakal chchiʼin ta loʼil Jesuse. Akʼo mi jech, te oy ta oʼlol yuʼunik, yuʼun te xchiʼukik li buchʼu tʼujbil ch-och ta Ajvalil li ta Ajvalilal yuʼun Diose, ti jaʼ li Jesuse (Mateo 21:5).

Vaʼun kʼalal batik xaʼox van li jfariseoetike lik yalbe yajchankʼoptak Jesus kʼusitik smakoj mi vul li Ajvalilal yuʼun Diose. Baʼyel xi laj yalbe skʼoplal kʼalal mi ochem xaʼox ta Ajvalile: «Chkʼot skʼakʼalil ti oy ta avoʼontonik chakʼan chakʼelbeik junuk skʼakʼalil li Xnichʼon krixchanoe, pe muʼyuk bu chavilik» (Lukas 17:22). Li kʼusi laj yakʼ ta aʼiel Jesuse jaʼ ti ta jelavel to ch-och ta Ajvalil li Xnichʼon krixchanoe. Jaʼ yuʼun kʼalal mu to chkʼot ta pasele yikʼaluk van oy jlomuk yajchankʼoptak ti chlik saʼik tajeke, pe skʼan smalaik ti kʼusi ora yaloj Dios ti chlik ta Ajvalil li Xnichʼon krixchanoe.

Xi to laj yal li Jesuse: «Xi cha-albatike: ‹¡Kʼelo avilik leʼe!› o ‹¡Kʼelo avilik liʼe!›. Mu me xabatik, mi jaʼuk xatsʼakliik batel ta anil. Yuʼun jech kʼuchaʼal saksevul ti xlebluj lokʼel ta vinajel ti chbat kʼalal to ta jot vinajel li xojobale, jaʼ jech ek li Xnichʼon krixchano kʼalal mi kʼot skʼakʼalile» (Lukas 17:23, 24). ¿Kʼusi van skʼan spasik li yajchankʼoptak Jesus sventa mu jaʼuk stsʼakliik batel li jecheʼ mesiasetike? Laj yal Jesus ti xkoʼolaj kʼuchaʼal saksevul ti xlebluj lokʼel ta vinajel kʼalal mi vul li melel Mesiase, jaʼ xkaltik, ti ta buyuk noʼox chichʼ ilele. Jech oxal, mi ta melel te jsatike jamal me xvinaj ti yakal xa ch-ajvalilaj ta Ajvalilal yuʼun Dios li Jesuse.

Vaʼun lik yalbe skʼoplal li kʼusitik kʼotem ta pasel ta voʼne ti jaʼ jechtik stalelal ek li krixchanoetik avie: «Jech kʼuchaʼal kʼot ta pasel ta skʼakʼalil Noee, jaʼ jech chkʼot ta pasel li ta skʼakʼalil Xnichʼon krixchanoe [...]. Jech xtok, jech kʼuchaʼal kʼot ta pasel ta skʼakʼalil Lote: ta xveʼik, ta x-uchʼbolajik noʼox li krixchanoetike, ta xmanolajik, ta xchonolajik, ta stsʼunolajik xchiʼuk ta svaʼan snaik. Pe kʼalal jaʼo lokʼ ta Sodoma li Lote, yal tal kʼokʼ xchiʼuk asufre ta vinajel, vaʼun laj skotolik. Jaʼ jech chkʼot ta pasel ek li vaʼ kʼakʼal kʼalal chakʼ sba ta ilel ta stojolal krixchanoetik li Xnichʼon krixchanoe» (Lukas 17:26-30).

Li kʼusi laj yal Jesuse maʼuk skʼan xal ti jaʼ laj yichʼik-o lajesel krixchanoetik ta skʼakʼalil Noe li  kʼusi stalel ta jpas ta jkuxlejaltike, jech kʼuchaʼal ti chijveʼe, ti chij-uchʼbolaje, ti chijmanolaje, ti chijchonolaje, ti chijtsʼunolaje o ti ta jvaʼan jnatike. Yuʼun oy onoʼox jech la spasik ek li Noe, Lot xchiʼuk li yutsʼ yalalike. Ti kʼusi chopole jaʼ ti muʼyuk la spasbeik kʼusi tskʼan yoʼonton Dios xchiʼuk mi jaʼuk bu la stsakik ta venta xtok ti bu kʼakʼal kuxulike. Jaʼ yuʼun laj yalbe mantal yajchankʼoptak Jesus ti akʼo xchikintabeik li smantal Diose xchiʼuk ti akʼo spasbeik li kʼusi tskʼan yoʼontone. Vaʼun jaʼ jech laj yakʼbe xchan kʼusi skʼan spasik sventa mu xichʼik lajesel ta mas tsʼakal, jaʼ xkaltik, ti akʼo kuxul xkomik kʼalal tslajes kʼusitik chopol li Diose.

Jaʼ yuʼun mu me stakʼ xchʼay-o yoʼontonik «li kʼusitik yiktaoj [komel]» yajchankʼoptak Jesuse, jaʼ xkaltik, li kʼusitik oy ta sba balumile, yuʼun xi laj yal li stuke: «Li vaʼ kʼakʼale, li buchʼu te oy ta sjol snae akʼo mu xyal yichʼ li kʼusitik oy yuʼun ta yut snae, xchiʼuk xtok, li buchʼu te oy ta yosile mu me sut skʼel li kʼusitik yiktaoj komele. Vuleso me ta ajolik li yajnil Lote» (Lukas 17:31, 32). Yuʼun kʼuchaʼal jnaʼojtike, pas ta atsʼam li yajnil Lote.

Xi to laj yalbe skʼoplal Jesus kʼusitik chkʼot ta pasel kʼalal mi ochem xaʼox ta Ajvalil li Xnichʼon krixchanoe: «Chkalboxuk avaʼiik ti vaʼ akʼobale te puchʼul ta jun tem chaʼvoʼ krixchanoetik: li june ch-ikʼat batel, li yane te ch-iktaat komel» (Lukas 17:34). Kʼuchaʼal chkiltike, oy buchʼutik chkolik, pe li yantike chtenatik komel xchiʼuk chchamik.

Xi la sjakʼbeik Jesus li yajchankʼoptake: «¿Bu taje, Kajval?». Xi la stakʼ li Jesuse: «Jaʼ te chbat stsob sbaik li aguilaetik ti bu oy li bekʼtalile» (Lukas 17:37). Jaʼ jech ta melel, oy jlom yajchankʼoptak Jesus ti xkoʼolaj xkʼot satik kʼuchaʼal jkot aguilae, vaʼun chbat xchiʼinik li melel Kristoe, li Xnichʼon krixchanoe. Te une, li jchankʼopetik ti oy xchʼunel yoʼontonike ch-akʼbatik yuʼun Jesus li kʼusi melel ti jaʼ chakʼ kuxlejale.