Kʼalal lokʼ tal ta Perea li Jesuse te vul ta stsʼel Betania, jaʼ jun lum ti te van oxibuk kilometro xil slokʼeb Kʼakʼal ta Jerusalene. Chat tajek yoʼontonik li Maria xchiʼuk Marta ta skoj ti cham li smukik ti Lasaro sbie, jaʼ yuʼun ep buchʼutik talemik sventa chpatbat yoʼontonik.

Vaʼun oy buchʼu laj yalbe Marta ti nopol xa xtal li Jesuse, jaʼ yuʼun bat snup ta be ta anil. Te une laj yalbe Jesus li kʼusi van tsnop xchiʼuk smuk leʼ xa van tal ta xchanibal kʼakʼale, xi laj yalbee: «Kajval, ti liʼuk onoʼox oyote, muʼyuk xcham jechuk li jmuke». Pe taje maʼuk skʼan xal ti muʼyuk xa spatobil yoʼontone, yuʼun xi laj yale: «Jnaʼoj ti kʼusiuk noʼox ti chakʼanbe li Diose, chakʼbot li Diose» (Juan 11:21, 22). Spatoj yoʼonton Marta ti oy to kʼusi xuʼ spas Jesus ta stojolal li smuke.

Xi laj yal li Jesuse: «Chchaʼkuxi li amuke». Pe jaʼ van yaloj Marta ti jaʼ yakal chalbe skʼoplal Jesus kʼuchaʼal la spat yoʼonton Abraan xchiʼuk yantike: jaʼ ti chchaʼkuxiik ta balumil ta mas tsʼakal li animaetike. Jech oxal xi laj yal ti spatoj yoʼonton ti jech chkʼot ta pasel ta melele: «Jnaʼoj ti chchaʼkuxi ta slajebal kʼakʼale» (Juan 11:23, 24).

Pe ¿mi oy van kʼusi stakʼ spas Jesus avi sventa spatbe yoʼonton li Martae? Jkʼeltik avil kʼusi laj yalbe Marta sventa tsvulesbe ta sjol ti akʼbil sjuʼel yuʼun Jeova sventa stsal li lajelale, xi laj yalbee: «Li buchʼu chakʼ xchʼunel yoʼonton ta jtojolale, manchuk mi ta xcham, chkuxi; xchiʼuk li buchʼu kuxul xchiʼuk ti chakʼ xchʼunel yoʼonton ta jtojolale muʼyuk bu chcham-o sbatel osil» (Juan 11:25, 26).

Pe li kʼusi laj yal Jesuse maʼuk skʼan xal ti mu xa snaʼ xcham li yajchankʼoptake, moʼoj, yuʼun jamal laj yalbe yajtakboltak ti chcham li stuk eke (Mateo 16:21; 17:22, 23). Li kʼusi yakal chalbe smelolale jaʼ ti ta jtatik kuxlejal sbatel osil mi chkakʼ xchʼunel koʼontontik ta stojolale. Yuʼun ep krixchanoetik tstaik kuxlejal sbatel osil kʼalal mi laj yichʼik chaʼkuxesele. Pe li tukʼil yajtuneltak Dios ti kuxulik ta slajebal kʼakʼale xuʼ van muʼyuk onoʼox bu chchamik. Buyuk jtosukal, ta onoʼox sta xkuxlejalik sbatel osil li buchʼutik chakʼ xchʼunel yoʼontonik ta stojolal Jesuse.

Xi laj yal li Jesuse: «Voʼon li chaʼkuxeselune xchiʼuk voʼon li kuxlejalune». Pe ¿mi oy van kʼusi stakʼ spas ta stojolal Lasaro ti oy xa ta sjayibal kʼakʼal xchamele? Xi la sjakʼbe Marta li Jesuse: «¿Mi chachʼun taje?». Xi la stakʼe: «Ta jchʼun Kajval, jchʼunoj ti voʼot li Kristoote, li Xnichʼon Diose, li buchʼu chtal ta balumile». Spatoj lek yoʼonton Marta ti oy kʼusi stakʼ spas Jesus li vaʼ kʼakʼale, jaʼ yuʼun la stambe echʼel anil sventa oy kʼusi bat yalbe ta mukul li smuke, xi laj yalbee: «Liʼ oy li Jchanubtasvaneje, la stakot ta ikʼel» (Juan 11:25-28). Vaʼun bat li Mariae, kʼalal laj yil li krixchanoetike la snopik ti te bat ta smukinal li Lasaroe, jaʼ yuʼun te tijilik batel ta anil ek.

Pe jaʼ bat skʼel bu oy Jesus li Mariae. Kʼalal kʼot ti bu oye la skejan sba ta yok, vaʼun xi laj yalbe  jech kʼuchaʼal laj xa onoʼox yal li xvixe: «Kajval, ti liʼuk onoʼox oyote muʼyuk xcham jechuk li jmuke». Kʼalal laj yil Jesus ti yakal ch-okʼe xchiʼuk ti yakal ch-okʼik ek li epal krixchanoetike, toj kʼux laj yaʼi ta yoʼonton xchiʼuk mu xa noʼox x-echʼ yuʼun chaʼi, jech oxal och ta okʼel ek. Taje kʼot ta yoʼonton li krixchanoetik eke. Pe xi chalik junantike: «Li vinik liʼe jaʼ li buchʼu la sjambe sat li maʼsate, ¿mi mu xuʼuk van oy kʼusi la spas sventa mu xcham li vinik liʼe?» (Juan 11:32, 37).