Kʼalal laj xaʼox xchiʼin ta loʼil Marta xchiʼuk Maria te ta nopol Betania li Jesuse, batik ta smukinal Lasaro. Li mukinal taje jaʼ jun jombil chʼen ti makbil ta jpʼej ton stiʼe. Xi laj yal Jesus kʼalal kʼotike: «Lokʼesik li tone». Pe ta skoj ti mu snaʼ Marta ti kʼusi tspas li Jesuse, xi chat yoʼonton laj yale: «Kajval, oy xa yikʼ jnaʼ, yuʼun oy xa ta xchanibal kʼakʼal». Pe xi albat yuʼun li Jesuse: «¿Mi mu lajuk xa onoʼox kalbot ti chavilbe smukʼulal Dios mi oy xchʼunel avoʼontone?» (Juan 11:39, 40).

Vaʼun kʼalal la slokʼesik li tone, la stoy muyel sat ta vinajel li Jesuse xchiʼuk xi la spas orasione: «Tot, kolaval chkalbot ti laj avaʼi li jkʼope. Ta melel, jnaʼoj ti chavaʼibun jkʼop skotol veltae; pe ta skoj ti liʼ joyol epal krixchanoetike, jaʼ yuʼun likʼopoj sventa xchʼunik ti voʼot la atakun tale».  Kʼalal jaʼ jech la spas orasione jaʼ sventa xilik lek skotol krixchanoetik ti jaʼ ta sjuʼel Dios li kʼusi poʼot xa spase. Vaʼun xi tsots avane: «¡Lasaro, lokʼan tal!». Jaʼ to chilike, lokʼ tal li Lasaroe, tsʼotol ta pokʼ yok skʼob lokʼ tal xchiʼuk pixil ta jlik pokʼ li sate. Jech oxal xi laj yal li Jesuse: «Titunik, akʼo batuk» (Juan 11:41-44).

Ep judaetik laj yakʼ xchʼunel yoʼontonik ta stojolal Jesus kʼalal laj yilik li kʼusi toj labal xa noʼox sba la spase, taje jaʼik li buchʼutik talemik sventa tspatbeik yoʼonton li Maria xchiʼuk Martae. Pe mu jechuk la spas skotolik, yuʼun li yantike bat yalbeik jfariseoetik li kʼusi naka to kʼot ta pasele. Jaʼ yuʼun li jfariseoetik xchiʼuk li bankilal paleetike lik stsobik li Sanedrine, jaʼ li buchʼutik chchapanvanik li ta mukʼta nail chapanobbail yuʼun judaetike. Te ch-abtej jun vinik ti Kaifas sbie. Vaʼun oy buchʼutik xi la svul yoʼontonike: «¿Kʼusi ta jpastik ta skoj ti ep senyailtak yakal tspas li vinik taje? Mi te noʼox jkʼelojtike chakʼ xchʼunel yoʼonton skotolik ta stojolal, vaʼun chtal spoj kaviltik xchiʼuk jlumaltik li jromaetike» (Juan 11:47, 48). Muʼyuk bu xmuyubajik ta jyalel ta sventa li kʼusi yakal tspas Dios ti jaʼ tstunes li Jesuse, akʼo mi jaʼ kʼot albatikuk yuʼun li buchʼutik laj yil ta sat stukik ti «ep senyailtak yakal tspas» li Jesuse. Kʼajomal noʼox jaʼ batem ta yoʼonton li yabtelik xchiʼuk li kʼusi sbainojike.

Batsʼi toj chopol van chaʼiik ti chaʼkuxi Lasaro li jsaduseoetike, yuʼun muʼyuk xchʼunojik ti chchaʼkuxi li animaetike. Xi laj yal Kaifas ti jaʼ jun jsaduseoe: «Muʼyuk kʼusi xanaʼik jutebuk, xchiʼuk mu xavakʼik venta ti xuʼ xatabeik sbalil ti chcham jun vinik sventa li jteklume, ti jaʼ chopol mi chichʼ lajesel sjunlej li jteklume» (Juan 11:49, 50; Echos 5:17; 23:8).

Pe maʼuk «lokʼ ta yoʼonton stuk» Kaifas ti jech laj yale. Jaʼ jech akʼbat snaʼ yuʼun Dios ta skoj ti staoj jun chʼul abtelale. Li kʼusi laj yakʼ ta aʼiel Kaifase jaʼ ti skʼan xichʼ milel Jesus sventa mu xlokʼ ta yabtel li jnitvanejetik ta relijion yuʼun judaetik xchiʼuk ti jechuk-o chʼunbaj li kʼusi chalike. Pe li albil kʼop laj yal Kaifas ta sventa ti chcham Jesuse, jaʼ skʼoplal ti tspoj krixchanoetik li Jesuse, pe maʼuk noʼox li judaetike, yuʼun tspoj skotol li «xnichʼnab Dios ti buyuk noʼox oyike» (Juan 11:51, 52).

La xchʼun Sanedrin li kʼusi laj yal Kaifase, vaʼun lik xchap skʼopik kʼuxi tsmilik li Jesuse. Pe te oy li Nikodemo eke, ti muʼyuk bu skontrainoj li Jesuse, vaʼun ¿mi ta van xalbe ti tskʼan chmilat yuʼun li Sanedrine? Mu jnaʼtik ta melel. Pe ta anil noʼox lokʼ batel ta Jerusalen li Jesuse. Vaʼun jaʼ jech muʼyuk bu xmilat kʼalal muʼyuk to bu kʼotem yorail jech kʼuchaʼal albil onoʼoxe.