Te chchanubtasvan ta Judea xchiʼuk ta Jerusalen li Jesuse xchiʼuk te chpoxta jchameletik. Vaʼun la xtuchʼ li Ukʼum Jordan sventa te xchanubtasvan li ta lumetik ta yosilal Pereae. Pe ta anil noʼox tsut ta Jerusalen.

Xi jakʼbat yuʼun jun vinik kʼalal te to oy ta Pereae: «Kajval, ¿mi jutuk noʼox li buchʼu chkolike?». Ti vaʼ yelan la sjakʼ li vinike, jaʼ van ta skoj ti laj yaʼi tsvul-o sbaik jnitvanejetik ta relijion sventa mi ep o mi jayvoʼ noʼox li buchʼutik tsta skolelike. Pe maʼuk laj yalbe skʼoplal Jesus ti jayvoʼ tsta skolelike, jaʼ laj yalbe skʼoplal ti kʼusi skʼan jpastik sventa jta jkoleltike. Xi laj yale: «Tsots xavakʼbeik yipal sventa jaʼ te xa-ochik batel li ta bikʼit tiʼ nae». Ta melel, skʼan tsots xkakʼbetik yipal. ¿Kʼu yuʼun? Xi laj yal li Jesuse: «Yuʼun chkalboxuk avaʼiik ti ep buchʼutik tskʼan ch-ochike pe mu me xuʼ yuʼunik» (Lukas 13:23, 24).

Sventa chakʼ ta ilel Jesus ti skʼan tsots xkakʼbetik yipale, xi laj yale: «Yuʼun kʼalal likem xaʼox smak lek tiʼ na li yajval nae, te vaʼal chakomik ta pana, chakʼojik li tiʼ nae xchiʼuk xi chavalike: ‹Kajval, jamo li tiʼ nae› [...]. Pe xi chalboxuke: ‹Mu jnaʼ bu likemoxuk tal. ¡Lokʼanik batel, voʼoxuk ti chapasik li kʼusi muʼyuk tukʼe!›» (Lukas 13:25-27).

Li kʼusi laj yal Jesuse chakʼ ta ilel ti abol sba li buchʼu mu xkʼot ta yoraile, yuʼun makbil xaʼox lek ta yave chkʼot sta li tiʼ nae. Pe taje jaʼ van ta skoj ti jaʼo chkʼot ti kʼusi ora tskʼan yoʼontone. Skʼan ox sob xkʼot ti jechuke, akʼo mi oy kʼusi xmakat ta be. Pe jaʼ jech kʼot ta stojolal kʼuchaʼal li epal krixchanoetik ti la stabeik sbalil jechuk li chanubtasel chakʼ Jesus tee. Yuʼun muʼyuk bu xakʼ ta yoʼontonik ti jaʼuk baʼyel xakʼ ta xkuxlejalik li melel yichʼel ta mukʼ Jeovae. Jech xtok, jutuk mu skotoluk muʼyuk la xchʼamik li kʼusi tsta-o skolebalike: ti takbatik tal li Jesuse. Laj yal Jesus ti chichʼik jipel lokʼele, vaʼun te ch-okʼik xchiʼuk te chkʼux stanal yeik. Pe li krixchanoetik ta skotol lumetike «chtal chotiikuk ta veʼel ta Ajvalilal yuʼun Dios [ti chlikik tal] ta slokʼeb Kʼakʼal, ta smaleb Kʼakʼal, ta norte xchiʼuk ta sure» (Lukas 13:28, 29).

Xi laj yalbe smelolal li Jesuse: «Li buchʼutik ta slajeb oyike [jaʼ xkaltik, li buchʼutik maʼuk judaetike xchiʼuk li judaetik ti abol sbaike] jaʼ chkʼotik ta baʼyel, li buchʼutik ta baʼyel oyike [jaʼ xkaltik, li jnitvanejetik ta relijion ti xtoyet xaʼi sbaik ta skoj ti jaʼik snitilultak Abraane] jaʼ chkʼotik ta slajeb» (Lukas 13:30). Kʼalal ‹slajeb oyik›, xie, jaʼ skʼan xal ti jpʼel skʼoplal muʼyuk bu ch-ochik li ta Ajvalilal yuʼun Dios li krixchanoetik ti mu snaʼ stojik ta vokole.

Pe te tal jayvoʼuk jfariseoetik ti bu oy li Jesuse, xi tal spʼijubtasike: «Lokʼan batel liʼe, batan, yuʼun tskʼan tsmilot li Erodese». Jaʼ li Erodes Antipase. Yikʼaluk van jaʼ lik yal stuk Erodes ti skʼan xjatav lokʼel ta yosilalik li Jesuse. Yuʼun van chiʼ ta skoj ti jaʼ x-akʼbat smulin ti chcham yan yaj-alkʼop Diose,  jech kʼuchaʼal ti la smil li Juan J-akʼ-ichʼvoʼe. Pe xi laj yalbe jfariseoetik li Jesuse: «Batanik, xi xavalbeik li vet taje: ‹¡Kʼelo avil!, ta jlokʼes pukuj xchiʼuk chipoxtavan li avi xchiʼuk okʼome, chaʼej to chlaj koʼonton›» (Lukas 13:31, 32). Kʼalal «vet» laj yalbe skʼoplal Erodes li Jesuse yikʼaluk van jaʼ laj yakʼ ta aʼyel ti toj manya li Erodese. Akʼo mi jech, muʼyuk bu xlaj ta loʼlael li Jesuse xchiʼuk muʼyuk ti anil xa bate, yuʼun maʼuk chchʼunbe smantal li Erodese mi jaʼuk junuk krixchano. Tspas-o batel li yabtel akʼbil yuʼun Stote, jaʼ jech kʼuchaʼal xchapanoj li Diose, maʼuk ti kʼu yelan xchapanoj li krixchanoe.

Vaʼun tsut xa batel ta Jerusalen li Jesuse, yuʼun xi onoʼox yaloje: «Mu lekuk ti chichʼ milel junuk j-alkʼop ti maʼuk ta Jerusalene» (Lukas 13:33). Pe muʼyuk junuk albil kʼop ta Vivlia ti chal ti persa ta Jerusalen skʼan xichʼ milel li Mesiase, vaʼun chaʼa, ¿kʼu yuʼun laj yal Jesus ti jaʼ te skʼan xchame? Yuʼun jaʼ kapital li Jerusalene, jaʼ te oy li 71 jchapanvanejetik ta Sanedrine, ti bu chchapanatik li buchʼutik chpakʼtaatik ta jecheʼ j-alkʼopetike. Jech xtok, jaʼ te ti bu chakʼik ta chikʼbil matanal li chonbolometike. Jaʼ yuʼun laj yaʼibe smelolal Jesus ti mu lekuk ti yan-o bu chichʼ milele.

Xi laj yal Jesus ta skoj ti chopol chaʼie: «Jerusalen, Jerusalen, ti jaʼ li jmilvanej yuʼun j-alkʼopetike xchiʼuk ti chakʼbe ton li buchʼutik chichʼ takbel batel ta stojolale ¡ep ta velta la jkʼan la jtsob avalab jech kʼuchaʼal tstsob ta yolon xikʼ yalab li meʼ alakʼe! Pe muʼyuk bu xakʼanik li voʼoxuke. ¡Kʼelo avilik! Iktabil chkom li anaike» (Lukas 13:34, 35). Sjunul jteklum la spʼajbe li Xnichʼon Diose, jech oxal ¡skʼan xkuch yuʼun li vokoliletike!

Kʼalal mu to chkʼot ta Jerusalen li Jesuse, ikʼat ta veʼel yuʼun jun jnitvanej ta relijion yuʼun jfariseoetik ta skʼakʼalil Savado. Li buchʼutik takbil ta ikʼele te yakʼoj-o satik ta stojolal Jesus sventa tskʼelik kʼusi tspasbe jun vinik ti te oy eke, taje ip ta situbel. Li chamel taje toj ep tstsob sba yaʼlel, mas to li ta koʼtik xchiʼuk ta koktike. Vaʼun xi jakʼbatik yuʼun Jesus li jfariseoetik xchiʼuk li buchʼutik chanemik lek ta Mantale: «¿Mi stakʼ xijpoxtavan ta Savado o mi muʼyuk?» (Lukas 14:3).

Muʼyuk buchʼu xtakʼav. La xpoxta vinik li Jesuse, vaʼun xi la sjakʼbe li krixchanoetike: «¿Buchʼu van junukal avuʼunik ti muʼyuk chbat slokʼes ta anil mi balchʼuj ochel ta yut chʼen ta skʼakʼalil Savado li xnichʼone o li stot xvakaxe?» (Lukas 14:5). Jaʼ jech noxtok, muʼyuk buchʼu xtakʼav ta skoj ti lek ta rason li kʼusi laj yal Jesuse.