Te to xlokʼ ta Perea sventa chbat ta Jerusalen li Jesuse. Vaʼun te tal ta anil jun kerem vinik, te vul skejan sba ta stojolal. Jaʼ «jun ajvalil», yikʼaluk van jaʼ jun bankilal jpasmantal ta nail tsobobbail o jaʼ van jun vinik ti te ch-abtej ta Sanedrine. Xi la sjakʼbe Jesus li vinik taje: «Lekil Jchanubtasvane ¿kʼusi skʼan jpas sventa jta li kuxlejal sbatel osile?» (Lukas 8:41; 18:18; 24:20).

Xi la stakʼ li Jesuse: «¿Kʼu yuʼun chavalbun ti lekune? Muʼyuk onoʼox buchʼu lek, jaʼ noʼox jun, jaʼ li Diose» (Lukas 18:19). Kʼalal «lekil» xi laj yal li jkʼulej vinike xkoʼolaj kʼuchaʼal biil laj yal yaʼel, jech kʼuchaʼal tspasik li jchanubtasvanejetike. Akʼo mi jaʼ jun Lekil Jchanubtasvanej li Jesuse, jamal laj yal ti jaʼ noʼox sta-o albel «lek» li Diose.

Xi la stojobtas jkʼulej vinik xtok li Jesuse: «Pe mi chakʼan chata li kuxlejale skʼan me xachʼun-o li mantaletike». Xi la sjakʼ li vinike: «¿Kʼusitik jaʼ taje?». Vaʼun lik yalbe skʼoplal voʼob Mantal li Jesuse, ti mu stakʼ xijmilvane, ti mu stakʼ jloʼla jnup jchiʼiltike, ti mu stakʼ xij-elkʼaje, ti mu stakʼ jsabetik smul yantike xchiʼuk ti skʼan xkichʼ ta mukʼ jtot jmeʼtike. Jech xtok, xi laj yalbe skʼoplal yan mantal ti mas to tsots skʼoplale: «Skʼan me jech xakʼan achiʼil jech kʼuchaʼal akʼanoj aba atuke» (Mateo 19:17-19).

Xi la stakʼ li vinike: «Jpasoj skotol maʼ taje, ¿kʼusi to yan skʼan jpas?» (Mateo 19:20). Ti vaʼ yelan la sjakʼe yuʼun van oy to kʼusi lek skʼan spas yaloj ti toj labal xa noʼox sbae, sventa jaʼ sta-o li kuxlejal sbatel osile. Laj yakʼ venta Jesus ti oy tajek ta yoʼonton tspas yaʼi kʼusi lek li vinik taje, jech oxal kʼuxubaj ta yoʼonton (Markos 10:21). Pe oy kʼusi chmakun ta stsʼakliel Jesus li vinike.

Ta skoj ti mu iktabaj chaʼi li kʼusitik oy yuʼun li vinike, xi albat yuʼun li Jesuse: «Oy to jtos kʼusi skʼan xapas: batan, bat chono li kʼusitik oy avuʼune, li stojole bat akʼbo li buchʼutik abol sbaike; jaʼ jech chata akʼulejal ta vinajel, vaʼun laʼ tsʼakliun». Jaʼ jech,  xuʼ spukbe stakʼin li buchʼutik abol sbaike, ti mu sut yuʼunike, vaʼun jaʼ jech chkʼot ta yajchankʼop Jesus. Abol van sba laj yil vinik li Jesuse, yuʼun tots likel li vinike xchiʼuk chat yoʼonton bat. Ta skoj ti «toj ep kʼusitik oy yuʼun» li jkʼulej vinike jaʼ batem ta yoʼonton, jaʼ yuʼun mu xil lek kʼusi kʼulejalil ti oy sbalil ta melele (Markos 10:21, 22). Xi laj yal li Jesuse: «¡Toj vokol chaʼi ch-och batel ta Ajvalilal yuʼun Dios li buchʼutik oy stakʼinike!» (Lukas 18:24).

Toj labal sba laj yaʼi yajchankʼoptak li kʼusi naka to laj yal Jesuse xchiʼuk li kʼusi xi laj yale: «Ta melel, jaʼ mu vokoluk chjelav ta sat akuxa sventa tsʼisom jkot kameyo, jaʼ toj vokol ch-och ta Ajvalilal yuʼun Dios li buchʼu jkʼuleje». Vaʼun xi la sjakʼik li yajchankʼoptak Jesuse: «¿Buchʼu xa noʼox xuʼ xkol chaʼa?». ¿Mi toj echʼ xa noʼox tsots ta melel ti muʼyuk buchʼu xuʼ sta skolele? Kʼelbat satik yuʼun li Jesuse, vaʼun xi albatike: «Li kʼusitik mu xuʼ yuʼun spasel li krixchanoetike, xuʼ yuʼun spasel li Diose» (Lukas 18:25-27).

Li kʼusi xi laj yalbe skʼoplal Pedroe jaʼ chakʼ ta ilel ti mu jechuk tspasik kʼuchaʼal li jkʼulej vinike: «¡Kʼelo avil!, li voʼonkutike kiktaojkutik skotol sventa ta jtsʼakliotkutik, ¿kʼusi van ta jtakutik ta melel?». Vaʼun xi albatik yuʼun Jesus kʼusi tstaik ta skoj ti lek kʼusi kʼotem ta nopel yuʼunike: «Ta melel chkalboxuk avaʼiik ti kʼalal ch-achʼub li kʼusitike, jaʼo kʼalal chchoti li Xnichʼon krixchano ta xchotleb sventa ajvalilal ti jun yutsile, ta me xachotiik ta lajcheb chotlebal sventa ajvalilal ek li voʼoxuk ti chatsʼakliikune, chachapanik li lajchaʼvokʼ nitilulal ta Israele» (Mateo 19:27, 28).

Jnaʼojtik ta melel ti jaʼ yakal chalbe skʼoplal Jesus li kʼusi chkʼot ta pasel ta tsʼakale, kʼalal mi pas ta nichimaltik yan velta li balumil kʼuchaʼal ta nichimaltik Edene. Vaʼun jaʼ to me tsta smoton li Pedro xchiʼuk li yan yajchankʼoptak Jesus ti toj echʼ xa noʼox ep sbalile, ti xtoj-o lek svokolike, ¡ti tsventainik li Paraiso ta balumil xchiʼuk Jesuse!

Akʼo mi jech, yakal xa tsta smotonik avi li yajchankʼoptake, yuʼun xi laj yal li Jesuse: «Ta melel chkalboxuk avaʼiik ti skotol li buchʼu yiktaoj sna o yajnil o sbankil o yitsʼin o xvix o yixlel o stot smeʼ o xnichʼnab ta skoj li Ajvalilal yuʼun Diose mas to me toj ep tsta li avi kʼakʼale xchiʼuk ta me sta xkuxlejal sbatel osil li ta tsʼakale» (Lukas 18:29, 30).

Jaʼ jech kʼuchaʼal laj yal Jesuse, xuʼ me xchiʼin ta loʼil yermanotakik ta spʼejel balumil li yajchankʼoptak ti buyuk noʼox chbatike. Mas to me toj lek xil sba xchiʼuk li yermanotakike xchiʼuk mas to ep sbalil chilik, jaʼ mu sta li yutsʼ yalalike. Kʼux ta alel, pe muʼyuk van bu tsta jech bendision li jkʼulej vinike xchiʼuk muʼyuk bu tsta li kuxlejal kʼalal ch-ajvalilaj xaʼox li Ajvalilal yuʼun Diose.

Xi to laj yal li Jesuse: «Pe ep ti buchʼutik baʼyel oyike jaʼ chkʼotik ta slajeb, li buchʼutik ta slajeb oyike jaʼ chkʼotik ta baʼyel» (Mateo 19:30). ¿Kʼusi skʼan xal taje?

Ta skoj ti jaʼ jnitvanej ta relijion yuʼun judaetik li jkʼulej vinike, jaʼ jun «ti buchʼutik baʼyel oyike». Ta sventa ti chchʼunbe li smantaltak Diose ep kʼusitik skʼan spas ti jechuke. Pe jaʼ baʼyel yakʼoj ta xkuxlejal li skʼulejale xchiʼuk li kʼusitik oy yuʼune. Yan li krixchanoetike jamal laj yakʼik venta ti jaʼ melel li kʼusi chakʼ ta chanel Jesuse xchiʼuk ti jaʼ ch-akʼbat-o xkuxlejalik sbatel osile. Taje jaʼik xkaltik li buchʼutik ta «slajeb» oyike, pe ti jaʼ xa kʼotemik ta «baʼyel» li avie. Jaʼ oy spatobil yoʼontonik sventa chchotiik ta chotlebal ta vinajel xchiʼuk Jesus yoʼ sventainik tal li Paraiso ta balumile.