Kʼot van ta yoʼontonik jtsobpatanetik, jchanubtasvanejetik ta Mantal xchiʼuk jfariseoetik li lokʼolkʼop laj yal Jesus ta sventa li jtoyba kereme, yuʼun chakʼ ta ilel li kʼusi oy ta yoʼonton Diose: ti tspasbe perton smul li buchʼutik sutesoj yoʼontonike (Lukas 15:1-7, 11). Vaʼun laj yalbe yan lokʼolkʼop yajchankʼoptak li Jesuse. Jaʼ ta sventa jun jkʼulej vinik ti laj yakʼ venta ti muʼyuk lek tspas sba li jchabina yuʼune o li buchʼu sbainoj li kʼusitik oy yuʼune.

Li kʼusi la smul li jchabina chal Jesuse jaʼ ti mu lekuk tskʼelbe li kʼusitik oy yuʼun yajvale. Jaʼ yuʼun albat yuʼun yajval ti tsnutsat lokʼele. Jech oxal xi lik snop li jchabinae: «¿Kʼusi van ta jpas ta skoj ti tslokʼesun ta kabtel li kajvale? Yuʼun muʼyuk xa yipal kuʼun ta yabtelanel li balumile xchiʼuk chikʼexav ta skʼanel limoxna». Jaʼ yuʼun xi kʼot ta nopel yuʼune: «Laj xa jnaʼ kʼusi ta jpas sventa oyuk buchʼu xiyotes ta sna kʼalal mi lilokʼesat ta jchabinae». Vaʼun la stak ta ikʼel ta anil li buchʼutik oy yil ta stojolal yajvale, xi la sjakʼbe ta jujuntale: «¿Kʼu yepal avil yuʼun li kajvale?» (Lukas 16:3-5).

Xi la stakʼ li baʼyele: «100 ta pʼis aseite ti pasbil ta oliva ti lek mukʼtik spʼisole». Taje te van 2,200 litrouk aseite yepal. Yikʼaluk van ep tajek stsʼunoj oliva li buchʼu oy yile o yikʼaluk van jaʼ yabtel ta xchonel li aseitee. Xi albat yuʼun li jchabinae: «Chotlan, tsako li svunal kʼusi kʼotem ta nopel ta sventa li avile, xchiʼuk 50 [o 1,100 litro] xa noʼox ta pʼis xatsʼiba ta anil» (Lukas 16:6).

Xi la sjakʼbe li xchibale: «¿Kʼu yepal avil li voʼote?». Xi la stakʼe: «100 ta pʼis trigo ti lek mukʼtik spʼisole». Taje te van 22,000 litrouk yepal. Vaʼun xi albat yuʼun li jchabinae: «Tsako li svunal kʼusi kʼotem ta nopel ta sventa li avile xchiʼuk 80 xa noʼox ta pʼis xatsʼiba». Jaʼ jech tsulesbat 20% li yile (Lukas 16:7).

Ta skoj ti jaʼ to sbainojbe stakʼin yajval li jchabina taje xuʼ to stsulesbe yil li krixchanoetike. Kʼalal la stsulesbe yilike jaʼ jech la sta yamigotak sventa xkoltaat ta mas tsʼakal kʼalal mi chʼabal xaʼox yabtele.

Pe laj yaʼi yajval li kʼusi la spase. Akʼo mi chʼay-o stakʼin yajval li jchabina ta skoj ti vaʼ yelan la spase, toj labal sba laj yaʼi xchiʼuk la skʼupil kʼopta, yuʼun «manchuk mi muʼyuk tukʼ li jchabinae [...] pʼij ti kʼu yelan la spas sbae». Xi to laj yal li Jesuse: «Li yalab xnichʼnab li kʼusitik oy ta balumile jaʼ mas pʼijik ta sventa ti kʼu yelan tspas sbaik ta stojolal li xchiʼiltak ta jkʼol kuxlejale, jaʼ mu sta li yalab xnichʼnab sakil osile» (Lukas 16:8).

Muʼyuk bu yakal chal Jesus ti lek kʼusi la spas li jchabinae xchiʼuk muʼyuk bu yakal tstij koʼontontik ti akʼo jutik kʼop kʼalal oy kʼusi ta jmantik o ta jchontike. ¿Kʼusi chakʼ jchantik un chaʼa? Xi laj yalbe yajchankʼoptak li Jesuse: «Tunesik li kʼulejal ta balumil sventa xasaʼ avamigotakike, yuʼun kʼalal mi laj skʼoplal li kʼulejal taje jaʼ te chayikʼoxuk batel ta naklej ti bu jaʼ sventa sbatel osile» (Lukas 16:9). Ta melel, li kʼusi chakʼ jchantik li lokʼolkʼop taje jaʼ ti oyuk jpʼijiltik sventa jnoptik li kʼusi ta  jpastik ta tsʼakale. Jaʼ yuʼun, skʼan me oyuk spʼijil stunesik kʼusitik oy yuʼunik li yajtuneltak Diose, jaʼ xkaltik, «li yalab xnichʼnab sakil osile», ti teuk ta sjolik li kuxlejal sbatel osile.

Jaʼ noʼox me oy sderecho Dios xchiʼuk Xnichʼon ti xuʼ xalik buchʼu xuʼ x-och li ta Ajvalilal ta vinajel xchiʼuk li ta Paraiso ta balumil kʼalal mi ventainbil xaʼox yuʼun li Ajvalilal taje. Jaʼ yuʼun skʼan me xkakʼbetik yipal ti xkamigointik li Jeova xchiʼuk Jesus kʼalal ta jtunes li kʼusitik oy kuʼuntik sventa ta jpasbetik batel yabtel li Ajvalilale. Mi jech ta jpastike jpʼel me skʼoplal ta jta jkuxlejaltik sbatel osil kʼalal mi chʼabal xa sbalil o kʼalal mi chʼabal xaʼox ta j-echʼel li oroe, li platae xchiʼuk li yantik kʼulejale.

Laj yalbe skʼoplal Jesus xtok ti buchʼutik lek tukʼ yoʼonton tstunes li skʼulejalik o li kʼusitik oy yuʼunike, jaʼ me jech lek tukʼ yoʼonton tspasik batel li kʼusitik mas tsots skʼoplale. Jaʼ yuʼun xi laj yal li Jesuse: «Mi muʼyuk tukʼ avakʼoj abaik ta sventa li akʼulejalik ta balumile, ¿buchʼu xa noʼox spatoj yoʼonton chal ti xuʼ xabain li melel kʼulejale [jaʼ xkaltik, li kʼusitik sventa Ajvalilale]?» (Lukas 16:11).

Maʼuk noʼox, yuʼun yakal chchanubtas yajchankʼoptak Jesus ti skʼan xakʼbeik yipal ti bu to kʼalal xuʼ yuʼunik mi tskʼan ch-ikʼatik «ta naklej ti bu jaʼ sventa sbatel osile». Maʼuk me melel yajtunelutik Dios mi jaʼ batem ta koʼontontik li saʼel kʼulejal ta balumile. Xi la stsutses sloʼil li Jesuse: «Mu me xuʼ xtun ta moso ta chaʼvoʼ yajval mi junuk j-abtel ta na, yuʼun tskontrain li june, jaʼ tskʼan li yane; o mas nopol chakʼ sba ta stojolal li june, pe tspʼaj li yane. Jaʼ me jech ek, mu me xuʼ xatunik ta smoso Dios xchiʼuk ta smoso kʼulejal» (Lukas 16:9, 13).