Oy kʼusitik toj tsots skʼoplal laj yakʼ ta chanel Jesus kʼalal jaʼo te chveʼ ta sna jun jnitvanej ta relijion yuʼun jfariseoetike. Vaʼun kʼalal la stam echʼel sbe sventa chbat ta Jerusalene, te chiʼukbil batel yuʼun epal krixchanoetik. ¿Kʼu yuʼun? ¿Mi yuʼun van oy ta yoʼontonik ta melel ti chkʼot yaʼiik ta yajchankʼop ti mu ventauk ti kʼusitik skʼan spasike?

Kʼalal yakal chanavik batel ta bee, oy kʼusi xi laj yal Jesus ti toj labal sba laj yaʼi jlom krixchanoetike: «Mi oy buchʼu chtal ta jtojolal pe ti muʼyuk bu tspʼaj stot, smeʼ, yajnil, xnichʼnab, sbankil yitsʼinab, yixleltak o xvixobtak, jech, ti mi jaʼuk bu tspʼaj li xkuxlejal stuke, mu xuʼ xtun ta kajchankʼop» (Lukas 14:26). Pe ¿kʼusi smelolal li kʼusi laj yale?

Li kʼusi laj yal Jesuse maʼuk skʼan xal ti yuʼun skʼan spʼaj yutsʼ yalal skotol li buchʼutik chkʼot ta yajchankʼope. Moʼoj, yuʼun li kʼusi skʼan xale jaʼ ti skʼan akʼo skʼanik mas li Jesuse, ti jaʼ mu sta li yutsʼ yalalike. Ti skʼan mu jechuk stalelalik kʼuchaʼal li vinik laj yalbe skʼoplal Jesus ta lokʼolkʼop ta sventa li mukʼta veʼel ta bat kʼakʼale, ti muʼyuk la xchʼun li takel ta ikʼel ti toj tsots skʼoplal ta skoj ti jaʼ to nupune (Lukas 14:20). Oy jun smoltot judaetik ti Jakob sbie, chal Vivlia ti la ‹spʼaj li Leae›, taje jaʼ skʼan xal ti jutuk noʼox skʼanoje, ti jaʼ mas skʼanoj li mukil ti Raquel sbie (Génesis 29:31, Ch).

Kakʼtik lek venta avil ti laj yal Jesus ti skʼan ‹spʼaj xkuxlejal stuk› li buchʼu chkʼot ta yajchankʼope. Taje jaʼ skʼan xal ti masuk skʼanoj li Jesuse, ti jaʼuk mu sta ti kʼu yelan skʼanoj xkuxlejal stuke. Maʼuk noʼox, yuʼun skʼan ta sjunuluk yoʼonton xcham mi jech skʼane. Jamal xvinaj, tsots kʼusi ta jbaintik kʼalal chijkʼot ta yajchankʼop Jesuse. Jaʼ yuʼun mu me tajimoluk xkiltik, skʼan me jnoptik lek.

Kʼalal chijkʼot ta yajchankʼop Jesuse ta me xkil jvokoltik xchiʼuk ta me xkichʼtik kontrainel, yuʼun xi laj yal li Jesuse: «Li buchʼu muʼyuk chkuch li jtel teʼ sventa vokolil kʼalal chtal ta jtojolale, mu xuʼ xtun ta kajchankʼop» (Lukas 14:27). Jaʼ jech, li buchʼu chkʼot ta yajchankʼop Kristoe skʼan me ta sjunuluk yoʼonton xil svokol jech kʼuchaʼal laj yil Jesuse. Yuʼun maʼuk noʼox laj yil svokol, yuʼun laj yal ti chmilat yuʼun yajkontratak xtoke.

Jaʼ yuʼun skʼan snopik lek kʼusi smakoj ti chkʼotik ta yajchankʼop Kristo li krixchanoetik ti te xchiʼukik ta xanbal li Jesuse. Jech oxal xi laj yal jun lokʼolkʼop sventa chalbe lek smelolale: «Jech kʼuchaʼal liʼe, mi oy junuk avuʼunik ti tskʼan tsvaʼan junuk toyol kʼelob osile, ¿mi mu baʼyeluk chchotan sba sventa tskʼel kʼu yepal chlaj yuʼun sventa stsuts yuʼun li kʼusi tspase? Yuʼun mi moʼoje, xuʼ me xakʼbe snakleb, pe muʼyuk bu tstsuts yuʼun» (Lukas 14:28, 29). Jaʼ yuʼun chaʼa, kʼalal mu to chkʼotik ta yajchankʼoptak Jesus li krixchanoetik ti te xchiʼukik batel ta Jerusalene, skʼan me jpʼeluk ta yoʼontonik spasel kʼusi smakoj ti chijkʼot ta yajchankʼop Jesuse. Jech oxal xi to laj yalbe skʼoplal yan lokʼolkʼop sventa xalbe lek smelolale:

 «[¿]Buchʼu van ajvalilal, kʼalal chbat spas kʼop xchiʼuk yan ajvalil, ti mu baʼyeluk chchotan sba sventa tsnop lek mi stsal yuʼun ta 10 mil soltaroetik li yan ajvalil ti jaʼ oy 20 mil yajsoltarotake? Ta melel, mi mu xuʼ yuʼune, tstak batel jtsop jkʼopojel kʼalal nom to xtal li yan ajvalile, vaʼun tskʼan ti akʼo spas ta jun yoʼontonike.» Xi to laj yalbe mas smelolal li Jesuse: «Jaʼ noʼox jech ek, naʼik me lek ti mu me xuʼ xatunik ta kajchankʼop mi muʼyuk chaviktaik skotol li kʼusitik oy avuʼunike» (Lukas 14:31-33).

Ta melel, maʼuk noʼox chalbe li krixchanoetik ti te xchiʼuk tal ta be li Jesuse. Yuʼun jaʼ jech ta sjunul yoʼonton skʼan spasik skotol li buchʼutik chchanbeik skʼoplal Kristoe. Jaʼ yuʼun mi ochik ta yajchankʼope skʼan me oyuk ta yoʼonton stenik komel skotol li kʼusitik oy yuʼunike. Maʼuk noʼox, yuʼun skʼan sten ta yoʼonton li xkuxlejalik xtoke. Jech oxal skʼan snopik lek xchiʼuk skʼan spasik orasion ta sventa.

Laje oy kʼusi laj yalbe skʼoplal Jesus ti laj xa onoʼox yal li ta Mantaletik ta Vitse, jaʼ ti xi laj yalbe li yajchankʼoptake: «Voʼoxuk kʼotemoxuk ta yatsʼamil balumil» (Mateo 5:13). Li kʼusi skʼan xal yaʼel li kʼusi yakal chalbe smelolale jaʼ ti mu sok yuʼun jveʼeltik li atsʼame, taje jaʼ jech chchabiik krixchanoetik yaʼel li yajchankʼoptake, jaʼ xkaltik, ti chchabiik ta mantal xchiʼuk ti mu sok stalelalike. Vaʼun xi laj yal ta skoj ti poʼot xa stsuts li cholmantal tspase: «Toj lek ta melel maʼ li atsʼame. Pe mi oy junuk velta chlaj yip li atsʼame, ¿kʼuxi xa chchiʼub?» (Lukas 14:34). Snaʼoj krixchanoetik ti oy onoʼox atsʼam ti kapal ta lume, ti mu xa xtun leke.

Jech oxal laj yal Jesus ti skʼan skʼel sbaik li yajchankʼoptak ti akʼo mu xkʼunibik ta mantale, akʼo mi jaʼik li buchʼutik jal xa yochelik ta yajchankʼoptake. Yuʼun mu xa me kʼusi xtunik-o mi jech kʼot ta stojolalike, xkoʼolajik me kʼuchaʼal li atsʼam ti chlaj yipale. Vaʼun xuʼ me xlabanatik yuʼun li krixchanoetike. Jech xtok, yikʼaluk me muʼyuk stu ch-ilatik yuʼun li Diose xchiʼuk chakʼbeik ta kʼexlal li sbie. Jaʼ yuʼun laj yalbe lek smelolal Jesus ti akʼo mu jechuk xkʼot ta pasel ta jtojolaltike, xi laj yale: «Akʼo yaʼi li buchʼu oy xchikin sventa chaʼie» (Lukas 14:35).