Ti kʼu xa sjalil la xchol tal mantal li Jesuse, oy xa jayibuk velta laj yal ti skʼan bikʼituk xkakʼ jbatike (Lukas 14:8-11). Li kʼusi oy tajek ta yoʼontone jaʼ ti sta ta saʼel li krixchanoetik ti oy ta yoʼonton bikʼit chtunik ta stojolal Diose. Pe jlom ti buchʼutik staoj ta saʼel li avie, jamal xvinaj ti jpasmuliletik toe.

Laj yil jfariseoetik xchiʼuk jchanubtasvanejetik ta Mantal ti jaʼ chnopajik ta stojolal Jesus li krixchanoetik ti muʼyuk sbalil chilike, yuʼun lek chaʼiik li kʼusi chakʼ ta chanele. Jaʼ yuʼun xi ch-ilin laj yalike: «Lek chchʼam jpasmuliletik li vinik leʼe xchiʼuk chchiʼin ta veʼel» (Lukas 15:2). Ta skoj ti mukʼ skʼoplal xaʼi sbaik li jfariseoetik xchiʼuk li jchanubtasvanejetik ta Mantale xkoʼolaj kʼuchaʼal pukuk chilik ti chpechʼilanik ta tekʼel li krixchanoetik taje. Jech oxal, sventa chakʼ ta ilel ti xtiʼet sjol ta stojolalike tstunesik jpʼel evreo kʼop ti ‛am ha·ʼá·rets, xie, ti jaʼ skʼan xal «jnaclejetic ta jteclume».

Pe mu jechuk stalelal li Jesuse, yuʼun chichʼ ta mukʼ li krixchanoetike, chakʼbe yil slekil yoʼonton xchiʼuk chkʼuxubin. Ep ti buchʼutik bikʼit chakʼ sbaike, ti te tsakal skʼoplalik ek li buchʼutik ojtikinbilik kʼuchaʼal jpasmuliletike, oy tajek ta yoʼonton chchikintaik li kʼusi chakʼ ta chanel Jesuse. Pe ¿kʼu yelan laj yaʼi sba Jesus xchiʼuk kʼusi laj yal ta sventa ti chchopol kʼoptavanik ta skoj ti tskolta li buchʼutik abol noʼox sbaike?

Te jamal vinaj kʼalal laj yalbe skʼoplal jun lokʼolkʼop ti chkʼot ta oʼontonale, xkoʼolaj xchiʼuk jun lokʼolkʼop ti laj yal ta Kapernaume (Mateo 18:12-14). Ti kʼu yelan la xchapbe smelolal li Jesuse, xkoʼolaj kʼuchaʼal tukʼil krixchanoetik li jfariseoetike xchiʼuk ti jun yoʼonton te oyik ta skoral xchij li Diose. Yan li krixchanoetik ti abol noʼox sbaike yan-o be stamojik batel xchiʼuk ti chʼayemike. Xi laj yale:

«Mi oy jun vinik avuʼunik ti oy 100 ta kot xchije, pe ti chʼay jkote, ¿mi mu teuk van chikta ta takixokol balumil li 99 ta kot sventa chbat saʼ tal li jkot ti chʼayeme, ti jaʼ to chlaj yoʼonton mi la stae? Vaʼun tskajan ta snekeb mi la stae xchiʼuk xkuxet yoʼonton. Vaʼun kʼalal chkʼot ta snae tstak ta ikʼel yamigotak xchiʼuk slakʼnatak, xi chalbee: ‹Jmojuk kuxetuk koʼontontik, yuʼun laj xa jta li jchij ti chʼayem toʼoxe›.» (Lukas 15:4-6.)

¿Kʼusi skʼan xal li lokʼolkʼop laj yale? Xi laj yalbe smelolale: «Chkalboxuk avaʼiik ti jaʼ jech oy kuxetel oʼontonal ta vinajel kʼalal tsutes yoʼonton li jun jpasmulile, ti jaʼ mu sta jech ta skoj  li 99 ta voʼ tukʼil krixchanoetik ti mu persauk ta sutes yoʼontonike» (Lukas 15:7).

Ta melel, toj labal sba laj yaʼi jfariseoetik ti laj yalbe skʼoplal Jesus ti toj tsots skʼoplal li sutesel oʼontonale. Yuʼun jaʼik tukʼil krixchanoetik chaʼi sbaik ti mu xa persauk sutes yoʼontonike. Kʼalal chopol kʼoptaat leʼ xa van ta xchibal jabil ta skoj ti la xchiʼin ta veʼel jtsobpatanetik xchiʼuk jpasmuliletik li Jesuse, xi laj yale: «Maʼuk tal jtak ta ikʼel li buchʼutik tukʼike, jaʼ tal jtak ta ikʼel li jpasmuliletike» (Markos 2:15-17). Li jfariseoetik ti tukʼ tajek xaʼi sbaike mi jaʼuk xakʼik venta ti skʼan sutes yoʼontonike, jaʼ yuʼun muʼyuk buchʼu xmuyubaj yuʼunik ta vinajel. Pe kʼalal tsutes yoʼonton li jpasmuliletike oy buchʼutik xkuxet noʼox yoʼontonik ta vinajel.

Sventa xkom lek ta sjolik ti oy buchʼutik xkuxet tajek yoʼontonik ta vinajel ta skoj ti tsutes yoʼonton li jpasmulile, laj yalbe skʼoplal yan lokʼolkʼop ta sventa jun ants ta sna. Xi laj yal li Jesuse: «Mi oy junuk ants ti oy lajunsep drakma stakʼine, pe ti chʼay jsepe, ¿mi mu tauk stsan skantil, tsmes lek sna xchiʼuk tsaʼ lek, ti jaʼ to chlaj yoʼonton mi la stae? Vaʼun kʼalal mi la stae, tstak ta ikʼel li yamigotake xchiʼuk li slakʼnatake, xi chalbee: ‹Jmojuk kuxetuk koʼontontik, yuʼun laj xa jta li jsep drakma takʼin ti chʼayem toʼoxe›» (Lukas 15:8, 9).

Xkoʼolaj smelolal xchiʼuk li baʼyel lokʼolkʼop laj yal Jesus ta sventa li chʼayemal chije. Vaʼun xi laj yale: «Chkalboxuk avaʼiik ti jaʼ jech xkuxet yoʼonton li yaj-anjeltak Dios kʼalal tsutes yoʼonton li jun jpasmulile» (Lukas 15:10).

¡Toj echʼ xa noʼox oy ta yoʼonton yaj-anjeltak Dios ti akʼo sutes yoʼonton li jpasmuliletike! ¡Toj labal xa noʼox sba maʼ taje, yuʼun li jpasmulil ti tsutes yoʼontonike ch-akʼbat yavilik ta ajvalilal ta vinajel yuʼun Dios, pe taje mas to me tsots skʼoplal li abtelal tstaike, ti jaʼ mu sta yabtel li anjeletike! (1 Korintios 6:2, 3.) Akʼo mi jech, muʼyuk bu ch-itʼixaj yoʼonton li anjeletike. Vaʼun chaʼa, ¿kʼu van yelan chkaʼi jbatik kʼalal sutesoj xa yoʼonton chtal ta stojolal Dios li jun jpasmulile?