Te likik tal ta Galilea li Jesus xchiʼuk yajchankʼoptake, te echʼ xtuchʼik li Ukʼum Jordane, vaʼun batik ta sur, te jelavik batel ta Perea. Kʼalal te ay ta slajeb velta ta Perea li Jesuse jaʼ te laj yalbe jfariseoetik ti kʼu yelan chil Dios ti tsutes-o sbaike (Lukas 16:18). Pe te lik yalbeik skʼoplal yan velta xtok sventa tskʼelbeik yoʼonton li Jesuse.

Laj yal Moises ti xuʼ sutes-o yajnil jun vinik mi «oy cʼusi chopol la stabee» (Deuteronomio 24:1). Pe ep ta tos kʼusitik chalik ti kʼusi xuʼ sutes-o yajnil li jun vinike. Jlom krixchanoetike xuʼ xa sutes-o yajnil chaʼiik akʼo mi mu masuk toj tsots ti kʼusi chopol laj yilbeike. Jaʼ yuʼun xi la sjakʼ li jfariseoetike: «¿Mi stakʼ sutes-o yajnil li jun vinik ta skoj kʼusiuk noʼoxe?» (Mateo 19:3).

Pe maʼuk laj yalbe skʼoplal kʼusi tsnop krixchanoetik li Jesuse, yuʼun toj pʼij kʼu yelan laj yalbe skʼoplal ti kʼu yelan la slikes nupunel li Diose. Xi laj yale: «¿Mi muʼyuk akʼelojik ti la spas jun vinik xchiʼuk jun ants ta slikebal li buchʼu pasvane xchiʼuk ti xi laj yale: ‹Jaʼ yuʼun ta xikta stot xchiʼuk smeʼ li vinike, yuʼun ta xnapʼi ta yajnil, vaʼun tspas ta jun sbekʼtalik li chaʼvoʼike›? Jech oxal mu xa me chaʼvoʼikuk, yuʼun pasik xa ta jun. Jaʼ yuʼun ti kʼusi spasoj ta jun li Diose muʼyuk buchʼu xuʼ xchʼak» (Mateo 19:4-6). Kʼalal laj yakʼ nupunuk Adan xchiʼuk Eva li Diose, muʼyuk bu laj yal ti xuʼ sutes sbaike.

Vaʼun xi la sjakʼbeik Jesus li jfariseoetik ta sventa taje: «Vaʼun chaʼa, ¿kʼu yuʼun laj yal mantal Moises ti akʼo spasbeik svunal sventa xbat li yajnilike xchiʼuk ti sutesik-oe?» (Mateo 19:7). Xi takʼbatik yuʼun li Jesuse: «Li Moisese laj yakʼ ti akʼo xasutes-o avajnilik ta skoj ti tsots avoʼontonike, pe taje mu jechuk onoʼox ta slikebal» (Mateo 19:8). Kʼalal «ta slikebal», xie, jaʼ chalbe skʼoplal kʼalal la slikes nupunel ta Eden li Diose, maʼuk chalbe skʼoplal li ta skʼakʼalil Moisese.

Li avie oy kʼusi melel xi laj yal Jesus ti tsots skʼoplale: «Li voʼone chkalboxuk avaʼiik ti buchʼu tsutes-o yajnil mi maʼuk ta skoj mulivajel [pornéia ta griego kʼop] xchiʼuk ti chikʼ yan antse tsloʼla snup xchiʼil» (Mateo 19:9). Jaʼ yuʼun chaʼa, jaʼ noʼox xuʼ sutes-o sbaik mi mulivajik kʼuchaʼal chal Vivliae.

Xi laj yal yajchankʼoptak ta skoj taje: «Mi jaʼ jech chkʼot ta stojolal xchiʼuk yajnil li jun vinike chaʼa, jaʼ mas lek ti mu xnupune» (Mateo 19:10). Jaʼ yuʼun, li buchʼu tskʼan chnupune skʼan teuk ta sjol ti jaʼ sventa sjunul xkuxlejal li nupunele.

Vaʼun laj yalbe skʼoplal tojol kerem tsebetik xtok li Jesuse, laj yal ti oy la buchʼutik muʼyuk chnupunik ta skoj ti oy spaltail vokʼike. Jlome jaʼ ta skoj ti pasbilik ta kapone, vaʼun mu xa xuʼ yuʼun xchiʼinvanik ta vayel. Pe li yantike jaʼ chlokʼ ta yoʼonton stukik ti muʼyuk chnupunike, sventa jaʼ xakʼ ta xkuxlejalik spasbel yabtel li Ajvalilal yuʼun Diose. Xi albatik mantal yuʼun Jesus li buchʼutik te chaʼiik mantale: «Ti buchʼu xuʼ yuʼun chaʼi jeche [ti tojol kerem o tojol tseb chkom-oe] akʼo spas jech» (Mateo 19:12).

Te une laj yikʼ tal yalab xnichʼnabik ta stojolal li Jesuse. Pe lajik ta utel yuʼun yajchankʼoptak Jesus li krixchanoetike, yuʼun tsnopik ti xuʼ chopol xaʼi li Jesuse. Pe muʼyuk bu chopol chil, jaʼ yuʼun xi laj yalbe li yajchankʼoptake: «Akʼo talikuk ta jtojolal li uni ololetike, mu xapajesik; yuʼun jaʼ jechik li buchʼutik chuʼuninik li Ajvalilal yuʼun Diose. Ta melel chkalboxuk avaʼiik ti buchʼu muʼyuk chchʼam li Ajvalilal yuʼun Dios jech kʼuchaʼal jun uni olole, mi jaʼuk onoʼox bu ch-och te» (Markos 10:14, 15; Lukas 18:15).

¡Toj lek li kʼusi laj yakʼ ta chanele! Skʼan bikʼit xkakʼ jbatik mi ta jkʼan chij-och li ta Ajvalilal yuʼun Diose xchiʼuk ti jtakʼtikuk chanubtasel jech kʼuchaʼal li ololetike. Vaʼun laj yakʼ ta ilel Jesus ti skʼanoj li uni ololetike, la spet xchiʼuk la yakʼbe bendision. Taje jaʼ me jech chkʼanatik skotol li buchʼutik «chchʼam li Ajvalilal yuʼun Dios jech kʼuchaʼal jun uni olole» (Lukas 18:17).