Te kʼotik ta Jeriko li Jesus xchiʼuk li xchiʼiltak ta xanbale. Jun kʼakʼal laj yichʼ yuʼunik, yuʼun te to likik tal ta Jerusalen. Oy chib lum ti Jeriko sbie, te van junuk kilometro xchiʼuk oʼlol snamal xil sbaik, jaʼ te xkom ta yosilal Roma li achʼ Jerikoe. Vaʼun kʼalal yakal chlokʼik batel li Jesus xchiʼuk li epal krixchanoetik li ta junuk lum taje, sventa chbatik li ta yan Jerikoe, te laj yaʼiik chaʼvoʼ maʼsatetik ti xvochet tajek krixchanoetike, Bartimeo sbi li jun maʼsate.

Kʼalal laj yaʼi Bartimeo ti jaʼ Jesus ti te nopol xlokʼ batele, xi lik avanuk xchiʼuk li jun xchiʼile: «¡Kajval, xnichʼon David, oyuk xkʼuxul avoʼonton ta jtojolalkutik!» (Mateo 20:30). Pe oy jlom krixchanoetik ti tsots mantal laj yalbeik ti akʼo xa stsʼijiike, pe mas to tsots lik avanikuk. Vaʼun kʼalal laj yaʼi li Jesuse paj ta xanbal xchiʼuk laj yal ti akʼo yikʼik tal li vinik ti yakal ch-avane. Laj yikʼik tal jun li jkʼanlimoxna vinike xchiʼuk xi laj yalbeike: «¡Tsotsuk avoʼonton! Vaʼlan, yuʼun la stakot ta ikʼel» (Markos 10:49). Xmuyubaj tajek, la sjip komel li skʼuʼ slapoj ta sbae, xpʼitluj to likel xchiʼuk bat ta stojolal li Jesuse.

Xi la sjakʼ li Jesuse: «¿Kʼusi chakʼan ta jpasboxuk?». Vaʼun xi la skʼan vokol xchaʼvoʼalike: «Kajval, akʼo jamuk li jsatkutike» (Mateo 20:32, 33). Kʼuxubaj ta yoʼonton viniketik li Jesuse, jaʼ yuʼun la spikbe li sbekʼ satike xchiʼuk xi laj yalbe li june: «Batan, lapoxtaj xa ta skoj li xchʼunel avoʼontone» (Markos 10:52). Jam sat xchaʼvoʼalik li jkʼanlimoxna viniketike, jech oxal lik skʼupil kʼoptaik Dios. Lik skʼupil kʼoptaik Dios ek li krixchanoetik ti laj yilike. Vaʼun lik stsʼakliik Jesus li viniketik ti jam satike.

Toj echʼ xa noʼox ep krixchanoetik ta spat xokon Jesus kʼalal te echʼ ta Jerikoe. Yuʼun tskʼan chojtikin yaʼiik buchʼu ti la sjambe sat li chaʼvoʼ viniketike. Ta skoj ti snetʼnetʼ sbaik ta jyalel li krixchanoetike, mu xa xilik bu chbat li Jesuse. Jaʼ jech, oy jun vinik ti mu xa sta ta ilel li Jesuse, Sakeo sbi, jaʼ jun bankilal yuʼun jtsobpatanetik ta Jeriko xchiʼuk li ta spat xokon jteklume. Pe mu xil kʼusi tspasik ta skoj ti komkom vinik noʼoxe, jech oxal muy ta jtekʼ steʼel teʼtikal igo sventa tskʼel, yuʼun poʼot te xjelav li Jesuse. Vaʼun xil xa Sakeo ti kʼusi yakal tspasike. Kʼalal te x-echʼ Jesus ti bu taje, la skʼel muyel xchiʼuk xi laj yale: «Sakeo, yalan tal ta anil, yuʼun te chivay ta ana tana» (Lukas 19:5). Jech oxal, yal tal ta anil li Sakeoe xchiʼuk la stambe batel anil ta sna sventa chbat xchʼam li yajvulaʼale.

Pe lik bikʼtal kʼopojuk li krixchanoetik kʼalal laj yilike. Yuʼun tsnopik ti mu jechuk smelolal ti te chbat vayuk Jesus ta sna jun jpasmulil vinike. Pasem xa ta jkʼulej li Sakeo ta skoj ti muʼyuk stukʼil yoʼontone, yuʼun chelkʼanbe stakʼin krixchanoetik kʼalal tskʼan patane.

Pe kʼalal jaʼo xa yakal ch-och ta sna Sakeo li Jesuse, xi lik chopol kʼopojuk li krixchanoetike: «Bat vayuk ta sna jun jpasmulil vinik». Pe snaʼoj Jesus  ti xuʼ sutes yoʼonton li Sakeoe xchiʼuk jaʼ jech kʼot ta pasel un. Te une, vaʼ xi li Sakeoe xchiʼuk xi laj yale: «¡Kʼelo avil Kajval!, chkakʼbe j-oʼloluk kʼusitik oy kuʼun li buchʼutik abol sbaike, jech xtok, chanib to velta ta jsutesbe li buchʼu laj kelkʼanbe ta mukul stakʼine» (Lukas 19:7, 8).

¡Jamal xvinaj ti ta sjunul yoʼonton la sutes yoʼonton li Sakeoe! Yikʼaluk van kʼalal och skʼel li sresivotake te laj yakʼ venta kʼu yepal stsakojbe stakʼin jlom judaetik, vaʼun chanib to velta yepal la sutes ti kʼu yepal yelkʼanoje. Pe mas to ep la sutes, maʼuk noʼox jech yepal kʼuchaʼal chal Smantal Moisese (Éxodo 22:1; Levítico 6:2-5). Maʼuk noʼox, yuʼun laj yal ti chakʼ j-oʼloluk kʼusi oy yuʼun sventa tskolta li povreetike.

Toj lek laj yil Jesus ti la sutes yoʼonton li Sakeoe, jaʼ yuʼun xi laj yalbee: «Laj xa sta skolebalik avi kʼakʼal li buchʼutik liʼ nakalik ta nae, yuʼun li vinik liʼe jaʼ xnichʼon Abraan ek. Yuʼun li Xnichʼon krixchanoe jaʼ tal saʼ xchiʼuk tal skolta li buchʼutik chʼayemike» (Lukas 19:9, 10).

Mu to jaluk yechʼel ti laj yalbe skʼoplal Jesus jun lokʼolkʼop ta sventa li jtoyba kerem sventa chalbe skʼoplal «li buchʼutik chʼayemike» (Lukas 15:11-24). Li avie maʼuk xa noʼox jun lokʼolkʼop, yuʼun laj xa yichʼ tael li buchʼu chʼayem toʼox xkaltike. Pe li jnitvanejetik ta relijion yuʼun judaetik xchiʼuk li sviniktakike lik van xchopol kʼoptaik Jesus ta skoj ti tskolta krixchanoetik kʼuchaʼal Sakeoe. Akʼo mi jech, yakʼojbe-o yipal Jesus ta saʼel li xnichʼnab Abraan ti chʼayemike, vaʼun ep buchʼutik tskoltaan.