Oy xa van ta xchibal jabil ti yakʼojbe tajek yipal cholmantal li Jesuse. Jaʼ yuʼun, ¿mi jaʼ xa van yorail sventa xyochbe yipal xchiʼuk ti xkux yoʼontone? Moʼoj, yuʼun mas to la xchol batel li mantal «ta skotol jteklumetik xchiʼuk ta bikʼit lumetik [ta Galilea] li Jesuse, chanubtasvan ta snailtak stsobobbailik xchiʼuk la xcholbe skʼoplal li lekil aʼyejetik ta sventa li Ajvalilale xchiʼuk la xpoxta li buchʼutik oy kʼusi kʼux chaʼiike xchiʼuk li buchʼutik muʼyuk lekike» (Mateo 9:35). Kʼalal jaʼ jech laj yile, jaʼ te laj yakʼ venta ti skʼan xakʼbe yipal mas xcholel li mantale. Pe ¿kʼusi van chut un?

Kʼalal yakal chanav batel li Jesuse, te laj yakʼ venta ti skʼanik makʼlinel ta mantal li krixchanoetike xchiʼuk ti skʼan patbel yoʼontonike. Xkoʼolajik kʼuchaʼal chijetik ti chʼabal xchabielike, ti yayijem sbekʼtalike xchiʼuk ti tanpukik laj yile. Jaʼ yuʼun kʼuxubaj ta yoʼonton xchiʼuk xi laj yalbe li yajchankʼoptake: «Ta melel, toj ep kʼusitik tsʼunbil ti skʼan tsobbel sate, pe jaʼ toj jutuk li j-abteletike. Jaʼ yuʼun chaʼa, kʼanbeik vokol li Yajval Abtel ti akʼo stak batel j-abteletik ta stsobbel sat li kʼusitik tsʼunbile» (Mateo 9:37, 38).

Snaʼoj lek Jesus ti kʼusi chkoltaatik li krixchanoetike. Jech oxal la stak ta ikʼel li lajchaʼvoʼ jtakboletik sventa stak batel ta cholmantal ta chaʼchaʼvoʼe, jaʼ yuʼun vakchop lokʼik echʼel ta cholmantal. Vaʼun xi laj yal mantal li Jesuse: «Mu me xatambeik batel sbe jyanlumetik xchiʼuk mu me xa-ochik batel mi ta junuk jteklum ta Samaria, moʼoj, jaʼ lek te xabatik ta stojolal li chʼayemal chijetik ta sna Israele. Kʼalal yakal chabatike,  cholik mantal xchiʼuk xi xavalilanike: ‹Nopajem xa tal li Ajvalilal ta vinajele›» (Mateo 10:5-7).

Li Ajvalilal chcholbeik skʼoplale jaʼ li kʼusi la skʼan Jesus li ta orasion laj yakʼ ta chanele. Xi chalik batel li jtakboletike: «Nopajem xa tal li Ajvalilal[e]». Kʼalal jech chalike jaʼ skʼan xal ti te oy ta stojolalik li Jesukristo ti jaʼ li Ajvalil vaʼanbil yuʼun Diose. Pe ¿kʼuxi chakʼik ta ilel ti jaʼik yajkʼopojel ta melel Ajvalilal li yajchankʼoptak Jesuse? Veno, akʼbat sjuʼelik yuʼun Jesus sventa xpoxtaik jchameletik xchiʼuk xchaʼkuxesik animaetik ta moton. Pe ¿kʼuxi tsta sveʼelik xchiʼuk kʼusitik chtun yuʼunik li jtakboletike?

Albatik yuʼun Jesus ti akʼo mu xichʼ batel kʼusitik chtun yuʼunik li yajchankʼoptak kʼalal mi batik ta cholmantale. Akʼo la mu xichʼ batel s-oroik, splataik xchiʼuk skovreik li ta yav stakʼinike. Jech xtok, mu la persauk xichʼ batel smoralik sventa xkuch sveʼelik mi jaʼuk xichʼ batel yan skʼuʼ spokʼik xchiʼuk xonobik. ¿Kʼu yuʼun? Yuʼun xi patbat yoʼontonike: «Li j-abtele sta-o ti x-akʼbat sveʼele» (Mateo 10:10). Yuʼun li buchʼutik lek chaʼiik mantale jaʼ chakʼbeik li kʼusitik chtun yuʼunik li yajchankʼoptak Jesuse. Xi laj yal li Jesuse: «Buyuk noʼox jpʼejukal na ti cha-ochike, te komanik-o jaʼ to mi lalokʼik batel tee» (Markos 6:10).

Jech xtok, albatik yuʼun Jesus kʼusi chkʼot yalik kʼalal chchiʼinik ta loʼil li yajval na ta sventa li Ajvalilale, xi albatike: «Kʼalal cha-ochik ta yut nae kʼoponik li buchʼutik te oye. Mi staik-oe komuk ta stojolalik li jun oʼontonal chavalbeike, pe mi mu staik-oe, sutuk tal ta atojolalik li jun oʼontonal laj avalbeike. Buyuk noʼox ti mu skʼan xchʼamoxuk xchiʼuk ti mu skʼan xaʼiik li akʼopike, lilino komel li spukukal avokik kʼalal mi lalokʼik tal li ta na taje o li ta jteklume» (Mateo 10:12-14).

Yuʼun oy onoʼox bu ti sjunul lum o sjunul bikʼit lum ti mu skʼanik li mantal chcholik Jesus xchiʼuk yajtakboltake. ¿Kʼusi van chkʼot ta stojolal li lumetik ta skoj ti mu skʼanike? Laj yal Jesus ti toj tsots chichʼik chapanele. Xi chalbe smelolale: «Ta melel chkalboxuk avaʼiik: li ta Skʼakʼalil Chapanele mas to me tsots chil svokol li jteklum taje, jaʼ tsʼikbaj to chaʼi li yosilal Sodoma xchiʼuk Gomorrae» (Mateo 10:15).